Pa myaka iingi, tapali uwaishibe ifyo amalwele yambukila abantu, ne ci calengele kuleba ifikuko ifyaleipaya abantu abengi nga nshi. Mu kuya kwa nshita, basayantisti balishibe icine pa fyo amalwele yambukila. Basangile ukuti utushiishi e tuleta amalwele ayengi ayo abantu balwala. Ukwishiba ici icishinka kwalilenga abantu abengi ukulaikala imyaka iingi no kuba no bumi ubusuma pantu balishiba ifya kucita pa kuicingilila ku malwele ne fya kundapa amalwele ayengi.

Bushe kwaliba ifintu na fimbi ifyacindama ifyo tulingile ukwishiba? Bushe ukwishiba amasuko ya cine ku mepusho yakonkapo kuti kwamwafwa shani?

• Bushe Lesa nani?

• Bushe Yesu Kristu nani?

• Bushe Ubufumu bwa kwa Lesa ni cinshi?

• Finshi fikacitika ku ntanshi?

Abantu abengi balisanga amasuko kuli aya amepusho kabili baliba ne nsansa sana. Na imwe bene kuti mwaba ne nsansa nga mwaishiba amasuko kuli aya mepusho.

Nalimo mulatwishika nga ca kutila kuti mwaishiba amasuko ya cine ku mepusho yonse. Pantu na kuba cimoneka kwati abantu abengi cilabakosela ukwishiba icine. Mulandu nshi?

Abantu abengi tabacetekela ifilanda aba mu buteko, aba makwebo, nelyo aba ku milabasa. Cilabakosela ukwishiba nga ca kuti ifyo umuntu alelanda fya cine, nga ca kuti nashako ifishinka fimo mu fyo alelanda, nga ca kuti alelanda fye ifyo aletontonkanya nelyo nga ca kuti alebepa. Ici calilenga abantu abengi balekaana ukumfwila ifyo babeba nangu ca kuti fya cine, kabili inshita shimo balafilwa fye no kulekanya icine ku bufi.

Nangu ca kuti ifi twalandapo kuti fyalenga camukosela ukwishiba icine, kuti mwaishiba amasuko ya cine ku mepusho yacindama. Kuti mwayeshiba shani? Kuti mwaishiba icine nga mulecita ifintu fimo ifyo mucita pa kusanga amasuko ku mepusho yambi.

Nalimo mulafwaya icine pali fimo cila bushiku. Tontonkanyeni pa fyo ba Jessica balandile, batile: “Umwana wandi umukashana alalwala sana nga alya ifya kulya umuli imbalala, ica kuti ne fya kulya umuli fye imbalala ishinono kuti fyamwipaya.” Kanshi ba Jessica balafwailisha pa kuti beshibe nga ca kuti ifya kulya baleshitila umwana wabo tamuli imbalala. Balandile ukuti: “Ico mbalilapo ukucita kubelenga ifyo balembele pa fya kulya ndefwaya ukushita pa kuti imone nga muli imbalala. Lyena ndafwailisha nelyo ukutumina abapangile ifyo ifya kulya pa kuti nshininkishe ukuti ilyo balepanga ifyo ifya kulya tamwaponene imbalala. Cimbi ico ncita, kufwailisha ifishinka pa fyo kampani ipanga ifya kulya ndefwaya ukushita yaishibikwa.”

Nalimo ifintu mufwailishapo pa kuti mwishibe icine tafyacindama sana nga ifya ba Jessica. Na lyo line, kuti mwaishiba icine pa cintu icili conse nga mulecita ifyo ba Jessica bacita:

• Muleishiba ifishinka.

• Mulefwailisha.

• Muleshininkisha ukuti ifyebo mwasanga pali fimo fya cine.

Ukucita ifi twalandapo kuti kwamwafwa no kusanga amasuko ya cine ku mepusho yacindama. Kuti kwamwafwa shani?

Pa kwishiba icine icaba mu Baibolo, ba Jessica balefwailisha nga filya fine bacita nga baleshitila umwana wabo ifya kulya. Ba Jessica batile, “ukubikako sana amano ilyo ndebelenga Baibolo e lyo no kufwailisha, kwalingafwa ukwishiba icine icaba mu Baibolo.” Nga filya ba Jessica bacitile, abantu abengi balisanga amasuko ya cine mu Baibolo ku mepusho yakonkapo:

• Mulandu nshi twabela pano calo?

• Bushe umuntu aba shani nga afwa?

• Mulandu nshi tuculila?

• Finshi Lesa acita pali ino nshita pa kuti akafumyepo amafya tukwata?

• Finshi twingacita pa kuti tube ne nsansa mu lupwa?

Kuti mwasanga amasuko ya cine kuli aya mepusho na ku mepusho yambi nga ca kuti mulebelenga Baibolo e lyo no kufwailisha ifyebo pa webusaiti ya www.ps8318.com/bem.