Ukufuma fye na kale, abantu balatontonkanya pa fyo cingawama nga baali ne mibili iisuma kwati baice e lyo no kulaikala umuyayaya. Lelo ifi te fyo caba pantu tulafwa. Ukutula apo Yobo alandiile amashiwi yali pa muulu, napapita imyaka ukucila pali 3,000.

Bonse tulafwaisha ukwikala umuyayaya pantu cacifyalilwa. Baibolo ilanda ukuti Lesa alibika inshita ya muyayaya mu mitima yesu. (Lukala Milandu 3:11) Muletipo shani, bushe Lesa uwalenga ukuti tulefwaisha ukwikala umuyayaya kuti akaana ukutupeela ubumi bwa muyayaya? Awe nakalya. Icebo ca kwa Lesa calanda ukuti imfwa mulwani, kabili cisosa no kuti e ikaba umulwani wa kulekelesha “ukonaulwa.”—1 Abena Korinti 15:26.

Twalishiba ukuti imfwa mulwani, kabili bonse fye tatwaitemwa. Nga twamona ukuti ubusanso bwalatucitikila uko tuli, tulafulumuka nelyo ukufisama. Na lintu twalwala tulaya ku cipatala pa kuti batundape. E co tucitila ifi ni co tatufwaya ukufwa.

Bushe kwaliba icingalenga twashininkisha ukuti Lesa akafumyapo imfwa? Ee, pantu Yehova Lesa, Kabumba tabumbile abantu ukuti baleikala fye imyaka iinono, kabili tababumbile ukuti balefwa. Ico Lesa alefwaya ca kuti abantu baleikala umuyayaya, kabili ifyo alaya alafikilisha.—Esaya 55:11.

Nomba bushe imfwa ikapwa shani? Ukutula fye na kale, abantu balyesha ukufumyapo imfwa lelo balifilwa. Na muno nshiku mwine balitwalilila ukwesha ukufumyapo imfwa. Basayantisiti balipanga umuti uwa kucefyako amalwele yamo. Kabili balisambilila ne fyo ifya mweo fyapangwa. Mu fyalo fimo, abantu balekala imyaka iingi ukucila ifyo baleikala imyaka 100 iyapita. Lelo abantu bena balafwa, nga filya fine Baibolo ilanda ukuti abantu ‘bonse balabwelela ku lukungu.”—Lukala Milandu 3:20.

Tatwingacetekela abantu ukuti bakafumyapo imfwa pantu tabakwata amaka. Icawama ca kuti, Yehova Lesa alipekanya icilubula ca Mwana wakwe, Yesu Kristu icikatulubula ku mfwa.