‘Kun Kamo Namimibi, Magsabi Kamo, “Ama”’

“Ama.” Ano an naiisip nindo sa tataramon na iyan? Sarong mamomoton asin mapagpadangat na lalaki na talagang nagmamakolog sa kapakanan kan pamilya nia? O sarong pabaya, na tibaad maringis pa nganing lalaki? Nakadependeng marhay iyan sa kun anong klaseng lalaki an saimong ama.

“AMA” an termino na parateng ginagamit ni Jesus kun nakikipag-olay sa Dios asin kun ipinapakipag-olay an manongod sa Dios. * Kan tinotokdoan ni Jesus an mga parasunod nia na mamibi, sia nagsabi: ‘Kun kamo namimibi, magsabi kamo, “Ama.”’ (Lucas 11:2) Alagad anong klaseng ama si Jehova? Mahalagang marhay an simbag sa hapot na ini. Taano? Mientras na orog niatong nasasabotan kun anong klaseng ama si Jehova, orog kitang mapaparani sa saiya asin orog man niato siang mamomotan.

Si Jesus sana an pinakakualipikadong magsabi sa sato kan manongod sa satong Ama sa langit. Nagin dayupot sia sa saiyang Ama. Sinabi ni Jesus: “Dai nin siisay man na nakakamidbid sa Aki, kundi an Ama, ni siisay man dai nakakamidbid sa Ama, kundi an Aki, asin  idtong boot kan Aki na pahayagan.” (Mateo 11:27) Kaya, an pinakamarahay na paagi na mamidbid an Ama iyo an makanood sa Aki.

Ano an manonodan niato ki Jesus manongod sa satong Ama sa langit? Isip-isipa an sinabing ini ni Jesus: ‘An Dios namoot na gayo sa kinaban, na itinao nia an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’ (Juan 3:16) Sinasabi kan mga tataramon na ini ni Jesus kun ano an nangingibabaw na karakteristiko kan Ama—an pagkamoot. (1 Juan 4:8) Ipinapahiling ni Jehova an pagkamoot nia sa laen-laen na paagi, arog baga nin pag-oyon, pagmalasakit, pagtao nin proteksion, pagdisiplina, saka pagtao nia kan satong pangangaipo.

Sinisierto sa Sato an Pag-oyon kan Ama

Napapakosog asin napaparigon an boot kan mga aki kun inooyonan sinda kan saindang mga magurang. Imahinara kun gurano nanggad naparigon an boot ni Jesus kan sabihon kan saiyang Ama: “Ini iyo an namomotan kong Aki, na sa saiya naoogma ako.” (Mateo 3:17) Sinisierto man sa sato ni Jesus na namomotan asin inooyonan kita kan Ama. “An namomoot sako mamomotan kan sakong Ama,” an sabi ni Jesus. (Juan 14:21) Talagang nakakaranga an mga tataramon na iyan! Pero, may saro na habo kang maranga.

Naggigibo nin paagi si Satanas tanganing magduda kita sa pag-oyon sa sato kan Ama. Gusto niang isipon niato na bako kitang angay na mag-ako kaiyan. Sa parate, ginigibo nia ini sa panahon na maluya kita—may helang, may edad na, o pinangluluyahan nin boot huling dai kita nagin mapanggana o dai nangyari an mga linalaoman ta. Isip-isipa an eksperyensia ni Lucas, na nakamate na dai sia maninigo sa pag-oyon nin Dios. Inestorya ni Lucas na grabe an ipinagbago kan mga magurang nia kan tin-edyer sia; binaliwala ninda an dakol na pamantayan na itinokdo ninda sa saiya. Tibaad iyan an dahelan kaya nasakitan siang maparani sa saiyang Ama sa langit. Saro pa, huling pusokpusokan, parate siang nagkakaproblema, nangorogna sa relasyon nia sa iba. Pero, luway-luway niang nakontrol iyan sa tabang kan saiyang mapasensia asin nakakaparigon na agom, na inaapod ni Lucas na “espesyal na regalo hale sa Dios.” Napahalagahan nia an bagay na ‘si Cristo Jesus napadigdi sa kinaban sa pagligtas sa mga parakasala.’ (1 Timoteo 1:15) Sinabi ni Lucas na nakamate sia nin kaogmahan asin satispaksion sa paghorophorop nia sa pagkamoot asin pag-oyon nin Dios.

