Ukupepa kwa Cine Kulasambilisha Abantu Ukutemwana

BAIBOLO itila: “Uushitemwa taishiba Lesa; ico Lesa kutemwa.” (1 Yohane 4:8) Kanshi ukupepa kwa cine kufwile ukusambilisha abantu ukutemwana.

Imipepele iingi ilabomba imilimo isuma iingi pamo nga ukusakamana abalwala, abakote, na bapiina. Baleba nabo bapepa nabo ukulacita filya umutumwa Yohane alembele ukuti: “Umuntu uwakwata ifintu fya pano calo nga amona munyina alekabila, lelo akaana ukumumfwila uluse, bushe kuti atila alitemwa Lesa mu mutima wakwe? Mwe bana bandi twilaleka icitemwiko cesu cibefye pa kanwa na mu mashiwi, lelo citemwiko  cesu cibe mu ficitwa fyesu kabili icacine cine.”—1 Yohane 3:17, 18.

Nomba cinshi cicitika nga kwaba inkondo? Bushe abantu balingile ukulakonka ifunde lya kwa Lesa ilya kuti “uletemwa umubiyo nga we mwine” ilyo fye kuli icibote lelo nga ca kutila kateka nelyo imfumu yabuusha inkondo ne calo cimbi ninshi lyena kulabako kuli ili funde?—Mateo 22:39.

Yesu atile: “Nga mwalatemwana, elyo bonse bakamwishiba ukuti muli basambi bandi.” (Yohane 13:35) Ilyo mwakula-asuka aya mepusho yakonkapo, muleipusha mwe bene ukuti, ‘Bushe ababa mu mipepele naishiba balalanga ukutemwa ku bantu bonse kabili pa nshita yonse, mu milandile yabo e lyo na mu fyo bacita?’

NATULANDE PA: Nkondo.

IFYO BAIBOLO ISAMBILISHA: Yesu apeele abasambi bakwe ifunde lya kuti: “Muletemwa abalwani benu, mulepepelako na bamucusha.”—Mateo 5:44.

Ilyo abashilika baile mu kwikata Yesu, umutumwa Petro alifumishe icanso pa kuti acingilile Yesu. Lelo Yesu amwebele ati: “Bwesesho lupanga lobe umo lwikala; pantu bonse ababuulo lupanga bakafwa ku lupanga.”—Mateo 26:52.

Umutumwa Yohane alembele ati: “Muli ici e mumonekela abana ba kwa Lesa, na bana ba kwa Kaseebanya; onse uushicita bulungami te wa kwa Lesa, nangu untu ashatemwa munyina. Pantu iyi e mbila iyo mwaumfwile ukufuma ku kutendeka, iya kuti tutemwane: te kuti tube nga Kaini, uwali wa Mubifi, kabili aipeye munyina.”—1 Yohane 3:10-12.

ICIPUSHO: Bushe ababa mu mipepele mwaishiba balakoselesha ababamo ukulalwako inkondo?

NATULANDE PA: Kuitumpa mu fikansa fya calo.

IFYO BAIBOLO ISAMBILISHA: Ilyo abantu bamwene ifipesha mano ifyo Yesu alecita, bamo bafwaile ukuti abe kateka. Bushe Yesu acitile shani? “Yesu pa kwishibo kuti balaswa bese ku kumwikata ukuti bamucite imfumu, afumineko aile kabili ku lupili eka.”—Yohane 6:15.

Ilyo Yesu bamwikete no kumubepesha ukuti aleimina ubuteko, aebele abalemubepesha ukuti: “Ubufumu bwandi te bwa pano isonde; abuba bwa pano isonde ubufumu bwandi, bakalume bandi nga balwa ukuti nipeelwa ku baYuda. Lelo nomba ubufumu bwandi te bwa pano nse.”—Yohane 18:36.

Ilyo Yesu alepepelako abasambi bakwe kuli Lesa, atile: “Ine nabapeele cebo cenu; na ba pano isonde nababapata ico tabali ba pano isonde, ifyo ine nshili wa pano isonde.”—Yohane 17:14.

 ICIPUSHO: Bushe ababa mu mipepele mwaishiba, balakonka filya fine Yesu ashaleitumpa mu fikansa fya calo, nangu cingati ukucita ifi kuti kwalenga aba mu buteko ukubapata?

NATULANDE PA: Kapaatulula.

IFYO BAIBOLO ISAMBILISHA: Ilyo abena fyalo abashasembululwa basangwike Abena Kristu, umutumwa Petro alandilepo ati: “Lesa taba na kapatulula. Lelo asekelafye umuntu onse uwa mu mushobo onse, kumfwa nga akwatila Lesa akatiina kabili alecita ne fyo afwaya.”—Imilimo 10:34, 35.

Yakobo alembeele Abena Kristu abaliko ilya nshita ati: ‘Mwe bamunyinane, apo mwasumina mu Mfumu yesu Yesu Kristu, Imfumu icindami, mwilaba na kapatulula. Nga ca kuti umukankala uufwele imbalaminwe ya golide ne nsalu sha mutengo, nga aisa mu ng’anda mulongene, elyo no mupina uwasapula na o aisamo. Nga mwapokelela bwino uufwele ubusaka, mwamweba amuti, “Ikaleni apa pa cipuna apaweme.” Umupina na o mwamweba amuti, “Keminine uko nangu ikala panshi mupepi na ine.” Bushe ninshi te kapatulula mwacita? Bushe ninshi te mano yabi mwabomfya mu kupingula?’—Yakobo 2:1-4.

ICIPUSHO: Bushe imipepele mwaishiba isambilisha ukuti Lesa amona abantu bonse ukuti baba fye cimo cine kabili abapepamo tabalingile ukuba na kapaatulula no kuti tapafwile kuba umusobolola pa bakankaala na bapiina?

[Amashiwi pe bula 7]

Kupepa nshi ukusambilisha ababamo ukukanaitumpa mu fikansa fya calo, ukukanaba na kapaatulula nelyo ukusobolola abakankaala na bapiina, ifintu ifilenga abantu ukupusana?