NAHAHANDAL daw kamo, arog kan dakol na tawo, na talagang dai na malilikayan an korapsion asin dai na noarin man mawawara nin biyo? Kun iyo, natural sanang mamatean iyan. Sa bilog na kasaysayan, prinobaran kan mga tawo an gabos na klase nin gobyerno na maiisip ninda. Pero, nungka sindang nagin mapanggana sa permanenteng paghale kan korapsion. May posibilidad pa daw na umabot an panahon na an gabos na tawo magigin onesto sa lambang saro?

Nakakaogma ta an simbag kan Biblia iyo! Sinasabi kaiyan sa sato na madali nang maghiro an Dios tanganing haleon an korapsion sa daga. Paano nia iyan gigibohon? Paagi sa saiyang Kahadean, sarong gobyerno sa langit na biyong mabago sa daga. Iyo man sana ini an Kahadean na itinokdo ni Jesus na ipamibi kan saiyang mga parasunod. Sa inaapod kun beses na Pamibi kan Kagurangnan o Ama Niamo, sinabi ni Jesus: “Dumatong an kahadean mo; kuyogon an boot mo digdi sa daga.”​—⁠Mateo 6:​10, An Marahay na Bareta Biblia.

 Mapadapit sa Tagapamahala kan Kahadean na iyan, si Jesu-Cristo, an Biblia naghula: ‘Ililigtas nia an nagkakaipo na nagkukurahaw, asin an nagmomondo na mayo nin siisay man na minasurog sa saiya. Maheherakan nia an dukha asin an nagkakaipo, asin ililigtas an mga kalag nin mga dukha. Sa daya asin sa paglupig tutuboson nia an saindang mga kalag.’ (Salmo 72:​12-14) Mangnoha na may empatiya si Jesus sa mga biktima nin korapsion, asin may gigibohon sia kun dapit sa pang-aapi! Bako daw na nakakaranga iyan?

Sa kamot kan maheherakon asin makapangyarihan na Tagapamahalang iyan, hahaleon kan Kahadean nin Dios an korapsion sa daga. Paano? Paagi sa paghale kan tolong dahilan nin korapsion.

Sa presente, dapat na labanan niato gabos an makasalan na mga tendensia na nagtutulod sa sato na magin maimot. (Roma 7:​21-23) Pero, may marahay na mga tawo na gustong gibohon an tama. Sinda nagtutubod sa nakakatubos na halaga kan pinabolos na dugo ni Jesus, asin sinda puedeng mapatawad sa mga kasalan ninda. * (1 Juan 1:​7, 9) An siring na mga tawo may oportunidad na makinabang sa kadarudakulaing akto nin pagkamoot nin Dios, arog kan mababasa niato sa Juan 3:16: ‘An Dios namoot na gayo sa kinaban, na itinao nia an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’

Para sa maimbod na mga tawo, an Dios may gigibohon na tunay na makangangalas. Sa maabot na bagong kinaban, hahaleon nia sa kahurihurihi an gabos na gira nin kasalan, na luway-luway na ibinabalik an maimbod na katawohan sa pagkaperpekto asin sa matanos na kamugtakan. (Isaias 26:9; 2 Pedro 3:13) An impluwensia nin kasalan nungka nang magigin dahilan tanganing magin korapto an siisay man. Sa irarom kan pamamahala kan Kahadean nin Dios, an maimbod na mga tawo papatalingkason sa pagkaoripon sa korapsion.

Makamomondo, dakol ngonyan an tuyong binibiktima an iba. Inaaprobetsaran ninda an hamak asin an pobre, asin iniimpluwensiahan ninda an iba na magin korapto man. Sinasadol kan Biblia an siring na mga tawo: ‘[Bayaan] na kan maraot na tawo an saiyang dalan, asin kan maliwag na tawo an saiyang mga kaisipan.’ Kun an siring na mga tawong korapto magsolsol, nanunuga an Biblia na an Dios ‘bulaos na magpapatawad.’​—⁠Isaias 55:⁠7.

Minsan siring, mayong magigibo an Dios kundi haleon an mga sutil na habong magbago. Paagi sa Kahadean nin Dios, maootob an panuga kan Biblia: ‘Manarig ka ki Jehova, asin otoba an saiyang dalan; kun taposon na nia an mga parakasala, [mahihiling] mo iyan.’ * (Salmo 37:34) Kun mayo na an mga maraot na habong magbago, an maimbod na mga nagsasamba sa Dios dai na magigin biktima nin korapsion.

An pangenot sa dai na mababakleng mga parakasala iyo si Satanas na Diablo. Nagpapasalamat nanggad kita na madali nang magbugtak si Jehova nin restriksion ki Satanas, na maolang sa saiya sa pag-impluwensia sa mga tawo. Sa kahurihurihi, biyong lalaglagon nin Dios si Satanas. An maraoton asin maringison na personang iyan nungka nang makakaimpluwensia sa mga tawo na magin korapto.

Totoo, garo baga pangarap sana an ideya na hahaleon nin Dios an gabos na dahilan nin korapsion. Tibaad isipon mo, ‘May kakayahan daw talaga an Dios na gibohon an siring na mga pagbabago? Kun iyo, taano ta dai pa nia iyan ginigibo?’ Magayon na mga hapot iyan, asin an Biblia nagtatao nin nakakakontentong mga simbag. * Iniimbitaran ka niamo na siyasaton mismo kun ano an itinotokdo kan Biblia manongod sa madali nang mangyari sa puturo, na dian an gabos na korapsion mawawara na sagkod lamang.