PA Cibelushi pa 25 April mu 2015, ku Nepal kwali icinkukuma icikalamba sana. Nepal calo umwaba sana impili icaba mupepi ne calo ca India. Uko icinkukuma cacitikiile kwalepele amakilomita 80, ukufuma ku musumba ukalamba uwa Kathmandu. Ku ca bulanda, abantu 8,500 balifwile, kabili pa tuyofi tonse umo bapendele abantu abafwile, ici icinkukuma e caipeye sana abantu abengi. Amayanda ukucila pali 500,000 yalyonaike. Mu Nepal mwaba Inte sha kwa Yehova 2,200, kabili abengi baleikala muli iyi ine incende umwali icinkukuma. Icabipile ca kuti Nte umo na bana bakwe babili balifwile.

Ba Michelle ni Nte ya kwa Yehova kabili batile: “Icinkukuma cacitiike ninshi ba Nte abengi muli iyi incende balelongana. Acicitika pa nshita ilyo ba Nte abengi baali pa ng’anda, abengi nga balifwile nelyo ukucenekwa.” Cinshi calengele abalelongana bapusuke? Ifyo balekuula Amayanda ya Bufumu e fyalengele bapusuke.

Amayanda ya Bufumu mu Nepal batendeka ukuyakuula mu nshila ya kuti teti yabongoloke nangu kwaba icinkukuma. Ba Man Bahadur, abakuulako Amayanda ya Bufumu batile: “Abantu baletwipusha ico twalepangila umufula uwakosa sana nangu ca kuti tulekuula fye Ing’anda ya Bufumu iinono. Nomba e lyo twamona ifyo ukucita ifi kwawamine.” Ilyo icinkukuma capitile, balisuminishe ukuti abantu baleikalako mu Mayanda ya Bufumu. Nangu ca kuti kwali ifinkukuma ifinono ilyo Icinkukuma icikalamba capitile, Inte sha kwa Yehova e lyo na bantu bambi abaile mu Mayanda ya Bufumu balicingililwe.

Baeluda mu filonganino fya Nte sha kwa Yehova balitendeke ukufwaya aba mu filonganino fyabo abo bashamwene. Ba Nte na bambi, ba Babita batile, “Baeluda baleibika mu kapoosa mweo pa kuti fye basakamane aba bwananyina mu filonganino. Ifyo batulangile ukutemwa fyalitufikile pa mutima.” Ilyo papitile ubushiku bumo ukutula apo icinkukuma capitiile, bamunyinefwe ababa muli Komiti yangalila umulimo wa Nte sha kwa Yehova mu Nepal na bakangalila ba miputule nelyo abatandalila ifilonganino, balitendeke ukuya mu filonganino pa kuti bamone ifyo aba bwananyina balekabila na pa kuti bafwilishe baeluda ba muli iyi incende.

Ilyo papitile inshiku 6 ukutula apo icinkukuma cacitikiile, ba Gary Breaux, ababombela pa maofeshi yakalamba aya Nte sha kwa Yehova ku America e lyo na bena mwabo ba Ruby, balile ku Nepal. Ba Reuben ababa muli komiti tulandilepo kale batile, “Apo abantu balipelenganishiwe kabili kwali ne finkukuma ifinono mu Kathmandu pa numa ya ici icinkukuma, twalemona kwati munyinefwe Breaux akafilwa ukwisa. Na lyo line, ba Breaux balefwaisha ukwisa kabili balishile. Inte sha kwa Yehova kuli iyi incende balitashishe sana pali ifi babatandalile.”

Ba Silas ababomba pa maofeshi ya Nte sha kwa Yehova mu Nepal batile: “Ilyo fye amafoni yesu yatendeke ukubomba, abantu balitendeke ukututumina amafoni akasuba no bushiku. Inte sha kwa Yehova mwi sonde lyonse balitubikileko sana amano. Nangu ca kuti tatwaleumfwa indimi bambi balelanda, twalimwene  ifyo batutemwa ne fyo balefwaisha ukutwafwa.”

Pa numa ya cinkukuma, ba Nte baletwala ifya kulya ku Mayanda ya Bufumu pa nshiku ishingi pa kuti abantu abashakwete ifya kulya balelyako. Na kabili, ba Nte balipangile Komiti Iyafwilisha Abasanshilwe, kabili ubwafilisho bwalitendeke ukwisa maka maka ukufuma ku Bangladesh, ku India, na ku Japan. Mu nshiku fye ishinono, ibumba lya ba Nte abaishiba ifya kundapa abalwele, balishile ukufuma ku Europe kabili balitendeke ukundapa abantu pa Ng’anda ya Bufumu. Batendeke ukubomba ilyo bafikile fye kabili tabaleundapa fye abalwele, lelo balesansamusha na baali sana no bulanda.

Ba Uttara balilandile ifyo abengi baleumfwa ilyo batile: “Icinkukuma calibipile sana kabili calituletele umwenso. Nomba ilyo papitile inshita, twalikatene sana na ba bwananyina ukucila ifyo twaikatene nabo kale.” Icinkukuma tacalengele abantu ba kwa Yehova baleka ukutemwana no kutemwa Yehova, lelo calengele ukutemwa kwabo kukoseleko.