Si Jesus Nagliligtas—Paano?
An simbag kan Bibliya
Ilinigtas ni Jesus an maimbod na mga tawo kan itao niya an saiyang buhay bilang atang na pantubos. (Mateo 20:28) Kaya, inapod kan Bibliya si Jesus na “Paraligtas kan kinaban.” (1 Juan 4:14) Sinabi man kaiyan: “Mayo nin kaligtasan paagi sa kiisay pa man, huli ta daing ibang ngaran sa sirong nin langit na itinao sa mga tawo na paagi kaiyan kita maliligtas.”—Gibo 4:12.
‘Nag-agi nin kagadanan si Jesus alang-alang sa gabos’ na nagtutubod sa saiya. (Hebreo 2:9; Juan 3:16) Dangan, “ibinangon siya nin Diyos hali sa mga gadan,” asin nagbalik si Jesus sa langit bilang espiritung linalang. (Gibo 3:15) Diyan, magigibo na ni Jesus na “iligtas nin lubos an mga minadulok sa Diyos paagi sa saiya, huling nagdadanay siyang buhay asin pirming yaon para makiulay para sa sainda.”—Hebreo 7:25.
Taano ta kaipuhan ta si Jesus na makiulay para sa sato?
Gabos kita nagkasala. (Roma 3:23) Binugtakan nin ulang kan kasalan an relasyon niyato sa Diyos, asin an resulta kaiyan kagadanan. (Roma 6:23) Pero si Jesus nagseserbing “parasurog” para sa mga nagtutubod sa saiyang atang na pantubos. (1 Juan 2:1, nota sa ibaba) Nakikiulay siya alang-alang sa sainda, na hinahagad sa Diyos na dangugon an saindang mga pamibi asin patawadon an saindang mga kasalan basado sa kagadanan ni Jesus bilang atang. (Mateo 1:21; Roma 8:34) Sinisimbag nin Diyos an mga pakiulay na iyan ni Jesus huling kauyon iyan kan Saiyang kabutan. Isinugo nin Diyos si Jesus sa daga “tanganing maligtas an kinaban paagi sa saiya.”—Juan 3:17.
An pagtubod sana daw ki Jesus an kaipuhan ta tanganing maligtas?
Bako. Dapat talaga kitang magtubod ki Jesus tanganing maligtas, pero bako sana iyan an kaipuhan. (Gibo 16:30, 31) Sinasabi kan Bibliya: “Kun paanong an hawak na daing espiritu gadan, an pagtubod man na daing mga gibo gadan.” (Santiago 2:26) Tanganing maligtas, dapat na:
Makanuod kita dapit ki Jesus asin sa saiyang Ama, si Jehova.—Juan 17:3.
Magtubod kita sa sainda.—Juan 12:44; 14:1.
Ipahiling ta an satong pagtubod paagi sa pagsunod sa saindang mga pagbuot. (Lucas 6:46; 1 Juan 2:17) Itinukdo ni Jesus na bako gabos na nag-aapod saiya na “Kagurangnan” ililigtas kundi an mga “naggigibo sana kan kabutan kan [saiyang] Ama na nasa langit.”—Mateo 7:21.
Padagos tang ipahiling an satong pagtubod sa ibong nin mga kasakitan. Idinuon iyan ni Jesus kan sabihon niya: “An makatagal sagkod sa katapusan maliligtas.”—Mateo 24:13.