Umulandu Tulingile Ukusuminina Muli Lesa

ICITABO ca cina Korea ica 31 Reasons Why Young People Leave the Church (Imilandu 31 Iilenga Abacaice Ukuleka Ukuya ku Calici) citila abengi balaleka ukuya ku calici pantu tabasanga ifyasuko fyakumanina ku fipusho fyabo. Ku ca kumwenako, bepusha abati, ‘Mulandu nshi abantu abasumina muli Lesa baculila?’ kabili ‘Mulandu nshi tulingile ukusuminina fyonse ifyo basambilisha ku calici ilyo ifingi fitupelenganya fye nelyo ukuipilika?’

Abengi balikalifiwa ku fyasuko fya bashimapepo kabili batontonkanya ukuti mu Baibolo tamwaba ifyasuko ku fipusho fyabo. Lintu shimapepo alondolola ifintu ukulingana ne fyo aletontonkanya, balafilwa ukumfwikisha, kabili balasuula Lesa na Baibolo.

Ifyo e fyacitike kuli baAbel, abakushiwe mwi calici lya Lutheran mu South Africa. Bebukisha kuti: “Ku calici baletusambilisha ati ni Lesa e ‘usenda’ bonse abafwa. Lelo nalifililwe ukumfwikisha umulandu Lesa wa kutemwa ‘asendela’ abafyashi no kusha abana babo beka. Ku mushi uko nakulile, tatwaleipaya inkoko ukufikila utwana twakula. Nga twasanga ukuti ing’ombe ili mupepi no kukwata umwana, twalelolela ukufikila umwana asumuka e lyo twaipaya. Nomba nshaumfwikishe umulandu Lesa wa kutemwa ena ashalelangulukilako abantu.”

BaAram, abena Canada, nabo bene baletontonkanya nga baAbel. Bashimika ati: “Lintu nali ne myaka 13, batata balifwile. Pa cililo, shimapepo uwaishibikwa sana alondolwele kuti Lesa alefwaya batata bafwe pa kuti bapalamine kuli wene mu muulu. Atile ‘Lesa alasenda abantu basuma ku muulu pantu alitemwa  abalungama.’ Nshaumfwikishe umulandu Lesa engabela uwaitemwa ifyo.”

Mu kupita kwa nshita, bonse babili baAbel na baAram bakumene ne Nte sha kwa Yehova, balisambilile Baibolo, kabili, balisangile ne fyasuko ku fipusho fyabo. Balitemenwe Lesa no kuba ne citetekelo cakosa muli wene. Lyene baliipeele kuli Yehova no kuba ababomfi bakwe aba cishinka.

Ukwishiba Kwine Kwine Kwalicindama pa Kusumina Muli Lesa

Cinshi twingasambililako kuli fi fyacitike? Fitusambilisha ukuti ukwishiba Baibolo bwino bwino kwalicindama pa kuti umo asumine muli Lesa. Umutumwa Paulo aebele Abena Kristu ba mu musumba wa kale uwa Filipi ati: “Ici e co ntwalilila ukupepela, ukuti ukutemwa kwenu kufule nga nshi pamo no kwishiba kwine kwine no kwiluka konse.” (Abena Filipi 1:9) Pano umutumwa Paulo akomailapo ukuti ukutemwa Lesa na basumina benensu kwalyampana no kwishiba Lesa bwino bwino no kwiluka icaba ukufwaya kwakwe.

Ici nacilinga, pantu nga tulefwaya ukucetekela umuntu pa kubala tuleshiba uyo muntu e lyo twamucetekela, kabili tucetekela sana abo twaishibisha. Kanshi ukwishiba kwine kwine kulakabilwa pa kuti umo engasumina muli Lesa. Paulo atile: “Icitetekelo kwenekela kwashininkishiwa ukwa fintu ifilesubilwa, e bushininkisho bwa fintu fya cine cine nangu fishilamoneka.” (AbaHebere 11:1) Ukusumina muli Lesa ukwabula ukwishiba Baibolo bwino bwino kuti twakupashanya ku ng’anda iyakuulilwa na mapepala. Nga baipuutako fye panono kuti yawa.

Ukusambilila Baibolo kuti kwamwafwa ukusanga ifyasuko ku fipusho nga filya fyapeseshe amano baAbel na baAramu, pamo nge cipusho citila, Mulandu nshi abantu bafwila? Baibolo ilondolola ukuti “ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Abantu balakota no kufwa, te pa mulandu wa kuti Lesa alabasenda pa kuti baleikala na wene, lelo ni pa mulandu wa kuti Adamu alibembwike. (Ukutendeka 2:16, 17; 3:6, 17-19) Na kabili, Baibolo yalisokolola isubilo lya cine cine ilyo Yehova Lesa atambika. Ukupitila mu Mwana wakwe, Yesu Kristu, Lesa alibikako isubilo lya kubuuka kwa bantu ababembu.—Yohane 5:28, 29; Imilimo 24:15.

