ILYO Yesu akulileko no kwishiba ifyo acingililwe lintu ali akanya, bushe uletontonkanya ukuti alipepele kuli Yehova no kumutasha?— Cinshi uletontonkanya Yesu aebele Maria na Yosefe lintu aishileishiba ukuti balimupuswishe pa kumutwala ku Egupti?—

Kwena, Yesu te kanya nomba. Tekala pe sonde nga fintu cali inshita imo. Bushe walimona ukuti na nomba abantu bamo bamoneka ukutontonkanya ukuti Yesu acili akanya mu mulimba?— Ici cilamoneka pa nshita ya Krisimasi lintu mu ncende ishingi muba ifikope fya kwa Yesu nga kanya.

Nangu ca kuti Yesu taba pe sonde, bushe walisumina ukuti eko aba?— Abuushiwe ku bafwa, kabili nomba aba ni Mfumu ya maka ku muulu. Cinshi uletontonkanya engacita ku kucingilila abamubombela?— Lintu Yesu ali pe sonde, alangile ifyo engacingilila abamutemwa. Natumone ifyo acitile ico bushiku bumo ilyo ali mu bwato na basambi bakwe.

Cili cungulo. Yesu asambilishe kasuba konse mupepi na Bemba wa Galili,  uwaba cishiba cikalamba ica bakilomita 20 mu butali na bakilomita 12 mu bwipi. Nomba aeba abasambi bakwe ati: “Natwabukile kwi shilya lya bemba.” E co bapatama mu bwato no kutendeka ukwabuka bemba. Yesu nanaka sana, e co aya ku numa ya bwato no kulambalala. Bwangu bwangu apona na mu tulo.

Abasambi bena balelola pa kuti baleoba ubwato. Fyonse fili fye bwino pa kubala, lelo kwaisa icipuupu. Capuupa na maka sana, na mabimbi yalakulilako. Amabimbi yatendeka ukwingila mu bwato, no bwato bwatendeka ukwisulamo amenshi.

Abasambi batiina ukuti balabunda. Lelo Yesu taletiina. Acili nalala ku numa ya bwato. Abasambi basuka bamushibusha, no kutila: ‘Mwe Kasambilisha, mwe Kasambilisha, tupususheni, twalafwa kuli ci cipuupu.’ Ilyo line, Yesu abuuka no kulanda ku mwela na mabimbi. Atila “Ba tondolo, talala.”

Ilyo line umwela waleka ukupuupa, na bemba atalala. Abasambi bapeshiwa  mano. Tababala monapo ica musango yu. Batendeka ukusoshanya ati: ‘Nga kanshi uyu ni ani, apo aeba ne myela na menshi, na fyo fyamumfwila?’—Luka 8:22-25; Marko 4:35-41.

Bushe Yesu walimwishiba?— Bushe nawishiba uko afumya aya maka yakalamba?— Abasambi tabalekabila ukuba no mwenso pantu Yesu ali na bo, kabili Yesu tali muntuuntu fye. Alecita ifya kupapusha ifyo abantu bambi bashingacita. Leka nkushimikileko cimbi ico acitile pali bemba ilyo kwali icipuupu.

Ni pa bushiku bumbi, pa numa ya ifi tulandilepo. Ilyo caba icungulo, Yesu aeba abasambi bakwe ukunina ubwato no kumutangilila kwi shilya. Lyene Yesu aya ku lupili eka. Ni ncende ukushaba congo uko engapepa kuli Wishi, Yehova Lesa.

Abasambi banina ubwato no kutendeka ukwabuka bemba. Lelo tapakokwele icipuupu catendeka ukupuupa. Capuupa na  maka sana. Nomba bwasuka bwaila. Aba baume baisha amatanga no kutendeka ukooba ubwato. Lelo ubwato tabuleenda sana pantu icipuupu cilefuma uko baleya. Ubwato bulepungaila mu mabimbi yakalamba, na menshi yaleingila. Aba baume babombesha ukuti bafike ku mulundu, lelo bafilwa.

Yesu acili eka ku lupili. Inshita ikalamba yapita ukutula apo eliile ku lupili. Lelo nomba amona ukuti abasambi bakwe bali mu bwafya ku mabimbi yakalamba. E co atentemuka ulupili no kuya ku lulamba lwa bemba. Yesu alefwaya ukwafwa abasambi bakwe, e co atendeka ukwenda pali bemba ninshi kuli icipuupu!

Cinshi cingacitika nga waesha ukwenda pa menshi?— Kuti waibila, kabili kuti wanwena. Lelo Yesu taba nga ifwe. Alikwata amaka yaibela. Yesu aenda intamfu iitali ku kuyafika ku bwato. E co lilya buleca e lyo abasambi bamona Yesu aleisa pa menshi. Lelo bafilwa ukusumina ifyo bamona. Batiina sana, kabili bapunda no mwenso. Lyena Yesu abeba ati: “Tekeni imitima; ni ne; mwitiina.”

Ilyo line fye Yesu apatama mu bwato, icipuupu caleka. Abasambi na kabili bapeshiwa mano. Bawa ku makasa ya kwa Yesu no kutila: “Cine cine ni mwe Mwana Lesa.”—Mateo 14:22-33; Yohane 6:16-21.

Bushe nga tacaweme ukubako ilya nshita no kumona Yesu alecita ifintu fya musango yu?— Bushe walishiba umulandu Yesu acitile ifyo fipesha mano?— Alecite fi pantu atemenwe abasambi bakwe kabili alefwaya ukubafwa. Lelo umulandu na umbi alecitile fi fipesha mano wa kulanga amaka yakalamba akwete kabili ayo akabomfya ku ntanshi nga Kateka wa Bufumu bwa kwa Lesa.

Na lelo, ilingi Yesu alabomfya amaka yakwe ku kucingilila  abakonshi bakwe ku milimo ya kwa Satana iya kufwaya ukubalesha ukwebako bambi pa lwa Bufumu bwa kwa Lesa. Lelo Yesu tabomfya amaka yakwe ku kucingilila abasambi bakwe ku kulwala nelyo ku kubaposha lintu balwala. Na batumwa bonse aba kwa Yesu mu kupita kwa myaka balifwile. Yakobo munyina Yohane alipaiwe, na Yohane abikilwe mu cifungo.—Imilimo 12:2; Ukusokolola 1:9.

E fyo caba na lelo. Nampo abantu balabombela Yehova nelyo iyo, bonse balalwala no kufwa. Lelo nomba line, mu kuteka kwa kwa Yesu nge Mfumu ya buteko bwa kwa Lesa, ifintu fikaaluka. Pali ilya nshita takwakabe uwa kuba no mwenso, pantu Yesu akabomfya amaka yakwe ku kunonsha bonse abamumfwila.—Esaya 9:6, 7.