Kun nagduduwaduwa ka kun baga mamomotan o ooyonan ka ni Jehova, makakatabang sa saimo an pagbasa asin paghorophorop sa Roma 8:31-39. Sa tekstong iyan, mamomoton na sinisierto sa sato ni apostol Pablo na mayo nin “makakapabulag sato sa pagkamoot nin Dios, na yaon ki Cristo Jesus na satong Kagurangnan.” *

Sarong Ama nin Mamomoton na Pagmalasakit

Nasasabotan kan satong Ama sa langit an pagsakit niato. Sia sarong Dios nin “mamomoton na pagmalasakit.” (Lucas 1:78, NW) Arog kan saiyang Ama, nagmalasakit si Jesus sa bakong perpektong mga tawo. (Marcos 1:40-42; 6:30-34) Hinihingoa man kan tunay na mga Kristiano na arogon an pagigin mapagmalasakit kan saindang Ama sa langit. Sinusunod ninda an konseho kan Biblia na ‘magin maboot sa balang saro asin mapagmalasakit.’—Efeso 4:32, An Banal na Biblia.

Isip-isipa an eksperyensia ni Felipe. Sarong aldaw, kan pasiring sia sa trabaho, bigla siang nakamate nin grabeng kolog, na garo baga sia sinaksak sa likod. Idinalagan sia sa ospital. Pagkatapos nin walong oras na pag-eksamin, sinabi kan mga doktor na nagkaigwa nin pakit sa laog kan aorta nia. Sinabi ninda na 25 minutos na sana an ilalawig kan buhay nia asin mayo nang magigibo an operasyon.

Yaon duman an nagkapirang kapagtubod ni Felipe, asin huli sa pagmalasakit ninda, napahiro sindang tumabang. Dali-dali ninda siang ibinalyo nin ospital, na duman naoperaran sia tolos, asin nagdanay sinda duman sagkod na matapos an operasyon. Nakakaogma ta nakaligtas si Felipe sa masakit na kamugtakan na iyan. Kun nagigirumdoman nia iyan, nagpapasalamat si Felipe sa pagmalasakit  kan mga kapagtubod nia. Pero, kombensido si Felipe na an saiyang Ama sa langit an nagpahiro sa sainda na magin mapagmalasakit. “Arog nin mamomoton na ama, an Dios garo man sana nakatindog sa kataed ko tanganing pakosogon ako,” an sabi ni Felipe. Iyo, parateng ipinapahiling ni Jehova an pagmalasakit nia paagi sa pagpahiro sa mga lingkod nia digdi sa daga na ipahiling an karakteristikong iyan.

An Satong Ama Nagtatao nin Proteksion

Kun nakakarisa nin peligro an sadit na aki, minadalagan sia sa saiyang ama tanganing maprotektaran. Nakakamate an aki na ligtas sia kun kinukugos sia kan saiyang mamomoton na ama. Lubos na nagtiwala si Jesus na poprotektaran sia ni Jehova. (Mateo 26:53; Juan 17:15) Puede man kitang makamate na ligtas kita huli sa proteksion kan satong Ama sa langit. Sa pangenot, espirituwal na proteksion an itinatao ngonyan ni Jehova. Sa ibang pagtaram, pinoprotektaran nia kita sa espirituwal na kapahamakan paagi sa pagtao sa sato kan mga kinakaipuhan niato tanganing makalikay sa peligro asin maingatan an satong pakikikatood sa saiya. Saro na dian an pagtao nia nin konseho na basado sa Biblia. Kun inaako niato an siring na konseho, garo man sana naglalakaw si Jehova sa likod niato na nagsasabi: ‘Iyo ini an dalan, lakaw kamo dian.’—Isaias 30:21.