Pa kutwafwa ukumfwikisha icine pa lwa kubuuka, Baibolo yalikwata ifya kumwenako ifingi ifya bantu abo Yesu abuushishe ku bumi na kabili. (Luka 7:11-17; 8:40-56; Yohane 11:17-45) Ilyo mulebelenga ifi fyalembwa, moneni ukusekelela ne nsansa shali na balupwa ne ifibusa fya babuushiwe. Moneni na kabili ukuti balitendeke ukulumbanya Lesa no kutetekela muli Yesu.

Ukwishiba kwine kwine pali Lesa no bufwayo bwakwe kuti kwalenga abantu ukucita cimo cine na leelo. Abengi balipelenganishiwapo, ukucushiwa ku muntontonkanyo, kabili no kupunushiwa fye ku fipusho fyacindama ifyo bafililwe ukusanga ifyasuko fyakumanina. Lelo lintu balesambilila Baibolo, balisangile ifyasuko, kabili fyalyalwile ubumi bwabo umupwilapo.

Ukutemwa Lesa E Mulandu Ukalamba Ulenga Tulemubombela

Pa mbali ya kwishiba Lesa bwino bwino, kwalibako na fimbi ifikabilwa pa kuti umo engalamumfwila no kumubombela. Ilyo Yesu bamwipwishe pa lwe funde likalamba ilya kwa Lesa, atile: “Uletemwa Yehova Lesa obe no mutima obe onse, no mweo obe onse, no kutontonkanya kobe konse, na maka yobe yonse.” (Marko 12:30) Nga umuntu atemwa Lesa nga fintu Yesu alangilile, akaba uwaitemenwa ukumfwila Wene no kumubombela. Bushe imwe e fyo mucita?

BaRachel, ababomba pa myaka iingi nga bamishonari mu Korea, balanda umulandu batetekela muli Lesa, abati: “Ndatontonkanya pali bukapekape bwa kwa Yehova ku fibumbwa fyakwe, ifyo alekelela abantu bakwe, kabili na fintu afwaisha ukuti tuleinonsha fwe bene pa  kutulenga ukwishiba ifyo afwaya kuli ifwe. Fyonse ifi filanenga ukuti ntemwe Lesa sana. Kabili uko kutemwa kulanenga ukumubombela.”

BaMartha, bamukamfwilwa abekala ku Germany, balibombela Yehova pa myaka 48. Batila: “Mulandu nshi mombela Yehova? Pantu nalimutemwa. Lyonse icungulo ndalanda na Yehova mwi pepo. Ndamutasha sana pa fya bupe ampeela, sana sana pe lambo lya cilubula.”

Ca cine, ukutemwa Lesa kulatulenga ukumubombela no mutima onse. Lelo ni shani fintu umuntu engaba no kutemwa kwa musango uyo? Ukutasha pa kutemwa Lesa atulangisha e kutucincisha sana ukumutemwa. Moneni ifyo Baibolo itucinkulako: “Uushitemwa taishiba Lesa, pantu Lesa kutemwa. Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka ukwisa pano calo ukuti tube no bumi muli wene. Uku e kutemwa, te mu kuti ni fwe twatemenwe Lesa, lelo ni mu kuti wene e watutemenwe no kutuma Umwana wakwe ku kuba ilambo lya kukonsolwela imembu shesu.”—1 Yohane 4:8-10.

Bushe mwalishiba ukuti uku kutemwa kukalamba? Elenganyeni ukuti mulenwena mu mulonga wa mukuku. Lyene umuntu umo abika ubumi bwakwe mu busanso pa kuti amupusushe. Teti mulekepo fye, lelo kuti mwamutasha apakalamba. Kabili mu kuitemenwa kuti mwamucitila icili conse. Ukutemwa uko Lesa alangisha pa kutupeela Umwana wakwe, Yesu Kristu, nge lambo lya cilubula kwalicilapo. (Yohane 3:16; Abena Roma 8:38, 39) Ukutemwa kwa kwa Lesa nga kwafika pa nshi ya mutima wenu, kukamucincisha ukumutemwa no kumubombela no mutima onse.

Amapaalo Pali Nomba na ku Ntanshi

Nangu ca kuti ukutemwa Lesa e kwacindamisha pa kucita ubufwayo bwakwe, cilatusansamusha pa kwishiba ukuti Lesa alalambula abamubombela. Umutumwa Paulo atile: “Ukwabula icitetekelo te kuti ateemunwe, pantu  uupalamina kuli Lesa afwile ukusumina ukuti e ko aba no kuti aba kalambula wa bamufwaisha.”—AbaHebere 11:6.

