Yeremia 33:1-26
33 Kabili icebo ca kwa Yehova caishile kuli Yeremia umuku wa cibili, ninshi acili naisalilwa mu Lubansa lwa Balinshi,+ no kutila:
2 “Yehova Kalenga+ we sonde, Yehova Uwalipangile+ no kulipampamika,+ Yehova e shina lyakwe, atila,+
3 ‘Lilileni kuli ine, na ine ndemwasuka+ no kumweba ifintu ifikalamba ifyo mushingeluka kabili ifyo mushaishiba.’”+
4 “Pantu Yehova Lesa wa kwa Israele asosa pa mayanda ya muli uno musumba na pa mayanda ya shamfumu sha kwa Yuda ayakabongololwa pa mulandu wa cibumba ca maloba icakuulwa ukushinguluka umusumba na pa mulandu wa lupanga;+
5 pa bakalwa na bena Kaldi no kwisusha mu fifulo ifitumbi fya bantu abo nkepaya mu bukali bwandi na mu cipyu candi,+ na pa mulandu wa bonse abo nafisako icinso candi ku bubi bwabo muli uno musumba,+ ati,
6 ‘Moneni ndeposha umusumba no ku-upeela ubumi;+ kabili nkabondapa no kubapeela umutende uwingi ne cine.+
7 Kabili nkabwesha bankole ba kwa Yuda na bankole ba kwa Israele,+ kabili nkabakuula nga pa kutendeka.+
8 Kabili nkabasangulula ku filubo fyabo fyonse ifyalenga ukuti bamembukile,+ nkabelela pa filubo fyonse ifyalenga ukuti bamembukile na pa fyo bacita kuli ine.+
9 No musumba ukaba kuli ine ishina lya kusekelela,+ ukutasha ne ciyembo ku nko shonse isha pe sonde ishikomfwa ubusuma ubo nkabacitila.+ Kabili bakatiina+ no kututuma+ pa mulandu wa busuma bonse na pa mulandu wa mutende onse uo nkacitila umusumba.’”+
10 “Yehova atila, ‘Muli cino cifulo ico imwe mukalasosa amuti amatololo umushaba abantu kabili umushaba ifitekwa, mu misumba ya kwa Yuda na mu misebo ya Yerusalemu iyashala icibolya+ umushaba abantu kabilli umushaba ifitekwa, mukomfwika+
11 icongo ca kusekelela ne congo ca kusangalala,+ ishiwi lya kwa shibwinga ne shiwi lya kwa nabwinga, ishiwi lya baleti: “Lumbeni Yehova, Lesa wa mabumba, pantu Yehova musuma;+ pantu icikuuku cakwe ca muyayaya!”’+
“‘Bakaleta umutuulo wa kutootela mu ng’anda ya kwa Yehova,+ pantu nkabwesha bankole ba mu calo nga pa kutendeka,’+ e fyasosa Yehova.”
12 “Yehova Lesa wa mabumba atila, ‘Muli ici cifulo icashala icibolya umushaba abantu ne fitekwa+ na mu misumba ya ciko yonse mukaba impanga ya mulemfwe iya bacemi abalenga impaanga shabo ukuyolwela kulya.’+
13 “‘Mu misumba ya mu citungu ca mpili, mu misumba ya mpanga iyabatama+ na mu misumba ya ku kapinda ka ku kulyo+ na mu calo ca kwa Benjamini+ na mu ncende ishashinguluka Yerusalemu+ na mu misumba ya kwa Yuda,+ impaanga shikapita mwi samba lya maboko ya ulependa,’+ e fyasosa Yehova.”
14 “‘Moneni! Inshiku shileisa,’+ e fyasosa Yehova, ‘ilyo nkafikilisha amashiwi ayasuma ayo nasosa+ ku ba mu ng’anda ya kwa Israele+ na ku ba mu ng’anda ya kwa Yuda.
15 Mu nshiku shilya na pa nshita ilya, nkalenga umusambo uwalungama ukapuukile Davidi,+ kabili akacita umulinganya no bulungami mu calo.+
16 Mu nshiku shilya Yuda akapusuka+ na Yerusalemu akekala umutelelwe.+ Kabili akenikwa ati, Yehova E Bulungami Bwesu.’”+
17 “Pantu Yehova atila, ‘Takwakabulwe umuntu kuli Davidi uwa kwikala pa cipuna ca bufumu ica ba mu ng’anda ya kwa Israele.+
18 Kabili kuli bashimapepo abena Lebi, takwakabulwe umuntu ku cinso candi uwa kutuula umutuulo wa koca no wa kufutumuna icushi ca mutuulo wa ngano no wa kutuula ilambo lyonse.’”+
19 Ne cebo ca kwa Yehova caishile na kabili kuli Yeremia, no kutila:
20 “Yehova atila, ‘Imwe nga mwingatoba icipangano candi ica kasuba ne cipangano candi ica bushiku, ukuti kwiba akasuba no bushiku pa nshita ya fiko,+
21 ninshi kuti catobwa icipangano candi na Davidi umubomfi wandi+ kabili te kuti akwate umwana umwaume uwa kuteka pa cipuna cakwe ica bufumu;+ ne cipangano candi na bena Lebi bashimapepo, abamombela kuti catobwa.+
22 Filya fine ifya mu muulu fishingapendwa, nangu umucanga wa pali bemba,+ e fyo nkafusha na bana ba kwa Davidi umubomfi wandi na bena Lebi abamombela.’”+
23 Kabili icebo ca kwa Yehova cakonkenyepo ukwisa kuli Yeremia, no kutila:
24 “Bushe taumfwile ifyo aba bantu balesosa abati, ‘Bushe Yehova akakaana indupwa shibili isho asalile’?+ Kabili basaalula abantu bandi,+ pa kuti beba na kabili uluko mu menso yabo.
25 “Yehova atila, ‘Nga nshabikileko icipangano ca kasuba no bushiku,+ ne fipope fya muulu ne sonde,+
26 ninshi kuti nakaana abana ba kwa Yakobo na bana ba kwa Davidi umubomfi wandi,+ ukuti nibuula mu bana bakwe aba kuteka abana ba kwa Abrahamu, Isaki na Yakobo. Pantu nkalonganika bankole+ babo no kubabelela uluse.’”+
