Sambilileni Icebo Ca Kwa Lesa

Mulandu Nshi Lesa Atumiine Yesu Pano Calo?

Ici cipande cilelanda pa mepusho ayo nalimo mufwaisha ukwishiba kabili cilemulanga napo mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.

1. Ni kwi Yesu aali ilyo Lesa ashilamutuma pano calo?

Yesu aali icibumbwa ca mupashi ku muulu ilyo ashilafyalwa mu Betelehemu. E o Lesa abalilepo ukubumba kabili e o abumbile fye mu kulungatika. Kanshi alilinga ukumwita ukuti Umwana wa kwa Lesa uwafyalwa eka. Ilyo aali ku muulu, ilingi line alelandilako Lesa. E mulandu wine etilwa ukuti Cebo. Na kabili aleafwa Lesa kabili Lesa alimubomfeshe ukupanga ifintu fyonse. (Yohane 1:2, 3, 14) Yesu aikele na Lesa ku muulu iminshipendwa ya myaka ilyo abantunse bashilabumbwa.—Belengeni Mika 5:2; Yohane 17:5.

2. Bushe Lesa atumine shani Umwana wakwe pano calo?

Yehova abomfeshe umupashi wa mushilo ukukuusha ubumi bwa kwa Yesu ukufuma ku muulu no kububika mwi fumo lya kwa Maria. E co Yesu tafyelwe kuli wishi umuntunse. Bamalaika baebele bakacema ba mu Betelehemu abaile mu kucema ifitekwa fyabo mu mpanga ubushiku pa lwa kufyalwa kwa kwa Yesu. (Luka 2:8-12) Kanshi Yesu tafyelwe mu nshita ya mu mainsa ninshi kuli impepo, lelo afyelwe nalimo ku kutampa kwa October, ninshi kucili na kukaba. Ilyo papitile inshita, Maria no mwina mwakwe Yosefe basendele Yesu ku musumba baleikala uwa Nasareti uko Yesu ailekulila. Yosefe alisungile bwino Yesu nangu ca kuti taali mwana wakwe uwakuifyalila.—Belengeni Mateo 1:18-23.

Ilyo Yesu aali ne myaka 30, alibatishiwe kabili Lesa alandile apabuuta ukuti Yesu aali Mwana wakwe. Pa numa, Yesu atendeke ukubomba umulimo uo Lesa amutumiine pano calo.—Belengeni Mateo 3:16, 17.

  3. Mulandu nshi Lesa atumiine Yesu pano calo?

Lesa atumine Yesu ukwisasambilisha abantu icine. Yesu asambilishe pa Bufumu bwa kwa Lesa, ubuteko ubwaba ku muulu ubukalenga pano calo pakabe umutende. Apeele isubilo lya mweo wa muyayaya ku bantu. (Yohane 4:14; 18:36, 37) Na kabili Yesu asambilishe abantu ifintu ifingi pa fyo bengaba ne nsansa sha cine cine. (Mateo 5:3; 6:19-21) Ifyo alebasambilisha e fyo alecita. Ku ca kumwenako, alicitile ukufwaya kwa kwa Lesa na lintu fye aali na mafya. Ilyo balemucusha tabweseshe ububi pa bubi.—Belengeni 1 Petro 2:21-24.

Yesu asambilishe abasambi bakwe ukuti bafwile ukutemwa abantu bambi ukufuma pa nshi ya mutima. Nangu ca kuti alikwete icifulo icikalamba ilyo aali na Wishi ku muulu, ilyo Wishi amutumine ukwisa pano calo, alyumfwilile. Kanshi takuli uwingatulanga ukutemwa, nga filya Yesu acitile.—Belengeni Yohane 15:12, 13; Abena Filipi 2:5-8.

4. Cinshi cintu imfwa ya kwa Yesu yacitila abantunse?

Lesa na kabili atumine Yesu pa kuti atufwile pa mulandu wa membu shesu. (Yohane 3:16) Bonse tuli babembu, kanshi tatwapwililika kabili tulabembuka. E mulandu wine tulwalila no kufwa. Umuntu wa kubalilapo Adamu, ali uwapusanako pantu ena ali uwapwililika. Taali umubembu e co taali no kulwala no kufwa. Lelo ilyo akeene ukumfwila Lesa, abeele umubembu. Twalipyana ulubembu ne mfwa kuli Adamu.—Belengeni Abena Roma 5:12; 6:23.

Yesu uwali uwapwililika taafwile pa mulandu wa kuti ali umubembu, lelo afwilile pa mulandu wa membu shesu. Imfwa ya kwa Yesu yalilenga Lesa ukutupaala kabili yalitupeela ishuko lya kuba no mweo wa muyayaya.—Belengeni 1 Petro 3:18.

Nga mulefwaya ukwishibilapo na fimbi, belengeni ifipandwa 4 na 5 muli ici citabo Bushe Cinshi Baibolo Isambilisha? icalembwa ne Nte sha kwa Yehova.