Stat long taem ya we Krieta i wokem ol man, hem i stap toktok wetem olgeta tru long ol enjel mo ol profet. Mo tu, hem i jusum se mesej mo ol promes blong hem oli mas stap long wan buk. Ol promes ya oli save givhan long fiuja blong yu. So, ?tede yu save faenem ol promes ya long weples?

Mesej we God i givim long yumi i stap long Baebol. (2 Timoti 3:16) ?Olsem wanem God i yusum ol profet blong hem blong oli raetem mesej ya? (2 Pita 1:21) God i putum ol tingting blong hem long maen blong sam man, nao oli raetemdaon long buk. Hemia i sem mak tede. Sipos wan bisnesman i yusum wan sekretari blong i raetemdaon wan mesej long bihaf blong hem, bambae yumi luk mesej ya se i kam long bisnesman ya, be i no sekretari. Long sem fasin, nating se God i yusum ol man blong oli raetemdaon mesej blong hem, be Hem nao i Stamba blong Ol Tabu Tok ya.

Mesej blong God i impoten tumas, taswe hem i wantem se olgeta man oli ridim mo kasemsave long hem. Tede “gud nius ya we i blong stap olwe” i kasem ‘olgeta kantri, olgeta laen, mo olgeta lanwis.’ (Revelesen 14:6) Wetem blesing blong God, Tabu Tok blong hem i stap long bitim 3,000 lanwis, we sam oli transletem fulwan mo sam oli transletem sam haf nomo. Buk ya i plante moa i bitim ol narafala buk.