Baibolo itila: “Pa kutendeka Lesa apangile umuulu e lyo ne sonde.” (Ukutendeka 1:1) Baibolo tayalanda pa fyo cali ilyo Lesa alebuumba ifintu fyonse. Kanshi nampo nga kwali icapuulike nelyo takwali icapuulike pa kuti kube umuulu ne sonde, kuti twacetekela ukuti ifyo Baibolo ilanda fya cine. Nga ca kuti ca cine kwali icapuulike, ninshi amashiwi ayaba pa Ukutendeka 1:1 yatweba fye uwalengele cipuulike.

Basayantisti abengi basumina ukuti kwaliba icintu icapuulike fye iciine ukwabula ukwenekela. Batila mu kuya kwa nshita ilyo ici capuulike, ifintu fimo fyasangwike intanda na maplaneti. Baibolo tailanda ukuti ifi e fyacitike. Nampo nga kwali icapuulike nelyo kwali inshila imbi iyo Lesa abomfeshe pa kubumba ifintu, icishinka ca kuti Lesa e wabumbile umuulu ne sonde.

“Pa kutendeka Lesa apangile umuulu e lyo ne sonde.”—Ukutendeka 1:1.

Ee. Baibolo itila Lesa apangile ifintu fyonse “mu misango ya fiko.” (Ukutendeka 1:11, 12, 21, 24, 25) Bushe ifya mweo ifya musango umo wine kuti fyaleka ukumoneka ifyo fyalemoneka? Ee. Nomba, bushe ilyo ifi ifya mweo ifya musango umo wine fyaleka ukumoneka ifyo fyalemoneka, filanga ukutila mu kuya kwa nshita kuti fyasanguka ifintu fimbi? Awe.

Tontonkanyeni pali ici: Muli ba 1970, abafwailisha pa fintu balifwailishe pa tuni uto beta ati finches utwaba pa fishi fya Galápagos. Basangile ukuti utu utuni, maka maka utwakwata imilomo iikulu, tatufwa sana nga ca kuti imiceele ilealukaaluka. Abantu bamo batile ifi utu tuni twaba, cilanga fye ukuti ifya mweo filasanguka. Nomba bushe ca cine utu utuni tulasanguka nelyo bushe tuleka fye ukumoneka ifyo twalemoneka nga ca kuti imiceele yayaluka? Mu kuya kwa nshita, utuni utwakwete imilomo iinono e twafulile sana. Ifi ifyacitike fyalengele ba Jeffrey H. Schwartz, abasambilila sana, ukulanda ukuti, nangu ca kuti utu utuni twalilekele ukumoneka ifyo twalemoneka pa mulandu wa kwaluka kwa micele, “ici tacalola mu kuti utu utuni twalisangwike mu tuni tumbi.”

Baibolo itila ‘[Lesa ] e wabumbile ifintu fyonse.’ (Ukusokolola 4:11) Lesa “atuushishe” ilyo apwile ukubumba ifintu. (Ukutendeka 2:2) Ici cilolele mu kuti: Lesa tapangile icintu cimo e lyo atendeka ukutuusha nelyo ukulolela pa kuti nga papita imyaka iingi ico cintu cikasanguke mu fintu ifyalekanalekana pamo nga isabi, bakolwe e lyo na bantu. * Ici icisambilisho ca kuti ifintu fyasangwike fye, cilalenga abantu balekaana ukuti Kabumba, uo Baibolo yalandapo, e wapangile “umuulu ne sonde, bemba na fyonse ifyabamo.”—Ukufuma 20:11; Ukusokolola 10:6.

“Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse.”—Ukusokolola 4:11.

Ishibilenipo na fimbi: Baibolo itila “imibele yakwe [Lesa], ukutula fye apo abumbile umuntu, bailukila ku fyo abumba.” (Abena Roma 1:20) Ukusambilila pali Lesa kuti kwalenga twaba ne nsansa pantu Lesa afwaya ukuti ifintu filewamina abantu bonse abamufwaya. (Lukala Milandu 12:13; AbaHebere 11:6) Nga mulefwaya ukwishibilapo na fimbi, kuti mwaipusha Inte sha kwa Yehova nelyo kuti mwaya pa www.ps8318.com/bem. Kabiyeni apo balemba ati AMASAMBILISHO YA MU BAIBOLO > AMASUKO KU MEPUSHO YA MU BAIBOLO.