JORDAN i gat wan sapena blong pensel we i olsem wan sip. Maet ol man oli luk se sapena ya i sem mak nomo long ol narawan. Be Jordan i luk se hem i spesel tumas. Jordan i talem se: “Taem mi smol, wan olfala we i fren blong mifala, Russell, i givim sapena ya long mi.” Afta we Russell i ded, Jordan i jes kasem save se Russell i givhan bigwan long bubu man blong hem mo long papa mo mama blong hem, taem oli kasem hadtaem. Jordan i talem se: “Naoia we mi save moa long Russell, mi luk smol presen ya se i sas moa long ol narafala samting.”

Stori blong Jordan i soemaot se, samtaem wan presen i no impoten long lukluk blong sam man. Be man we i kasem presen ya, hem i luk se i gud tumas mo i spesel. Baebol i tokbaot wan presen we i sas we i sas bitim mak, se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.

!Presen ya i save givim laef we i no save finis long man we i kasem! ?Yu ting se i save gat wan narafala presen bakegen we i sas olsem? Maet samfala oli no tinghae long presen ya, be ol tru Kristin oli luk se hem i gud tumas. (Ol Sam 49:8; 1 Pita 1:18, 19) ?From wanem God i givim laef blong Pikinini blong hem olsem wan presen long ol man long wol?

Aposol Pol i eksplenem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded.” (Rom 5:12) Faswan man ya Adam, i mekem sin taem hem i no obei long God, ale hem i kasem panis ya, ded. Adam i mekem se olgeta man we oli kamaot biaen long hem, oli stap ded.

 “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Blong sevem ol man long wol, God i sanem Pikinini blong hem, Jisas Kraes, i kam blong givim laef blong hem olsem wan sakrefaes. Olgeta we oli bilif long Jisas, mo we bilif blong olgeta i stanap long sakrefaes o “ransom” ya, bambae oli kasem laef we i no save finis.—Rom 3:24, NW.

Pol i tokbaot olgeta blesing we God i yusum Jisas Kraes blong givim long ol man we oli wosipim hem, mo i se: “Yumi talem tangkiu long God from presen ya blong hem we hem i givim fri nomo, mo we i gud bitim mak, yumi no save eksplenem.” (2 Korin 9:15, NW) Yes, ransom ya i spesel tumas. ?Be from wanem ransom i spesel moa bitim ol narafala presen we God i givim long ol man? ?Olsem wanem hem i defren long ol narafala presen we God i givim? * ?Mo yumi mas mekem wanem long presen ya? Yu save luk ansa blong Baebol long ol kwestin ya, long tufala nekis haf.