Afta we ol studen blong namba 136 klas blong Gilead Skul oli finisim faef manis kos blong olgeta we oli stadi dip long Baebol, oli graduet long Sarede 8 Maj 2014. Ol studen ya oli ol Witnes blong Jehova we oli gat ekspiriens, mo long klas ya oli lanem blong kamgud moa long wok blong prij, mo blong mekem bilif blong ol narafala Kristin i kam strong moa. I gat 11,548 man oli luk graduesen ya long Patterson, New York. Sam long olgeta oli go long Patterson, mo sam kantri olsem, Kanada, Jamaika, Poto Riko mo Yunaeted Stet, oli wajem tru long Intenet.

“Yufala i Mas Gohed Blong Holem Sem Tingting Ya.” David Splane we i jeaman blong miting ya mo i wan memba blong Hed Kampani blong ol Witnes blong Jehova, i mekem fastok blong hem, we i stanap long Filipae 2:5-7, se: “Yufala i mas gohed blong holem sem tingting ya we Kraes Jisas tu i gat.” Brata Splane i soemaot se taem Jisas i stap long wol, hem i no wari long posisen blong hem, be hem i gat tingting daon mo i yusum ful paoa blong hem blong mekem wok blong God.

Eksampol, evri taem we Setan i traem Jisas, Jisas i talem se: “Baebol i talem se,” nao biaen i talem ol tok we Moses i talem long neson blong Isrel. (Matiu 4:4, 7, 10; Dutronome 6:13, 16; 8:3) Jisas i save talem prapa tok blong hem, from we hem i Pikinini blong God, be hem i no mekem olsem, from we hem i gat tingting daon mo i tinghae long wok we Moses i mekem. Long sem fasin, yumi mas luksave wok we ol narafala oli mekem, mo yumi talem ol gudfala toktok long olgeta.

Brata Splane i tokbaot gudfala tingting we Jisas i gat, afta we hem i finisim wok blong hem long wol ya. Jisas i prea se: “Mi mi leftemap nem blong yu finis long wol ya, mo mi finisim ol wok we yu givim long mi blong mi mekem. Papa. Yu tekem mi mi go stap wetem yu blong mi kasem haenem we mi gat fastaem, taem wol i no stap yet.” (Jon 17:4, 5) Long prea ya, Jisas i no askem blong gat sam moa wok. Hem i askem nomo blong gobak long wok we hem i gat fastaem, taem bambae hem i gobak long heven. Long sem fasin, ol studen we oli graduet long Gilead, oli mas folem eksampol blong Jisas, taem oli tingbaot moa wok we bambae oli mekem, i bitim we oli tingbaot haenem o posisen. Taem oli gobak long ples blong olgeta, oli mas glad nomo blong wok, nating sipos oli no kasem sam narafala wok antap long wok we oli stap mekem finis.

“No Tingbaot Samting We Yu Lego.” William Malenfant, we i stap givhan long Tijing Komiti, i givim wan tok we i leftemap tingting blong ol studen blong oli folem eksampol blong aposol Pol. Pol i lego samting we hem nomo i wantem, blong mekem wok blong God. Hem i no tingtingbak long ol samting we hem i lego finis blong i save mekem wok blong God, be hem i talem se: “Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi.”​—Filipae 3:13, 14.

Taem ol studen oli lego ol samting mo oli no sore from, oli stap folem fasin blong ol gudfala man blong God bifo mo tede tu. Brata Malenfant i talem stori blong sista Clara Gerber Moyer, we i stat blong mekem wok blong Jehova taem hem i pikinini nomo. Sista Moyer i talem se: “!Taem mi luklukbak long ol 80 yia we mi mekem wok blong Jehova, mi harem se hemia i wan bigfala blesing blong mi, mo mi no sore from! Sipos mi save gohed blong laef, bambae mi gohed blong mekem wok ya nomo.”

“Talemaot Kingdom Olsem Ol Enjel Mo Wok Wetem Ol Enjel.” Gerrit Lösch we i wan memba blong Hed Kampani, i givhan long ol studen blong oli tinghae long tu spesel blesing we olgeta we oli stap prij, oli stap harem gud long hem. Faswan se, taem oli talemaot gud nius blong Kingdom blong God long ol man, i olsem se oli enjel blong God. Hemia from we Hibru mo Grik tok we oli tanem i kam “enjel,” i save minim “mesenja.” Sekenwan se, taem ol studen oli prij, oli wok wetem ol enjel, sem mak olsem disaepol Filip bifo.​—Ol Wok 8:26-35.

