Ifya mweo ifyo beta ukuti ama sea cucumber fikala pa nshi ya bemba na ku fimabwe fya korali ifyaba pali bemba. Inkanda ya ifi ifya mweo limo iba iyakalabana, iya mapumba, e lyo inshita shimo ilaba ne myunga. Iyi nkanda ilaaluka-aluka. Kuti yaba iyanakilila sana nge pula, nelyo kuti yaba iyakosa nge mbao mu mamineti fye ayanono nelyo mu masekondi. Ifi inkanda yaluka-aluka filalenga ama sea cucumber ukwingila pa milale iinono sana iya mu fimabwe, lyena inkanda ilakosa no kwikata sana ku mulale ica kuti nga kuli icili conse icilefwaya ukusansa ama sea cucumber, te kuti ciyakakatule. Icilenga fyonse ifi ni fintu inkanda ya ma sea cucumber yapangwa.

 Tontonkanyeni pali ici: Inkanda ya fya mweo beta ukuti ama sea cucumber kuti yaba iyakosa, iyakosako panono, nelyo iyanakilila. Ama sea cucumber yalekatanya nelyo ukulekanya imicincili iyaba mu nkanda yayako pa kuti ibe iyakosa, iyakosako panono, nelyo iyanakilila. Pa kuti inkanda ibe iyakosa nelyo iyanakilila, ama sea cucumber yabomfya ama proteins ayaba mu mibili yaiko ayalenga inkanda ukuba iyakosa nelyo iyanakilila.

 Ama proteins ayalenga inkanda ukuba iyakosa yalekatanya imicincili iyaba mu nkanda, kabili ici e cilenga inkanda ukuba iyakosa. Lyena ama proteins ayalenga inkanda ukuba iyanakilila yalalekanya imicincili iyaba mu nkanda, kabili ici e cilenga inkanda ukuba iyanakilila. Inkanda ya ma sea cucumber kuti yaba iyanakilila sana ica kutila kuti yalamoneka kwati ilesunguluka.

 Basayantisiti balafwaya ukupanga ifintu ifingala-aluka-aluka nga filya inkanda ya ma sea cucumber yaba. Cimo ico bafwaya kupanga ifyo babomfya pa kundapa amalwele ya kuli bongobongo ifyo beta ukuti ama electrodes, mu musango wa kutila fileba ifyakosa ilyo balefingisha muli bongobongo, lelo fileba ifyanakilila nga bafingisha muli bongobongo. Nga ca kuti bapanga ama electrodes ayengalabomba muli uyu musango, ninshi kuti baleundapa bwino sana amalwele ya kuli bongobongo.

 Muletipo shani? Bushe inkanda ya ca mweo beta ukuti sea cucumber iyaluka-aluka yaishilebako fye iine nelyo kwali uwaibumbile?