Taano si Jesus ta Dai Nakilabot sa Politika?

IMAHINARA an sarong eksena kan taon 32 C.E. Hapon nang marhay kaidto. Si Jesus, an ihinulang Mesiyas, bantog nang marhay huli sa pagpaomay sa mga may helang asin pagbuhay pa ngani sa mga gadan. Kan aldaw na iyan, napangalas na marhay sa saiya an sarong grupo nin rinibong tawo huli sa pagsagibo nia nin makapangyarihan na mga tanda asin pagpahayag kan mga katokdoan nin Dios. Binaranga nia ngonyan sa saradit na grupo an nagugutom na mga tawo. Namibi sia ki Jehova asin milagrosong pinakakan sinda gabos. Dangan tinipon nia an mga tada tanganing mayong masayang. Ano an reaksion kan mga tawo?—Juan 6:1-13.

Bueno, pagkaheling sa mga milagro ni Jesus asin sa saiyang abilidad na pangenotan an kadaklan saka asikasohon an pangangaipo ninda, nagkongklusyon an mga tawo na si Jesus magigin marahayon na hade. (Juan 6:14) Bakong makangangalas an saindang reaksion. Girumdoma na desperado sinda na magkaigwa nin marahay asin epektibong namamahala; an saindang namomotan na dagang tinuboan nasa irarom kan mapan-aping pamamahala nin ibang nasyon. Kaya pinirit ninda si Jesus na lumaog sa politika. Nasa isip an kamugtakan na iyan, konsideraron an saiyang reaksion.

“Si Jesus, sa pakaaram na sinda madorolok asin kukuanon sia nin pirit tanganing gibohon siang hade, naghale liwat pasiring sa bukid na sia sana,” an sabi kan Juan 6:15. Malinaw nanggad an paninindogan ni Jesus. Marigon siang nagsayumang makilabot sa politika kan saiyang dagang tinuboan. Dai noarin man nagbago an saiyang paninindogan. Sinabi nia na an saiyang mga parasunod dapat na arog man kaiyan an paninindogan. (Juan 17:16) Taano ta siring an paninindogan nia?

Taano ta Pinili ni Jesus an Neutralidad?

An neutralidad ni Jesus mapadapit sa politika kan kinaban na ini marigon na nakabasar sa mga prinsipyong sono sa Kasuratan. Konsideraron an duwa sana kaiyan.

“An tawo nagsasakop sa tawo sa saiyang ikakaraot.” (Eclesiastes 8:9) Arog kaiyan an pagkasumaryo kan Biblia sa kasaysayan kan pamamahala nin tawo. Girumdoma na si Jesus nag-eksister bilang espiritu sa langit haloy pa bago sia magdigdi sa daga bilang tawo. (Juan 17:5) Sa siring, aram nia na gurano man karahay kan intension nin tawo, mayo ini kan kakayahan na asikasohon sa tamang paagi an mga pangangaipo nin binilyon na tawo; ni linalang man ini nin Dios tanganing gibohon iyan. (Jeremias 10:23) Aram ni Jesus na an solusyon sa mga problema nin katawohan magikan sa ibang paagi—bako sa mga gobyerno nin tawo.

“An bilog na kinaban namumugtak sa kapangyarihan kan saro na marigsok.” (1 Juan 5:19) Nakakabigla daw sa saindo an mga tataramon na iyan? Dakol an nabibigla. Iniisip ninda an sinserong mga tawo na nakilabot sa gobyerno huling gusto nindang gibohon an kinaban na mas marahay asin mas ligtas na lugar. Pero, gurano man an pagmamaigot ninda, dawa an pinakasinserong mga namamahala dai kayang daogon an impluwensia kan saro na inapod ni Jesus na “an namamahala sa kinaban na ini.” (Juan 12:31; 14:30) Iyan an dahelan kun taano ta sinabi ni Jesus sa sarong politiko: “An sakong kahadean bakong kabtang kan kinaban na ini.” (Juan 18:36) Si Jesus an magigin Hade kan gobyerno nin Dios sa langit. Kun si Jesus nakilabot kaidto sa politika, ikinakompromiso nia kutana an kaimbodan nia sa gobyerno kan saiyang Ama.

Kun siring, itinokdo daw ni Jesus na an mga parasunod nia mayong obligasyon sa mga gobyerno sa daga? Sa kabaliktaran, tinokdoan nia sinda na magin timbang sa saindang mga paninimbagan sa Dios asin sa mga obligasyon ninda sa sekular na mga gobyerno.