Isip-isipa an halimbawa kan magturugang na si Tiago, Fernando, asin Rafael, na mga miembro nin rock-and-roll band. Ogmahon sinda kan mapili sinda na magtugtog sa saro sa pinakasikat na mga music hall sa São Paulo, Brazil. Garo baga tanaw na ninda an kapangganahan. Pero, pinatanidan sinda nin sarong kapagtubod manongod sa mga peligro nin pakikiibaiba sa mga nagbabaliwala sa mga pamantayan nin Dios. (Talinhaga 13:20) Idinoon nia an konsehong ini na basado sa Biblia paagi sa pagsaysay nin eksperyensia. An saiya mismong tugang na lalaki napalabot sa maraot na paggawe huli sa bakong marahay na pag-iriba. Nagdesisyon si Tiago asin an duwa niang tugang na bayaan an saindang karera sa pagkanta. Ngonyan, sindang tolo nasa bilog na panahon na Kristianong ministeryo. Naniniwala sinda na an pagsunod sa konseho kan Tataramon nin Dios nagin proteksion ninda sa espirituwal na kapahamakan.

Dinidisiplina Kita kan Satong Ama sa Langit

Dinidisiplina nin mamomoton na ama an saiyang mga aki, huling gusto niang magin marahay sindang tawo. (Efeso 6:4) An siring na ama tibaad estrikto, alagad bako nanggad maringis kun itinatanos an mga aki. Kaagid kaiyan, may mga panahon na tibaad kaipuhan kitang disiplinahon kan satong Ama sa langit. Alagad, an disiplina nin Dios pirmeng motibado nin pagkamoot asin bako nanggad maringis. Arog kan saiyang Ama, si Jesus dai noarin man nagin maringis, dawa kan an mga disipulo nia dai tolos naghimate sa kinakaipuhan na pagtatanos.—Mateo 20:20-28; Lucas 22:24-30.

Hilingon kun paano napahalagahan ni Ricardo an pagdisiplina sa saiya ni Jehova huli sa  pagkamoot. Inabandonar si Ricardo kan saiyang ama kan sia pitong bulan pa sana. Kan sia tin-edyer na, namatean nanggad ni Ricardo an kawaran nin ama. Napalabot sia sa maraot na mga gibo, asin pinonan siang pasakitan kan konsensia nia. Huling narealisar nia na an saiyang pamumuhay bakong kaoyon kan Kristianong mga pamantayan sa moral, nagdesisyon sia na makipag-olay sa mga elder sa inaatenderan niang kongregasyon. An mga elder nagtao nin marigon alagad mamomoton na konseho na basado sa Biblia. Pinahalagahan ni Ricardo an disiplina, alagad huli sa mga ginibo nia, padagos niang namatean an grabeng pagsakit—dai pakatorog kun banggi, pagluha, asin kamondoan. Sa katapustapusi, narealisar nia na an pagdisiplina sa saiya nangangahulogan na namomotan pa sia ni Jehova. Nagirumdoman ni Ricardo an mga tataramon sa Hebreo 12:6, na nagsasabi: “An namomotan ni Jehova saiyang dinidisiplina.” (NW)

Marahay na tandaan na an disiplina bako sanang pagpadusa o pagsagwe sa salang gibo. Sa Biblia, konektado man iyan sa pagsasanay. Kaya, puede kitang disiplinahon kan satong mamomoton na Ama paagi sa pagtogot na temporaryong saparon niato an makamomondong mga resulta kan satong pagkakasala. Pero, ipinaparisa kan Biblia na an disiplina nia pagsasanay sa sato, na nakakatabang sa sato na sundon an tamang dalan. (Hebreo 12:7, 11) Iyo, gusto nanggad kan satong Ama na mapakarahay kita, asin an pagtatanos nia para sa kapakinabangan niato.