Biaen, Brata Lösch i tokbaot sam stori blong wok blong prij. Hem i tokbaot wan brata long Meksiko we nem blong hem Gabino. Taem Gabino i stap prij, hem i stap noknok wan no tu taem nomo long doa blong haos. Be wan dei, hem i noknok fo taem. Man we i kam openem doa long hem, i talem se hem i stap rere blong kilim hem wan i ded. Hem i talem se: “Taem yu noknok namba fo taem, rop i stap raon long nek blong mi finis. Be mi tekemaot blong kam openem doa. Tangkiu tumas blong noknok plante taem olsem. Sipos yu no bin mekem, bambae mi mi hangem nek blong mi finis.”

Nating se ol samting olsem oli hapen from aksiden nomo, be yumi save se i no olsem. Ol stori ya oli pruvum se ol enjel blong God oli stap lidim wok blong prij we i stap gohed long fulwol.—Revelesen 14:6.

“God i Blesem Man We i Gat Tingting Daon.” Michael Burnett we i wan tija long Gilead Skul, i givim tok ya. Long tok ya, hem i yusum eksampol blong Jabes we i wan laen blong Juda, we “ol man oli stap tinghae moa long [hem], i winim we oli tinghae long ol brata blong hem.” Jabes i prea long God se: “Plis yu blesem mi, yu givim bigfala graon bakegen long mi. Plis yu stap wetem mi, mo yu tekemaot olgeta samting nogud we i save mekem mi mi harem nogud.”​—1 Kronikel 4:9, 10.

Ol studen oli save folem gudfala eksampol blong Jabes, taem oli talemaot klia samting we oli wantem long prea blong olgeta, speseli taem oli askem long God blong i halpem olgeta blong mekem samting we oli lanem long Gilead Skul. Mo oli save askem long God tu blong i lukaotgud long olgeta long taem blong trabol. I no se oli askem blong no kasem trabol nating, be blong God i givhan long olgeta blong oli no harem nogud bitim mak, mo blong ol rabis samting i no spolem olgeta. God i ansa long prea blong Jabes mo bambae hem i mekem sem mak long ol studen blong Gilead Skul.

“Gohed Blong Mekem Se Faea Blong Yufala i Laet.” Mark Noumair we i wan tija long Gilead Skul mo i stap givhan tu long Tijing Komiti, i givim tok ya we i stanap long 1 Tesalonaeka 5:16-19. Blong wan faea i laet, i nidim hot, faeawud, mo ea. Long sem fasin, i gat tri samting we ol studen oli save yusum, blong oli gohed blong stap glad long wok blong prij.

Faswan se, “yufala i mas glad oltaem.” (1 Tesalonaeka 5:16) Jehova i glad long ol studen. Sipos oli tingting dip long blesing ya, oli save kasem glad, mo hemia i olsem faeawud we i givim paoa long olgeta blong wok strong long wok blong prij. Sekenwan se, “yufala i mas prea oltaem.” (1 Tesalonaeka 5:17) Prea i olsem ea we i mekem faea i laet. I gud blong mekem se prea blong yumi i longfala, blong yumi save talemaot evri samting we i stap long hat blong yumi, long God. Mo nambatri se, “yufala i mas talem tangkiu from evri samting.” (1 Tesalonaeka 5:18) Taem yumi gat fasin ya blong talem tangkiu, hemia i save mekem se yumi fren gud moa wetem Jehova mo ol brata mo sista. Brata Noumair i talem se: “Yufala i mas gohed blong gat fasin tangkiu, hemia bambae i mekem se yufala i stap wom gud oltaem, taem ol man we filing blong olgeta i kolkol oli agensem yufala.”

“Ol Samting Long Skae Oli Presem Jehova, Yufala Tu, Yufala i Joenem Olgeta.” Sam Roberson we i wan tija blong tiokratik skul, i statem tok blong hem wetem ol tok blong Baebol we oli soemaot se san, mun, mo ol sta, oli stap presem Jehova. (Ol Sam 19:1; 89:37; 148:3) Hem i talem se ol studen tu oli gat janis blong presem Jehova. Afta, hem i askem olgeta blong oli mekem sam pleplei we i soemaot sam ekspiriens blong olgeta we i jes hapen long olgeta long wok blong prij. Eksampol, wan man we i sidaon long wiljea i talem tangkiu long wan studen from we studen ya i stopem trak blong hem, blong man ya i save krosem rod. Taem man ya i talem tangkiu long studen ya, studen ya i talem tangkiu tu long man ya from we hem i gat fasin tangkiu. Biaen, tufala i storian nao man ya i agri blong stadi long Baebol. Long ol wik we i kam biaen, studen ya i go mekem stadi blong man ya, mo hem i prij long plante narafala man we oli kam visitim man ya. Frut we i kamaot se, seven narafala Baebol stadi i stat jes from we studen ya i toktok wetem man ya long wiljea.