Iginalang ni Jesus an Autoridad kan Gobyerno

Mantang nagtotokdo si Jesus sa templo, prinobaran nin mga paratumang na ibugtak sia sa alanganon na situwasyon paagi sa paghapot kun baga maninigong  magbayad nin buhis an mga tawo. Kun sasabihon ni Jesus na dai, an saiyang simbag ibibilang na tumang sa gobyerno asin puede pa nganing magin dahelan na magrebelde an inaaping mga tawo na gustong-gustong makabutas sa maringis na pamamahala nin Roma. Alagad kun sasabihon ni Jesus na iyo, dakol an maghohona na kinokonsinte nia an mga inhustisya na naeeksperyensiahan ninda. An simbag ni Jesus tamang-tama sa pagigin timbang. Sinabi nia: “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Lucas 20:21-25) Kaya an saiyang mga parasunod may mga obligasyon sa Dios asin ki Cesar—an boot sabihon, sa sekular na gobyerno.

Minsan paano, an mga gobyerno nagpapadanay nin areglo. Angay na hinahagad ninda sa mga siudadano na magin onesto, magbayad nin buhis, asin magsunod sa ley. Anong halimbawa an ipinaheling ni Jesus sa pagtao ki ‘Cesar kan mga bagay na ki Cesar’? Pinadakula si Jesus nin mga magurang na nagsusunod sa ley dawa kun iyan bakong kombenyente. Halimbawa, si Jose asin an bados niang agom na si Maria nagbiahe nin mga 150 kilometros pasiring sa Betlehem huli kan sensus na ipinagboot kan Roma. (Lucas 2:1-5) Arog ninda, si Jesus makinuyog sa ley, na nagbabayad pa ngani nin buhis na dai man talaga nia kaipuhan bayadan. (Mateo 17:24-27) Maingat man siang naglikay na makalampas sa autoridad nia manongod sa sekular na mga bagay. (Lucas 12:13, 14) Masasabi niato na iginalang ni Jesus an makinarya kan gobyerno, minsan ngani nagsayuma siang maneharon iyan. Pero, ano an boot sabihon ni Jesus sa pagsabi na itao “sa Dios an mga bagay na sa Dios”?

Kun Paano Itinao ni Jesus “sa Dios an mga Bagay na sa Dios”

Hinapot kaidto si Jesus kun arin an pinakanakakalabi sa gabos na ley na itinao nin Dios sa tawo. Nagsimbag si Cristo: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong  isip.’ Iyo ini an nakakalabi sa gabos asin enot na togon. An ikaduwa, na arog kaiyan, iyo ini, ‘Kamotan mo an saimong kapwa nin siring sa saimo man sana.’” (Mateo 22:37-39) Itinokdo ni Jesus na kun dapit sa pagtao ‘sa Dios kan mga bagay na sa Dios,’ an enot na dapat niatong itao sa Saiya iyo an pagkamoot—na kalabot an satong bilog na puso asin lubos na kaimbodan.

Puede daw na bangaon an siring na pagkamoot? Puede daw na bangaon an satong kaimbodan, na an sarong kabtang itatao niato ki Jehova Dios saka sa gobyerno nia sa langit asin an sarong kabtang itatao niato sa sarong gobyerno sa daga? Sinabi mismo ni Jesus an prinsipyo: “Mayo nin siisay man na makakapaglingkod sa duwang kagurangnan; huli ta magsalang ikakaongis nia an saro asin mamomotan nia an ikaduwa, o magigin dayupot sia sa saro asin isisikwal nia an ikaduwa.” (Mateo 6:24) Dian, si Jesus nagtataram manongod sa pagbanga kan satong kaimbodan sa Dios asin sa kayamanan, alagad malinaw na namatean nia na an iyo man sanang prinsipyo minaaplikar sa pakikilabot sa politika—siring kan namatean kan mga parasunod nia kan enot na siglo.

An kagurang-guranging mga rekord na makukua nagpapaheling na an mga parasunod ni Jesus sa suanoy na kinaban dai nanggad nakilabot sa politika. Huling lubos nindang itinao an saindang pagsamba sa Saro na sinasamba ni Cristo, nagsayuma sindang manumpa sa Roma asin sa emperador kaiyan, maglaog sa serbisyo militar, asin mag-ako nin katongdan sa gobyerno. Bilang resulta, naeksperyensiahan ninda an gabos na klase nin pagtumang. Kun beses, sinda inaakusaran kan mga kaiwal ninda nin pagkaongis sa katawohan. Rasonable daw an akusasyon na iyan?

An Tunay na mga Kristiano May Pagmakolog sa mga Tawo

Girumdoma an pagsambit ni Jesus sa ikaduwang nakakalabi sa gabos na togon nin Dios—“Kamotan mo an saimong kapwa nin siring sa saimo man sana.” Malinaw nanggad, mayong tunay na parasunod ni Cristo an puedeng maongis sa katawohan.  Namotan ni Jesus an mga tawo, ginibo an gabos niang makakaya para sa sainda, asin tinabangan sinda dawa sa pangaroaldaw saka pinakaordinaryo nindang mga problema.—Marcos 5:25-34; Juan 2:1-10.

