Ol man oli save gud Ol Witnes blong Jehova from wok blong prij we oli mekem long ol haos wan wan, mo tu, from ol troli blong ol buk we oli stap yusum naoia long ol pablik ples.

I no longtaem i pas, wok ya i kam bigwan moa. Long Novemba 2011, , wan grup blong ol Witnes long New York i tokbaot Baebol long ol man wetem ol buk we oli putum long ol tebol mo troli. Wok blong olgeta i karem gudfala frut, nao kwiktaem nomo i kasem ol narafala taon.

Long Maj 2015, oli sanem 165,390 troli long ol defdefren kongregesen long fulwol wetem plante taosen stand mo tebol blong putum ol buk.

Wok blong prij long ol haos wan wan i beswan rod we ol Witnes oli yusum blong tijim ol man long trutok blong Baebol. Be ol troli we oli yusum long wok blong prij, i wan nambawan rod tu blong kasem eni kaen man. Bambae yumi luk sam eksampol.

Long Peru wan man we nem blong hem Raul, i mitim wan witnes we i stap stanap wetem wan troli, nao i askem long hem se: “?Yufala i bin stap wea? !Tri yia nao mi stap lukaotem ol Witnes!. Be taem mi luk troli ya, mi talem tangkiu long God.”

Nomata we ol Witnes oli prij oltaem long ples we Raul i stap long hem be hem i neva stap long haos. Hem i eksplenem se bifo hem i bin stadi Baebol wetem ol Witnes mo naoia hem i wantem gohed bakegen. Nao ol brata oli mekem plan blong stadi wetem hem.

Long Bulgaria, wan yangfala man mo woman blong hem, tufala i tekem buk ya Spesel Rod Blong Mekem Famle I Hapi long troli. Long nekis wik blong hem, tufala i kambak mo tekem tu moa buk, hemia: Buk Blong Ol Baebol Stori mo Learn From the Great Teacher. Nao brata i askem long tufala sipos tufala i gat pikinini, ale, tufala i talem long hem se: “Mitufala i no gat pikinini yet, be taem mitufala i gat wan, bambae mitufala i tijim hem blong save God. Taswe, mitufala i rili nidim ol buk ya.”

Long Ukraine, wan man we i werem klos blong ol ami i kam luk sam Witnes we oli stap stanap wetem troli blong ol buk, nao i askem long olgeta se, “Ol gel, yufala i talem long mi, ?Wetaem bambae Amagedon i kam?” Man ya i bin joen long ol raorao we i hapen long Ukraine i no longtaem i pas. Mo ol samting we oli stap hapen long wol tede oli pulum tingting blong hem blong i luksave se i no longtaem bambae Amagedon i kam. Mo hem i no kasemsave tu from wanem God i no tekem aksen yet. Ale, ol sista oli eksplenem long hem wetem Baebol se, God i gat wan gudfala risen blong no spolem ol man yet, be i no longtaem bambae hem i spolem ol rabis man. Ale, man ya i tekem sam Wajtaoa mo Wekap! Mo buk ya, Is There a Creator Who Cares About You?

Long Macedonia, wan yangfala man i talem long ol Witnes we oli stap stanap wetem troli se bifo hem i stap tekem ol magasin blong olgeta, be naoia hem i wantem buk ya, ?Wanem Samting We Baebol i Rili Tijim? Nao hem i talem se bambae hem i go long wan pablik laebri mo ridim buk ya.

Tu aoa biaen, afta we hem i ridim 79 pej blong buk ya, hem i kambak, mo i talem se: “!Buk ya i jenisim laef blong man. Mi luksave se plante samting we mi bilivim, oli rong. Evri samting we buk ya i eksplenem, oli tru tumas. Buk ya i givhan long mi blong kasemsave mining blong laef!”