Itinatao kan Satong Ama an Pisikal na Pangangaipo Niato

Hinihingoa nin mamomoton na ama na asikasohon an pisikal asin materyal na pangangaipo kan pamilya nia. Arog kaiyan si Jehova. ‘Aram kan saindong langitnon na Ama na kaipuhan nindo ining gabos na bagay,’ an sabi ni Jesus. (Mateo 6:25-34) Si Jehova nanunuga: ‘Sa ano man na paagi dai ako mapasudya saimo, dai taka man sa ano man na paagi pababayaan.’—Hebreo 13:5.

Napahalagahan kan babaeng si Nice an pagigin totoo kan mga tataramon na iyan kan mawaran nin trabaho an agom nia. Binayaan pa sana ni Nice an saiyang trabaho na may halangkaw na sueldo tanganing matawan nia nin mas dakol na panahon an duwang aking babae asin an paglilingkod sa Dios. Paano na an pagbuhay ninda ngonyan? Namibi sia ki Jehova. Kan sunod mismong aldaw, an agom nia buminalik sa pinagtatrabahohan kaini tanganing kuanon an mga gamit. Nabigla an agom nia kan sabihon kan among na may nabakante pa sanang trabaho asin iinalok iyan sa saiya! Kaya an agom ni Nice nawaran nin trabaho sa sarong aldaw, pero nakakua giraray sa sumunod na aldaw. Pinasalamatan nindang mag-agom an saindang Ama sa langit huli sa marahay na nangyari. An saindang eksperyensia nagpapagirumdom sa sato na bilang an satong mamomoton na Paratao, nungkang linilingawan ni Jehova an maimbod na mga lingkod nia.

Pagpahalaga sa Pagkamoot kan Satong Ama

Totoo, kun sa tataramon sana, dai nanggad ikakaladawan nin lubos an pambihirang pagkamoot kan satong Ama sa langit! Kun iisip-isipon niato an manlaenlaen na paagi na ipinapahiling nia an sa-amang pagkamoot—an saiyang pag-oyon, pagmalasakit, pagtao nin proteksion, pagdisiplina, saka pagtao kan satong pangangaipo—siertong masabi kita na sia nanggad an pinakamarahay na Ama!

Paano niato ikakapahiling an satong pagpahalaga sa pagkamoot satuya kan satong Ama sa langit? Puede kitang maghingoa na makanood nin orog pa manongod sa saiya asin sa katuyohan nia. (Juan 17:3) Puede tang ioyon an satong buhay segun sa saiyang kabotan asin mga dalan. (1 Juan 5:3) Puede tang arogon an saiyang pagkamoot sa pagtratar niato sa iba. (1 Juan 4:11) Sa gabos na paaging iyan, ikakapahiling niato na kita nag-aasa ki Jehova bilang satong Ama asin na ibinibilang niatong sarong onra an magin mga aki nia.

[Mga Nota sa Ibaba]

[Blurb sa pahina 19]

Mientras na orog niatong nasasabotan kun anong klaseng ama si Jehova, orog kitang mapaparani sa saiya asin orog man niato siang mamomotan

[Blurb sa pahina 22]

Ikakapahiling niato na kita nag-aasa ki Jehova bilang satong Ama asin na ibinibilang niatong sarong onra an magin mga aki nia

[Kahon/Mga Ritrato sa pahina 21]

IPINAPAHILING NI JEHOVA AN PAGKAMOOT NIA BILANG AMA SA LAEN-LAEN NA PAAGI

PAG-OYON

PAGMALASAKIT

PROTEKSION

DISIPLINA

PISIKAL NA SUPORTA