Sambilileni Icebo ca kwa Lesa

Bushe Finshi Bamalaika Bacita Kuli Ifwe?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe bamalaika ni bani?

Bamalaika fibumbwa fya mupashi ifyaba mu muulu. Bamalaika balicila abantunse. Lesa wa cine, na o uwakwata umubili wa mupashi, apangile bamalaika ilyo talapanga isonde. (Yobo 38:4, 7; Mateo 18:10) Yehova alikwata bamalaika aba cishinka iminshipendwa.—Belengeni Amalumbo 103:20, 21; Daniele 7:9, 10.

2. Bushe bamalaika balafwa abantu?

Bamalaika balyafwile Lote umulungami. Lote aleikala mu musumba uo Lesa ali no konaula pantu abantu balibipile sana. Bamalaika babili balisokele Lote no lupwa lwakwe ukuti bafulumuke mu musumba. Abantu bamo balemona uku ukusoka kwati kwangala fye, e co tababikileko na mano. Lelo Lote na bana bakwe abanakashi balipuswike pantu balyumfwilile ukusoka uko bamalaika ba kwa Lesa babasokele.—Belengeni Ukutendeka 19:1, 13-17, 26.

Baibolo ilanga ukuti bamalaika balafwa abantu muno nshiku, balatungulula mu mulimo uo abantu ba cishinka babomba uwa kushimikila imbila nsuma iya Bufumu bwa kwa Lesa. (Mateo 24:14) Mu mbila nsuma babilisha, mwaliba no kusoka. Nga filya fine cali kuli Lote, uku kusoka te kwangala fye. Lesa e utusoka ukubomfya bamalaika.—Belengeni Ukusokolola 1:1; 14:6, 7.

Lesa kuti abomfya bamalaika ku kutukosha ilyo tule-eshiwa. Abomfeshe malaika ukukosha Yesu.—Belengeni Luka 22:41-43.

Nomba line Lesa ali no kubomfya bamalaika ku konaula abantu ababipa abalenga ukucula pano calo. Ici cikalenga abantunse ukwikala mu mutende, ukwabula ukucula.—Belengeni 2 Abena Tesalonika 1:6-8.

  3. Bushe finshi ifibanda ficita kuli ifwe?

Nge fi fine abantu abengi pe sonde bacita ifyabipa pa mulandu wa kukanaumfwila Lesa, e fyo na bamalaika abengi mu muulu bapondokele Lesa. (2 Petro 2:4) Bamalaika abapondokele Lesa babeta ukuti ifibanda. Umukalamba wa fibanda ni Satana Kaseebanya. Satana ne fibanda fyakwe balalufya abantu.—Belengeni Ukusokolola 12:9.

Satana abomfya amakwebo ya bufufuntungu, amabuteko ya bantunse, no kupepa kwa bufi ku kulufya abantu no kubafumya kuli Lesa. Kanshi Satana e walenga ukuti kube ulufyengo, ubunkalwe, no kucula.—Belengeni 1 Yohane 5:19.

4. Bushe ifibanda filufya shani abantu?

Satana alilufya abantu abengi pa kubasambilisha ukuti abantu abafwa balasanguka imipashi iingalanshanya na ba mweo. Lelo Baibolo itila abafwa te kuti bacite akantu nangu kamo. (Lukala Milandu 9:5) Lelo ilingi ifibanda filalufya abantu pa kupashanya ishiwi lya bantu abafwa. (Esaya 8:19) Bambi na bo filabalufya ukubomfya abasobela ifya ku ntanshi, abomfwana ne mipashi, ababuka, na babukila ku ntanda. Icebo ca kwa Lesa citusoka ukuti tufwile ukutaluka kuli ifi fyonse. Kanshi tufwile ukupoosa fyonse ifyo twakwata ifya-ampana ne fibanda ne mipashi.—Belengeni Amalango 18:10, 11; Imilimo 19:19.

Nga twalitemwa Yehova, tatufwile ukulatiina ifibanda. Nga tulesambilila Icebo ca kwa Lesa no kucita ifyo cilanda, ninshi tulekaana Satana Kaseebanya kabili ninshi tulepalama kuli Lesa. Yehova alikwatisha amaka ukucila ifibanda. Bamalaika bakwe aba cishinka kuti batukosha pa nshita tulekabila ubwafwilisho.—Belengeni Amalumbo 34:7; Yakobo 4:7, 8.

Nga mulefwaya ukwishibilapo na fimbi, belengeni icipandwa 10 mu citabo citila Bushe Cinshi Baibolo Isambilisha icalembwa ne Nte sha kwa Yehova.