Bushe walisanga uwalinga ukuba umwina mobe? Nga walimusanga, kuti waishiba shani ukuti uyo muntu alilinga ukuba umwina obe?

 Calicindama ukukanalolesha fye pa fyo umuntu amoneka. Na kuba, umukashana umusuma sana nalimo te kuti abe ne cishinka, nelyo umulumendo uwalumbuka sana, nalimo te kuti abe ne mibele isuma. Ufwile ukuupana no muntu uo utemenwe, uwaba nga iwe kabili uwatemwa ifyo ufwaya ukucita ku ntanshi.​—Ukutendeka 2:18; Mateo 19:​4-6.

 Ulingile ukubebeta bwino uo ulefwaya ukuupana nankwe. Lelo, ulingile ukucenjela pa kuti wibika amano ku fyo ulefwaya fye ukumona. Ulingile ukutekanya pa kuti wishibe bwino ifyo umuntu ulefwaya ukuupana nankwe aba.

 Abengi abeshishanya balolesha fye pa fyo uo balefwaya ukuupana nankwe amoneka. Balolesha fye pa fintu ifyo bonse batemwa, e lyo batila: “Inyimbo atemwa e sho na ine natemwa.” “Ifyo atemwa ukucita e fyo na ine natemwa.” “Tulomfwana muli fyonse!” Na lyo line, taulingile ukulolesha fye pa fyo umuntu aba. Ulingile ukubika amano ku kwishiba “ubuntu bwa mu kati.” (1 Petro 3:4; Abena Efese 3:16) Ukucila ukulabika fye amano ku fintu ifyo musuminishanyamo, kuti waishiba bwino ifyo umunobe aba nga ulebika amano ku fyo acita nga mwapusana muli fimo.

 Natulangilile, tontonkanya pa fyakonkapo:

•   Bushe uyo muntu acita shani nga mwapusana? Bushe afwaya fye ukucita ifyo atemenwe, ica kuti limo alaba ne “cipyu” nelyo ukulanda ifya “miponto”? (Abena Galatia 5:​19, 20; Abena Kolose 3:8) Nelyo bushe alaleka wacita ifyo ulefwaya pa kuti fye pabe umutende, cikulu fye tafipusene na mafunde ya kwa Lesa?​—Yakobo 3:17.

•   Bushe uyu muntu afwaya bambi ukukonka ifyo alefwaya fye? Bushe afwaya ukuti e o fye abe icibusa cobe? Bushe wa bufuba? Bushe alafwaya ukwishiba fyonse fye ifyo ulecita? Nikole atile: “Ndomfwa ukuti abeshishanya bamo bapusanina fye pa tuntu utunono. Ku ca kumwenako, umunankwe nga tamwebele uko ele. Ifya musango yu filanga fye apabuuta ukuti ku ntanshi kuti mwaisakwata amafya.”—1 Abena Korinti 13:4.

•  Bushe abantu bambi bamwishiba shani? Kuti cawama nga walanda na baishiba uyo muntu, pamo nga abakalamba abo aba nabo mu cilonganino. Nga wacita ifi kuti waishiba nampo nga ‘alashimikwa icisuma’ nelyo iyo.​—Imilimo 16:​1, 2.