Baebol i no talem stret wan samting long saed blong fasin ya blong man i mared wetem man bakegen. Taswe wan kwestin we i moa impoten, hemia se: ?Baebol i talem wanem long fasin ya we man i mekem seks wetem man bakegen?

Plante man oli ting se oli save ansa blong kwestin ya. !Be ol ansa blong olgeta i agensem olgeta bakegen! Hemia from we oli no stadi gud long Baebol. Sam narafala oli talem se Baebol i agensem fasin ya we man i maredem man bakegen. Be sam narafala oli talem se tok ya long Baebol se: ‘Lavem ol man raonabaot long yumi,’ i min se yumi sapotem man we i mekem enikaen fasin blong seks tu.—Rom 13:9.

?Yu ting se weswan long ol tok ya i tru?

1. Baebol i agensem fasin ya we man i mekem seks wetem man bakegen.

2. Baebol i agri long fasin ya we man i mekem seks wetem man bakegen.

3. Baebol i pulum ol man blong oli agensem ol man we oli mekem seks wetem man bakegen.

Ol ANSA:

1. TRU. Baebol i talem se: “Man we i stap slip wetem man . . . bambae oli no save go insaed long niufala wol ya.” (1 Korin 6:9, 10) Hemia i sem mak tu long ol woman. —Rom 1:26.

2. GIAMAN. Baebol i talem se man mo woman we tufala i mared, tufala nomo i gat raet blong slip tugeta.—Jenesis 1:27, 28; Ol Proveb 5:18, 19.

3. GIAMAN. Nating we Baebol i agensem fasin ya blong man i slip wetem man bakegen, be hem i no leftemap fasin ya blong no laekem narafala, mo i no leftemap ol rabis fasin we ol man oli mekem, mo i no leftemap eni narafala nogud fasin we man i mekem long man we i slip wetem man bakegen.—Rom 12:18. ^[1]

Ol Witnes blong Jehova oli bilif se ol loa blong Baebol oli save givhan long laef blong olgeta, mo oli jusum blong folem ol loa ya. (Aesea 48:17) ^[2] From samting ya, oli agensem olgeta nogud fasin blong seks, wetem fasin ya we man i mekem seks wetem man bakegen. (1 Korin 6:18) ^[3] Hemia nao fasin blong laef we ol Witnes oli jusum mo oli wantem folem.

Be long semtaem ol Witnes blong Jehova oli “traehad blong joen gud wetem ol narafala man.” (Hibru 12:14) Nating se oli no agri long fasin ya we man i mekem seks wetem man bakegen, be oli no fosem ol narafala blong oli folem bilif blong olgeta, mo oli no joen wetem ol narafala blong agensem ol man we oli mekem rabis fasin ya, mo oli no glad taem oli harem ol man oli stap mekem ol fasin ya. Ol Witnes blong Jehova oli traehad blong folem Nambawan Rul ya blong mekem i gud long ol narafala, olsem we oli wantem blong narafala i mekem i gud long olgeta.—Matiu 7:12.

Sam man oli talem se Baebol i leftemap fasin ya blong no laekem man we i mekem seks wetem man, taswe olgeta we oli folem Baebol, olgeta tu oli no laekem ol man ya. Oli talem se: ‘Baebol, oli raetem long wan taem we tingting blong ol man i sat yet. Be tede yumi laekem ol man blong ol defren kantri, mo laen, mo we oli mekem enikaen fasin blong seks.’ Ol man ya oli ting se ol man we oli no agri wetem fasin ya, oli no laekem tu ol man we kala blong skin blong olgeta i defren. ?Tingting ya i stret? !Nogat! ?From wanem?

Hemia from we fasin blong no laekem man we i mekem fasin ya, i defren long fasin blong no laekem fasin ya. Baebol i talem se ol Kristin oli mas respektem olgeta kaen man. (1 Pita 2:17) ^[4] Be hemia i no min se ol Kristin oli mas agri long enikaen fasin we ol man oli mekem.

