Nagpuon an presenteng panahon na organisasyon kan Mga Saksi ni Jehova kaidtong katapusan kan ika-19 siglo. Sarong sadit na grupo nin mga estudyante sa Bibliya na nakaistar harani sa Pittsburgh, Pennsylvania, sa Estados Unidos, an nagpuon kaidto nin sistematikong pag-adal sa Bibliya. Ikinumparar ninda an mga doktrina kan mga relihiyon sa kun ano talaga an itinutukdo kan Bibliya. An mga nanudan ninda ipinublikar ninda sa mga libro, peryodiko, asin sa magasin na inaapod ngunyan na An Torrengbantayan—Nagpapahayag kan Kahadian ni Jehova.

 Kaiba sa grupong iyan nin sinserong mga estudyante nin Bibliya si Charles Taze Russell. Siya an nanginot kaidto sa pagtutukdo nin Bibliya asin nagin inot na editor kan An Torrengbantayan, pero dai siya nagin founder nin bagong relihiyon. Katuyuhan ni Russell saka kan ibang Estudyante sa Bibliya, an apod sa grupo ninda kaidto, na ipalakop an mga katukduan ni Jesu-Cristo asin sunudon an ginibo kan mga Kristiyano kan inot na siglo. Huling si Jesus an Founder kan Kristiyanismo, siya an ibinibilang ming founder kan samong organisasyon.—Colosas 1:18-20.