Polusen long win i save distroem ol laef samting long wol. Folem samting we World Health Organization i talem, i gat smol namba blong ol man nomo we oli stap pulum gudfala win.

Polusen long win i save mekem man i kasem ol sik olsem, kansa long lang, mo sik long hat. Mo tu, polusen long win i mekem se i gat samwe 7,000,000 man oli stap ded evri yia.

God i krietem wol long wan fasin we i naf blong givim gudfala win, blong olgeta laef samting oli save pulum. Be hemia i save hapen nomo sipos ol man oli lukaot gud blong no mekem tumas polusen. Traem luk sam long ol eksampol ya.

• Yumi save gud se ol fores oli karemaot kabon daeoksaed long win. Be samting we yumi no save gud hemia se ol natongtong we oli gru long ol wota klosap long solwota, oli mekem gud wok ya i bitim ol fores. Ol natongtong oli karemaot kabon daeoksaed faef taem moa i bitim ol fores.

• Sam stadi we oli mekem i no longtaem, i soemaot se ol bigfala nalumlum olsem kelp, oli karemaot kabon daeoksaed long win, be tu oli berem. Ol lif blong Kelp oli gat ol smol basket we i mekem se oli save flot i go longwe. Mo taem oli go longwe long so, ol smol basket ya oli bosta nao ol lif blong kelp we oli fulap long kabon, oli draon i godaon long botom blong solwota. Mo oli save stap long ples ya blong plante yia.

• Fasin blong win blong klinim hem wan i kam klia long taem blong COVID-19 pandemik. Long 2020, taem bighaf blong ol faktri oli stop mo plante trak i no moa ron, kwiktaem nomo win i kam klin. Folem “2020 World Air Quality Report,” long olgeta kantri we oli stadi long olgeta, i gat bitim 80 pesen blong ol kantri ya we oli faenemaot se smoltaem afta long lokdaon, win i kam klin.

Ol gavman oli gohed blong talem long ol bisnesman we oli gat ol faktri, blong oli daonem polusen long win. Ol saentis tu oli gohed blong traem faenem sam niufala rod blong daonem polusen. Eksampol, oli traem yusum ol smosmol bebet blong tanem ol doti samting long win, i kam ol gudfala samting we i no posen. Mo tu, oli talem se i moa gud ol man oli wokbaot o yusum baskel, i bitim we oli draevem trak. Mo long haos, oli mas traem faenem sam rod blong no yusum ol samting we oli save mekem polusen.

Be folem ripot blong 2022 we i kam long sam oganaesesen long wol, inkludum World Health Organization mo World Bank, i gat plante moa samting blong mekem yet.

Wan ripot i talem se long 2020, samwe 33 pesen blong ol man raon long wol oli stap yusum sam teknoloji mo samting blong kuk we i mekem polusen. Long plante ples, sam man nomo oli naf blong gat ol niu stof o yusum sam kaen fuel we i no mekem tumas polusen.

‘Hemia samting we tru God, Jehova, God Ya We i Wokem heven mo Hem i mekem wol wetem ol samting long hem, mo Hem i givim win long ol man we oli stap long hem, i talem se.’—Aesea 42:5.

God nao i krietem win we yumi stap pulum mo naturol saekol blong hem blong klinim hem wan, mo hem i gat bigfala paoa mo i lavem ol man olwe. Taswe, yumi sua se hem i naf blong tekemaot olgeta samting we i mekem polusen long win. Yu luk haf ya “God i Promes Se Wol Blong Yumi Bambae i Stap.”