“Yusum Edukesen We God i Givim, Blong Mekem Yufala i Kam Strong Moa.” Donald Gordon we i stap givhan long Pablising Komiti, i askem kwestin long tu brata wetem waef blong tufala, we oli go long skul ya. Wan long tufala brata ya i tingbaot vas blong Efesas 3:16-20 we i kamaot long ful kos ya. Vas ya i givhan long ol studen blong oli “kam strong.” Oli kam strong taem oli mas mekem tingting blong olgeta i stap daon mo mekem ol narafala oli no fraet blong kam klosap long olgeta, mo taem oli luksave se Jehova i gat plante wok yet blong ol wanwan Witnes blong hem oli mekem. Wan long tufala sista i talem se, hem i glad taem wan long ol tija blong Gilead Skul i pulum ol studen, blong oli no kam olsem wan bigfala fis we i stap insaed long wan smol bol glas we i fulap long wota we i no gat inaf spes blong olgeta, be oli mas kam olsem wan smol fis we i stap long bigfala solwota. Sista ya i talem se: “Lesen we mi lanem se sipos mi mekem se mi mi daon moa long ol narafala long ogenaesesen blong Jehova, bambae hem i givhan long mi blong mekem bilif blong mi i strong moa.”

“Jehova Bambae i Tingbaot Yu Mo i Mekem i Gud Long Yu.” Mark Sanderson, we i wan memba blong Hed Kampani, i givim bigfala tok blong program ya, we i kamaot long prea blong Nehemaea: “God blong mi bambae i tingbaot mi, i mekem i gud long mi.” (Nehemaea 5:​19; 13:31) Nehemaea i no fraet se Jehova bambae i fogetem hem mo ol gudfala wok we hem i mekem. Be, hem i stap askem long Jehova blong i tingbaot hem mo i blesem hem.

Long sem fasin, ol studen oli save trastem Jehova se hem bambae i tingbaot olgeta mo i mekem i gud long olgeta, sipos oli folem ol advaes we oli lanem long Gilead. Oli mas lavem Jehova long olgeta hat blong olgeta, mo hemia nao impoten samting we i pusum olgeta blong wosipim hem. (Mak 12:30) Ebraham i lavem Jehova long olgeta hat blong hem, mo God i tingbaot hem mo i lavem hem. Mo nating se Ebraham i ded plante yia finis, be God i tokbaot hem se, “fren blong mi.”—Aesea 41:8.

Biaen, Brata Sanderson i talem long ol studen blong oli lavem ol man raonabaot long olgeta, speseli ol Kristin brata mo sista. (Mak 12:31) Ol studen oli mas gat strong tingting blong go givhan long ol man we oli nidim help, olsem man Sameria ya we i mekem “olsem man raonabaot long man ya we i kasem kil.” (Luk 10:36) Blong eksplenem gud poen ya, hem i tokbaot stori blong Nicholas Kovalak. Hem i wan brata we i bin wan studen blong Gilead bifo, mo i mekem wok blong distrik elda. Ol man oli save gud hem from we hem i kaen mo i lavem ol man. Hem i bin leftemap tingting blong wan eria elda mo woman blong hem blong wok strong long wok blong prij. Hem i se, “Yu stat blong prij long eli moning, long stat blong wik, long stat blong manis, long stat blong yia.” Afta we sam dei i pas, hem i luk we sista ya i wok strong tumas, nao i talem long hem se: “Yu stop blong mekem samting we mi talem long yu. Yu yu mekem plante wok finis. I gud yu slo daon lelebet, blong yu save gat paoa blong mekem wok blong Jehova longtaem.” Brata ya i soemaot se hem i kaen long sista ya, mo advaes we hem i givim i halpem sista ya blong i wok fultaem long wok blong Jehova, blong plante yia.

Long en, Brata Sanderson i leftemap tingting blong ol studen blong oli mekem samting we oli lanem, hemia blong tijim mo trenem ol narafala. (2 Timoti 2:2) Taem oli mekem ol defren wok blong olgeta, oli save givhan blong mekem bilif blong ol brata mo sista i strong, oli wok gud wetem olgeta, mo oli leftemap tingting blong olgeta blong save se Jehova i stap tingbaot olgeta, mo bambae i mekem i gud long olgeta.—Ol Sam 20:1-5.

Lastok. Afta we ol studen oli kasem ol setifiket blong olgeta, wan long ol studen i ridimaot wan leta blong talem tangkiu. Biaen, ol fiftin studen ya, oli sing long singsing namba 123 long sing buk blong yumi Yumi Singsing Long Jeova, we stamba tok blong hem i se, “Ol Man Blong Lukaot Long Ol Sipsip​—Oli Presen Blong God.”