Pero, sa ano pangenot na midbid si Jesus? Dai sia inapod na Parapaomay, Parapakakan nin Rinibo, asin dawa Parabuhay kan mga Gadan—minsan ngani ginibo nia gabos an pambihirang mga bagay na idto. Kundi inapod sia nin mga tawo na Paratokdo, asin angay nanggad iyan. (Juan 1:38; 13:13) Ipinaliwanag ni Jesus na an sarong pangenot na dahelan na sia nagdigdi sa daga iyo na tanganing tokdoan an mga tawo manongod sa Kahadean nin Dios.—Lucas 4:43.

Iyan an dahelan kun taano ta idinudusay kan tunay na mga parasunod ni Cristo an saindang sadiri sa iyo man sanang gibohon na dian nagin sibot an saindang Kagurangnan kan sia nabuhay kaidto sa daga—an pagtokdo sa mga tawo kan maogmang bareta manongod sa Kahadean nin Dios. Isinugo ni Jesu-Cristo an gabos na tunay na Kristiano na tokdoan an mga tawo sa bilog na kinaban manongod dian. (Mateo 24:14; 28:19, 20) An dai malalaglag na gobyernong iyan sa langit mamamahala sa gabos na linalang nin Dios, oyon sa ley nin pagkamoot. Ootobon kaiyan an kabotan nin Dios, na hinahale pa ngani an pagsakit asin kagadanan. (Mateo 6:9, 10; Kapahayagan 21:3, 4) Bakong makangangalas na inapod kan Biblia an mensahe ni Cristo na “maogmang bareta”!—Lucas 8:1.

Kaya kun hinahanap nindo an tunay na mga parasunod ni Jesu-Cristo sa daga ngonyan, paano nindo sinda mamimidbid? Sinda daw makikilabot sa politika kan kinaban na ini? O an ginigibo daw nindang pangenot na misyon kapareho kan ki Jesus—an paghuhulit asin pagtotokdo manongod sa Kahadean nin Dios?

Boot daw nindong makanood nin orog pa manongod sa Kahadean nin Dios asin kun paano iyan makakaapektar sa saindong buhay ngonyan? Iniimbitaran niamo kamo na kontakon an Mga Saksi ni Jehova sa lugar nindo o buksan an saindang opisyal na Web site na www.watchtower.org.

[Kahon/Mga Ritrato sa pahina 24, 25]

Nagtatabang daw an Mga Saksi ni Jehova sa Komunidad?

Neutral sa politika an Mga Saksi ni Jehova. Minsan siring, sinda imbueltong marhay sa pagtabang sa mga tawo na hale sa gabos na rasa asin kamugtakan sa saindang komunidad. Konsideraron an nagkapirang impormasyon:

▪ Kaiba sa Mga Saksi ni Jehova an labi sa pitong milyon na boluntaryo na naggagamit nin labi sa 1.5 bilyones na oras kada taon sa pagtotokdo sa mga tawo dapit sa Biblia asin kun paano iyan makakatabang sa sainda na mapangganahan an nakakadanyar na mga ugale asin gibo, magkaigwa nin maogmang pamilya, asin mapaoswag an saindang buhay.

▪ Nag-iimprenta asin nagdidistribwir sinda nin mga babasahon na mayong bayad sa labing 500 na lenguahe, na an nagkapira sa lenguaheng iyan mayo nin ibang imprentadong babasahon.

▪ Igwa sinda nin mga kurso sa pagtaram sa publiko na nakatabang na sa minilyon na makanood na malinaw asin mataktikang ipahayag an nasa boot ninda.

▪ Nag-iisponsor sinda nin mga programa sa pagbasa asin pagsurat na nakatabang na sa manampulong ribo sa bilog na kinaban.

▪ Nag-organisar sinda nin labing 400 na Rehional na Komite sa Pagtogdok sa bilog na kinaban tanganing sanayon an mga boluntaryo sa mga abilidad sa pagtogdok tanganing makapatindog sinda nin mga sentro nin edukasyon sa Biblia. Kan nakaaging dekada, labing 20,000 na harong nin pagsamba, o Kingdom Hall, an ikinatogdok.

▪ Imbuelto sinda sa pag-ayuda durante nin mga kalamidad sa bilog na kinaban, na nagtatabang sa mga Saksi asin bakong Saksi. Sa laog nin duwang taon pagkatapos nin sunod-sunod na bagyo na tuminama sa Estados Unidos, itinogdok liwat kan boluntaryong mga Saksi an labing 90 Kingdom Hall asin 5,500 na harong.

[Kahon sa pahina 23]

Kan pinirit si Jesus kan mga tawo na makilabot sa politika, sia naghale “pasiring sa bukid na sia sana”