IFYACITIKE UMWAKA WAPWILE
Ukupeela Yehova Amaofeshi ya Musambo
BAMUNYINEFWE ababa mu mulimo wa makuule mu Kyrgyzstan pamo nabafumine mu fyalo fimbi balibombeshe sana pa mwaka umo ne myeshi 6 ukuwamya no kukusha amaofeshi ya musambo mu musumba ukalamba uwa Bishkek. Bapeele aya maofeshi pa 24 October mu 2015 ilyo papitile fye umweshi umo ukutula apo bapwishishe uyu mulimo. Abantu ukucila pali 3,000 abali mu Mayanda ya Bufumu 18 e lyo na mu fifulo fimbi 5 balitemenwe sana ukukutika kuli iyi programu. Ba Stephen Lett aba mwi Bumba Litungulula e balandile ilyashi ilyakwete umutwe uusuma sana uwaleti, “Bombeleni Yehova no Mutima Onse.” Ubushiku bwakonkelepo, kwali programu na imbi iyakoseshe icitetekelo ca bakasabankanya abengi abakutikeko mu calo.
Umusambo wa ku Kyrgyzstan
Pa Cibelushi pa 14 May mu 2016, abantu 6,435 balisangilwe ku kupeela Yehova umusambo wa ku Armenia, Icikuulwa ca Kulonganinamo ukulongana kukalamba, e lyo na ifikuulwa fya Isukulu lya Bakabila ba Mbila Nsuma ya Bufumu. Umusambo wa ku Armenia waba pa ntuti 6 isha cikuulwa icisuma sana ica ntuti 18 umwikala abantu. Amalyashi ayali muli iyi programu yalelanda pa fyo Inte sha kwa Yehova batendeke panono panono ku Armenia. Umulimo wa Nte sha kwa Yehova watendekele na bena Armenia abaile mu kwikala ku America mu kutendeka kwa ba 1900, lyena icine cafikile mu Armenia muli ba 1970 ninshi icalo cicili citekwa no buteko bwa Soviet Union. Mu myaka ya nomba line, Inte sha kwa Yehova ku Armenia balilembeshiwe ku buteko kabili balipangile no musambo. Abengi abasangilweko kuli uku kulongana tabaleenekela ukumona ifisuma ifyacitike ku Armenia. Icawamishe pali uku kulongana ni lintu bonse abasangilweko basumine no mweo onse ukuti ba David Splane aba mwi Bumba Litungulula bapeele ifi ifikuulwa ifisuma nga nshi kuli Yehova.
Armenia
Pa muulu: Programu ya kupeela umusambo wa ku Armenia kuli Yehova
Pa kati: Bamunyina na bankashi bali pa kulongana kwaibela pa Mulungu
Pa nshi: Mu inshita ya cungulo, abena Armenia balecinda ifyo bacinda