Bushe Yesu E Lesa Wa Maka Yonse?
Bushe Yesu E Lesa Wa Maka Yonse?
Abengi basuka ati:
◼ “Ee, Yesu e Lesa Wa Maka Yonse.”
◼ “Yesu ni Lesa uwaishileba umuntunse.”
Cinshi Yesu asambilishe?
◼ “Nga mwalintemwa, nga mwasekelela ukuti ndeya kuli Tata, pantu Tata mukalamba pali ine.” (Yohane 14:28) Yesu atile ena na Wishi tabalingana.
◼ “Ndeya kuli Tata, kabili Shinwe, kuli Lesa wandi, kabili Lesa wenu.” (Yohane 20:17) Yesu tatile e Lesa lelo alandile ukuti Lesa na o ni umbi.
◼ “Nshilanda ifyandi ne mwine, lelo Tata umwine uwantumine alimpeela ifunde lya fyo mfwile ukulanda no kusosa.” (Yohane 12:49) Yesu taleipangila fye ifyo alesambilisha; fyalefuma kuli Wishi.
YESU atile ali Mwana wa kwa Lesa, tatile ni Lesa Wa Maka Yonse iyo. Nga ca kuti Yesu ali e Lesa wine, ni kuli nani alepepa ilyo ali pano calo? (Mateo 14:23; 26:26-29) Kwena teti tutile Yesu alecita fye kwati pali uo alepepako!
Ilyo abasambi ba kwa Yesu babili bamulombele ukuti akabapeele ififulo fikalamba mu Bufumu bwakwe, abaswike ati: “Ukwikala ku kulyo kwandi na ku kuso kwandi te ine mpeela, lelo abo Tata apekanishisha e bo bakapeela.” (Mateo 20:23) Bushe Yesu alebabepa fye pa kulanda ukuti takwata insambu ya kubapeela ifyo balombele? Awe! Lelo, ali-icefeshe no kusumina ukutila ni Lesa fye e wakwata amaka ya kucita ifya musango uyu. Yesu alilondolwele no kuti kwali ifintu fimo ifyo ena na bamalaika bashaishibe lelo ifyo Wishi fye eka aishibe.—Marko 13:32.
Bushe Yesu alenakila fye Lesa ilyo ali pano calo? Awe. Nangu fye ni pa numa ya mfwa no kubuuka kwakwe ku bafwa, Baibolo ilondolola ukutila Yesu alitwalilila ukunakila Lesa. Umutumwa Paulo atwibukishako ukutila “umutwe wa kwa Kristu ni Lesa.” (1 Abena Korinti 11:3) Baibolo ilondolola ukutila ku ntanshi “ilyo fyonse fikalengwa ukunakila ena, e lyo no Mwana wine akainashisha ku Walengele fyonse ukunakila ena, pa kuti Lesa akabe fyonse kuli bonse.”—1 Abena Korinti 15:28.
Kanshi Yesu te Lesa Wa Maka Yonse. E mulandu wine aitile Wishi ati “Lesa wandi.”—Ukusokolola 3:2, 12; 2 Abena Korinti 1:3, 4. *
[Futunoti]
^ para. 12 Nga mulefwaya ukwishibilapo na fimbi pali ili lyashi, kuti mwabelenga pa mabula 201-204 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
[Amashiwi pe bula 7]
Yesu atile kwali ifintu fimo ifyo ena na bamalaika bashaishibe lelo ifyo Wishi fye eka aishibe