Abantu abatemwa Lesa no kumubombela alabapaala icine cine. Abengi abakonka ifishinte fya mu Baibolo balaba no butuntulu busuma ubwa bumi. (Amapinda 23:20, 21; 2 Abena Korinti 7:1) Abakonka ifishinte fya mu Baibolo ifilanda pa bufumacumi no kubombesha balacetekelwa ku babengisha incito ica kuti ilingi line tababatamfya incito. (Abena Kolose 3:23) Ilyo bacetekela Yehova, ababomfi ba kwa Lesa tababa na masakamika nangu ni lintu bale-eshiwa. (Amapinda 28:25; Abena Filipi 4:6, 7) Na kabili, balolela amapaalo ya bumi bwa muyayaya muli Paradise wa pe sonde.—Amalumbo 37:11, 29.

Bushe abantu abo Yehova abapaala bayumfwa shani pali wene? BaJacqueline, Abena Kristu abekala ku Canada, balanda ifyo batasha Lesa abati: “Lyonse alatupeela ifya bupe fisuma. Na kabili alibikako isubilo lya cine cine ilya bumi bwa muyayaya.” BaAbel, abalandilwepo na pa kubala, balondolola ifyo bayumfwa, batila: “Isubilo lya kwikala pe na pe muli paradise pe sonde nshatalile lyumfwapo. Nomba e lyo ndolela. Lelo, nangu ca kuti takwali Paradise, mu nsansa nga nalilangile ukuti nalitemwa Lesa ukupitila mu kumubombela.”

Na Imwe Bene Kuti Mwakwata Icitetekelo Muli Lesa

Baibolo itila: “Yehova wa milalo, uulungiko kupingula, uulabule mfyo no mutima.” (Yeremia 11:20) Ca cine, Yehova alaceeceeta ifyabelama mu mitima yesu. Umuntu onse alingile ukuiceeceeta pa kuti engeshiba umulandu asuminina muli Lesa. Akale, limbi fisumino fya bufi ne fyo twaletontonkanya pali Lesa e fyalelenga ati tulelufyanya. Lelo ukwishiba Baibolo bwino bwino kuti kwatulenga ukuba ifibusa fya kwa Kabumba, Yehova Lesa.—1 Timote 2:3, 4.

Inte sha kwa Yehova shilafwilisha abantu ukwishiba Lesa bwino bwino pa kubasambilisha Baibolo mu mayanda yabo apa fye. (Mateo 28:20) Abantu abengi abasumina ukubaafwa nomba balitemwa Lesa no kumutetekela icine cine. Ukupitila mu kusambilila Baibolo, balinonka “amano no bupanda,” kabili yalabaafwa ‘ukwenda umutelelwe’ muli shino nshiku sha masanso. (Amapinda 3:21-23) Ne cacindamisha, balikwata isubilo “lyashininkishiwa kabili ilyaikashiwa” ilya ku ntanshi. (AbaHebere 6:19) Na imwe bene kuti mwakwata icitetekelo cine cine no kuipakisha amapaalo.

[Akabokoshi pe bula 6]

Ifipusho fya Kupelenganya Ifikabila Ukwasukwa

“Ilyo nalesambilila ifya budokota mu cipatala, nalemona abantu abasuma baleteta no kukalipwa pa mulandu wa malwele na masanso. Lesa nga e ko aba, mulandu nshi ifi fintu ficitikila? Bushe imipepele yaba fye ni nshila iya kupwishishamo amasakamika?”—Uwalepepa kale kwi calici lya Presbyterian mu South Korea.

“Ilingi line nalefwaisha ukwishiba nampo nga batata, abakunkwime ku bwalwa, baaya ku helo nelyo ku muulu. Naletiina abafwa kabili nali no mwenso wa kuya ku helo. Nshaleumfwikisha umulandu Lesa wa kutemwa engabikila umuntu mu helo pa kuti alecula fye ku ciyayaya.”—Uwali kale Katolika mu Brazil.

“Bushe cinshi cikacitikila isonde na bantu ku ntanshi? Bushe abantu bakalaikala shani ku ciyayaya? Bushe abantu bakaba shani no mutende wa cine cine?”—Uwali kale Katolika mu Germany.

“Icisambilisho ca kufyalwa cipya cipya mu mubili umbi tacalimo bupilibulo kuli ine. Inama tashipepa, nomba nga ca kuti wafyalilwa mu nama pa mulandu wa membu wacitile, kuti walungika shani ifilubo pa kuti ufume muli yo mibele?”—Uwali kale umuHindu mu South Africa.

“Nakuliile mu lupwa lwa baConfucian, kabili na ine nalesefyako mu kupepa ifikolwe. Lintu twalepekanya amatebulo ya kupeelelapo amalambo no kukontamina pa nshi, naletwishika nampo nga ifikolwe fyafwa fyaleisa mu kulya ifya kulya no kumona uko twalefishinshimuna.”—Uwali kale umuConfucian mu Korea.

Bonse aba basangile ifyasuko ku fipusho fyabo ilyo basambilile Baibolo ne Nte sha kwa Yehova.