?TAEM WAN RABIS SAMTING I HAPEN, YU TINGBAOT SE ‘WEHEM GOD LONG TAEM OLSEM?’ ?I GAT WAN NOGUD SAMTING I HAPEN LONG YU WE I MEKEM YU YU TINGBAOT SE GOD I NO KEA?

Sila, we i stap long Amerika, i gruap long wan famle we i go long jos oltaem. Hem i talem se: “Stat taem mi smol, mi stap tingbaot God from we hem i mekem yumi. Be mi neva harem se mi klosap long God. Mi ting se hem i stap wajem mi, be i stap longwe. Mi no ting se God i agensem mi, be mi no bilif tu se hem i lavem mi.” ?From wanem Sila i ting se God i no lavem hem? Hem i se: “Famle blong mifala i fesem plante bigfala trabol, mo i luk olsem se God i no givhan nating.”

Olsem Sila, maet yu tu yu harem se God i stap mo i gat olgeta paoa, be hem i no kea long yu. Stret man ya Job, hem tu i gat tingting ya, nating se hem i bilif long paoa mo waes blong God. (Job 2:3; 9:4) Job i kasem plante bigfala trabol, mo i luk olsem se bambae oli gohed nomo. Taswe, hem i askem long God se: “?From wanem yu tanem baksaed long mi? ?From wanem yu stap luk mi olsem wan enemi?”—Job 13:24.

?Baebol i talem wanem? ?God nao i mekem se yumi kasem ol trabol ya? ?I gat sam samting we oli soemaot se God i kea long yumi wanwan? ?I gat rod blong save sipos hem i intres long yu, i save gud yu, i kasem save long filing blong yu, mo i givhan taem yu kasem trabol?

Long Wajtaoa ya, bambae yumi tokbaot ol samting raonabaot long yumi we God i wokem, mo olsem wanem oli tijim yumi se God i kea. (Rom 1:20) Mo tu, bambae yumi luk ol tok blong Baebol we i soemaot se God i kea. Moa we ‘yu save hem’ from ol samting we hem i wokem mo from Tok blong hem, moa we bambae yu sua se hem i ‘stap tingbaot yu.’—1 Jon 2:3; 1 Pita 5:7.