LONG Sarede, 25 Eprel 2015, i gat wan bigfala etkwek long Nepal we paoa blong hem i kasem 7.8. Nepal i wan kantri we i gat plante hil mo i stap klosap long India. Ae blong etkwek ya i stap 80 kilometa notwes long Kathmandu, we i kapital blong Nepal. Bitim 8,500 man oli ded, mo plante taosen man oli no moa gat haos. Hemia fasaem we wan bigfala disasta olsem i kasem Nepal. I gat 2,200 Witnes blong Jehova long kantri ya, mo plante long olgeta oli stap long ol ples we etkwek i bin spolem. Mo sore tumas, wan Witnes mo tu pikinini blong hem oli ded long taem ya.

Wan woman we i wan Witnes, nem blong hem Misel, i talem se: “Plante kongregesen blong ol Witnes, oli gat ol miting long taem we etkwek ya i kam. Be sipos oli bin stap nomo long haos blong olgeta, ating bae i gat plante moa ded.” ?From wanem olgeta we oli go long miting oli sef? From we Haos Kingdom we oli stap long hem, i strong gud.

Oli wokem ol Haos Kingdom long Nepal blong oli no foldaon taem i gat etkwek. Wan man nem blong hem Man Bahadu, we i joen long wok blong bildim ol Haos Kingdom. Hem i talem se: “Plante taem mifala i no kasem save from wanem mifala i mas wokemgud fandesen blong ol Haos Kingdom. !Be, naoia mifala i jes kasem save!” Afta long etkwek, ol Witnes oli yusum ol Haos Kingdom blong ol man oli stap long hem. Ol Witnes blong Jehova mo ol man we oli stap raonabaot long olgeta, oli go stap long ol Haos Kingdom ya. Nating se graon i stap muvmuv smol yet, be olgeta oli harem se oli sef.

Afta long etkwek, kwiktaem nomo ol elda oli stat blong lukaot ol memba blong kongregesen blong olgeta. Wan woman we i wan Witnes, nem blong hem Babita i talem se: “Ol elda oli tingbaot fastaem ol memba blong kongregesen. Mo lav we oli soem i tajem hat blong mifala.” Long nekis dei afta long etkwek, tri memba blong komiti we i lukaot long wok blong ol Witnes long Nepal, wetem ol eria elda, oli stat blong visitim ol kongregesen blong faenemaot samting we oli nidim, mo oli givhan long ol elda long kongregesen.

Sikis dei afta long etkwek, Gari Bro wetem woman blong hem, Rubi we tufala i stap long hedkwota blong ol Witnes long Yunaeted Stet, tufala i kam long Nepal. Ruben we i wan memba blong komiti we yumi tokbaot finis, i talem se: “Afta long etkwek ya, graon i gohed blong seksek, ol haos i brokrok mo ol samting i olbaot, taswe mifala i no sua se brata Bro bambae i kam o no. Be hem i kam, from we hem i wantem tumas blong kam. Ol Witnes long Nepal oli glad tumas blong luk hem.”

Silas we i wok long ofis blong ol Witnes blong Jehova long Nepal, i talem se: “Taem ol telefon oli wok bakegen, ol man oli ringim mifala long dei mo long naet. Hemia ol narafala Witnes raon long wol we oli stap tingbaot mifala. Nating se mifala i no harem save lanwis blong samfala, be mifala i filim se oli  lavem mifala mo oli wantem tumas blong givhan long mifala.”

Afta long etkwek, ol narafala Witnes long Nepal, oli karem ol kakae i kam long Haos Kingdom blong serem wetem ol narafala, mo oli mekem olsem blong sam dei. Mo tu, ol Witnes oli putumap wan Disasta Rilif Komiti, mo ol kantri olsem Banglades, India, mo Japan, oli stat blong sanem plante samting i kam blong givhan. Sam dei i pas, i gat sam dokta blong Yurop we oli ol Witnes blong Jehova, oli kam stap long wan Haos Kingdom. Mo oli givhan kwiktaem long olgeta we oli karekil, mo tu olgeta we oli fraet mo oli harem nogud yet afta long etkwek.

Wan woman nem blong hem Atara, i tokbaot filing we plante long olgeta oli gat. Hem i talem se: “Etkwek ya i nogud tumas mo i mekem man i fraet. Be afta long hem, mifala i fren gud moa wetem ol Kristin brata mo sista blong mifala, i bitim bifo.” Yes, etkwek ya i no spolem lav we ol man blong Jehova oli gat long olgeta, be i mekem lav ya i kam strong moa.