?God i Stap Tingbaot Ol Man?

LONG moning blong namba 1 Novemba, long yia 1755, graon i seksek bigwan long taon blong Lisbon, long Potugal. Biaen i gat wan bigfala taetel wef (tsunami). Mo faea tu i spolem ples. Ol disasta ya oli spolem bighaf blong taon ya mo oli kilim i ded plante taosen man.

Afta we graon i seksek bigwan long Haiti long 2010, wan niuspepa blong Kanada (National Post) i talem se: “Olgeta nogud samting we oli hapen, oli traem bilif we man i gat long Bigman. Be [ol bigfala disasta olsem] hemia long Lisbon mo long Haiti, oli traem bilif blong man moa i bitim ol narafala samting.” En blong stori ya long niuspepa i talem se: “Ating God i lego ol man Haiti.”

Jehova God i gat “olgeta paoa.” Hem i naf blong finisim olgeta samting we oli mekem man i harem nogud. (Ol Sam 91:1) Mo yumi save gat strong tingting se hem i stap tingbaot yumi. ?From wanem?

Samting We Yumi Save Long Saed Blong God

God i harem nogud taem hem i luk we ol man oli harem nogud. Taem ol man Isrel oli wok slef long Ijip mo oli harem nogud from we ol man Ijip oli mekem i strong tumas long olgeta, God i talem long Moses se: “Yufala ol laen blong Isrel, yufala i man blong mi, mo mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta ya we oli stap long Ijip, we oli wantem mi mi tekemaot olgeta long han blong ol man ya we oli stap fosem olgeta blong oli wok slef blong olgeta. Mi mi save finis we oli harem nogud tumas, mo oltaem mi stap tingting long olgeta.” (Eksodas 3:7) ?Ol tok ya oli soemaot wanem? Oli soemaot se God i luksave we ol man oli harem nogud mo hem i stap tingbaot olgeta. Profet Aesea i tokbaot samting we i hapen long ol man Isrel, i se: “Long ol samting ya we oli stap mekem mifala i harem nogud tumas, yu tu yu stap harem nogud.”—Aesea 63:9, futnot long Baebol long Bislama.

“Oltaem hem i stap mekem ol samting we i stret.” (Dutronome 32:4) Long olgeta samting we God i mekem, oltaem fasin blong hem i stret mo hem i mekem i sem mak long olgeta man. Hem “i stap gad gud long olgeta we tingting blong olgeta i stap strong long hem,” be “long olgeta ya we oli stap mekem [ol stret man oli] harem nogud,” bambae hem i “givimbak fasin ya long olgeta.” (Ol Proveb 2:8; 2 Tesalonaeka 1:6, 7) “Hem i no save saed wetem ol king, mo i no save givhan long ol rijman blong oli agens long ol puaman, from we hem nomo i mekem olgeta evriwan.” Yes, God i mekem i sem mak long olgeta man. (Job 34:19) Mo God i save gud wanem blong mekem blong ol man oli harem gud bakegen. Be ol man oli no save wanem blong mekem. Ol samting we oli mekem i no finisim stamba blong ol trabol. Oli mekem olsem wan dokta we i putum plasta long kil we man i kasem from we narafala i sutum hem long masket. Ating plasta i haedem kil blong man ya be samting we i mekem man ya i harem nogud i stap yet. Plasta ya i no save mekem man ya i harem gud bakegen.

‘Oltaem God i gat sore long man, mo hem i stap givhan long man long gladhat blong hem. Oltaem hem i stap lavem man.’ (Eksodas 34:6) Long Baebol, tok ya “sore” i blong tokbaot fasin ya we man i lavem narafala mo i harem nogud from trabol we narafala i kasem nao i wantem givhan long hem. Tok ya we oli tanem i kam “givhan long man long gladhat” i kamaot long wan narafala tok long Hibru lanwis we i min se “hat blong wan man i pulum hem blong givim samting long narafala we i gat nid.” Wan diksonari (Theological Dictionary of the Old Testament), i talem se tok ya we oli tanem i kam “lavem man” i min se “wan man i mekem samting blong givhan long narafala we  i harem nogud from we sam trabol i kasem hem we hem i no tingbaot.” I tru se Jehova God i harem nogud taem ol man oli harem nogud. Be i no hemia nomo. Sore blong hem, fasin blong hem blong givhan long man long gladhat blong hem mo fasin blong hem blong lavem ol man, i pulum hem blong mekem samting blong givhan long olgeta. Taswe yumi save gat strong tingting se bambae God i finisim olgeta samting we oli mekem ol man oli harem nogud.

Yumi ridim finis long narafala haf blong magasin ya se, plante man oli stap harem nogud tede from tri samting. Mo yumi lanem se trifala samting ya oli no kamaot long God. Bambae yumi tokbaot stamba blong trifala samting ya.

Samting We Yumi Jusum

Fastaem, Adam i stap aninit long rul blong God. Be hem i mekem desisen blong sakemaot rul blong God. Hem i wantem save se laef blong hem bambae i olsem wanem taem hem i independen long God. Hem i no wantem save long ol tok blong Jehova we i stap long Jenesis 2:17 se: “Bambae yu ded.” Desisen blong Adam blong sakemaot hae rul blong God, i karem frut blong sin mo ded long ol man. Baebol i talem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Be bambae God i tekemaot ol nogud frut blong sin.

Samting We Yumi No Tingbaot

Olsem yumi talem finis, fas man, Adam, i sakemaot ol tok blong God we oli blong lidim hem. Ol tok ya nao oli givhan long ol man blong stap gud mo oli no kasem ol trabol we oli stap kasem man tede, olsem trabol blong disasta. Desisen we Adam i mekem i olsem taem wan sikman i sakemaot ol tok blong wan gudfala dokta we i gat save. Dokta i save ol samting we i save spolem sikman ya mo ol trabol we hem i save kasem. Sipos sikman i no lesin long dokta, bambae sikman ya i save harem nogud from. Long sem fasin, ol man tede oli no folem ol tok blong God. Oli no lukaot gud long ol samting we hem i wokem long wol, oli no wokem gud ol haos mo oli no tingbaot paoa blong solwota mo win mo ol narafala samting olsem. Plante taem ol samting ya nao oli stamba blong ol disasta. Nating se i olsem, bambae laef long wol ya i no stap olsem blong olwe. Bambae God i mekem laef long wol ya i kam gud.

‘Setan i Stap Rulum Wol Ya’

?From wanem God i letem Setan i rulum wol afta we hem i agensem God? Wan buk i talem se, “afta we wan niufala gavman i stanap, i gat smol taem we ol man blong gavman ya oli save talem se ol problem we oli stap oli fol blong olfala gavman.” Sipos Jehova i hareap tumas blong spolem “paoa blong Setan, we i stap rulum wol ya,” bambae Setan i save talem se ol problem we hem i no stretem oli fol blong God, we hem i stap rulum wol bifo long Setan. (Jon 12:31) Be Jehova i letem taem i pas blong Setan i soemaot klia, fasin blong hem blong rulum wol ya. Yumi luk klia nomo se rul blong hem i nogud. Nating se i olsem, ?from wanem yumi save gat strong tingting se bambae i gat wan taem we ol man oli no moa harem nogud?

[Tok blong pija long pej 6]

?Sipos wan man i go luk dokta from we narafala i sutum hem long masket, yu ting se dokta bambae i putum wan plasta nomo long kil blong man ya?