Traem tingbaot sipos yu yu no laekem smok nating from we i save spolem helt blong yu, be wan fren blong yu long wok i stap smok. ?Olsem wanem? ?Hemia i min se tingting blong yu i sat from we tingting blong yu i defren long tingting blong hem? From we yu yu no smok, ?hemia i min se yu yu no laekem fren blong yu? Sipos fren blong yu i wantem se yu jenisim tingting blong yu long saed blong smok, ating hem nao tingting blong hem i sat mo i no laekem yu. ?I tru?

Ol Witnes blong Jehova oli jusum blong laef folem ol rul blong Baebol. Oli agensem ol fasin we Baebol i agensem. Be oli no jikim mo oli no spolem ol man we oli mekem fasin we i defren long olgeta.

?Olsem wanem long ol man we oli wantem mekem seks wetem man bakegen? ?Olgeta ya oli bon wetem tingting ya finis? Sipos yes, ?Baebol i strong tumas, taem i talem se oli no mas mekem samting we olgeta nomo oli wantem?

Baebol i no tokbaot wan man we taem hem i bon hem i gat tingting ya finis blong mekem seks wetem man. Be Baebol i tokbaot sam man we longtaem finis i kam, oli gat sam nogud fasin. Nating se i olsem, Baebol i talem se i gat sam fasin we ol man oli mas sakemaot sipos oli wantem mekem God i glad, hemia i minim tu fasin ya we man i mekem seks wetem man.—2 Korin 10:4, 5.

Sam man oli talem se tingting ya blong Baebol i strong tumas. Oli talem se yumi mas folem ol filing blong yumi nomo, mo oli talem se ol filing blong seks oli impoten tumas, yumi no mas blokem mo yumi no save kontrolem. Be Baebol i talem se ol man oli save blokem samting we olgeta nomo oli wantem. Oli no olsem ol anamol we oli mekem nomo samting we oli wantem.—Kolosi 3:5. ^[5]

Traem tingbaot: Sam man blong stadi oli talem se sam fasin olsem kros, oli kamaot from we man i bon wetem. Be Baebol i no talem wan samting long saed ya, be hem i talem se sam man oli “man blong kros kwik” mo oli ‘man blong faerap.’ (Ol Proveb 22:24; 29:22) Be hem i talem tu se, yumi mas lego fasin ya blong kros mo faerap.—Ol Sam 37:8; Efesas 4:31.

 Maet sam man oli no agri long advaes ya mo oli talem se advaes ya i spolem olgeta we oli gat fasin ya. Be blong talem stret, ol man ya blong stadi we oli bilif se kros i kamaot from laen, oli mekem plante samting blong halpem ol man blong oli kontrolem olgeta taem oli kros.

Ol Witnes blong Jehova oli agensem enikaen fasin we Baebol i agensem, wetem fasin ya we man i mekem seks wetem woman be tufala i no mared. Oli folem advaes ya blong Baebol we i talem se: “Yufala evriwan i lanem fasin ya we man i tekem woman blong hem long fasin we i klin gud, i blong ona nomo. Bambae yufala i no folem ol rabis fasin wetem woman we tingting blong yufala nomo i wantem.” —1 Tesalonaeka 4:4, 5.

Long taem blong ol fas Kristin, ol man oli gat defdefren fasin blong laef, be taem oli wantem kam Kristin oli mekem sam bigfala jenis long laef blong olgeta. Eksampol, Baebol i talem se sam ‘oli stap ronem woman, sam oli stap prea long ol narafala god ... mo sam oli stap slip wetem woman blong narafala man . . . mo sam man oli stap slip wetem man, mo sam woman oli stap slip wetem woman,’ mo biaen hem i gohed se: “Bifo, sam long yufala oli olsem.”—1 Korin 6:9-11.

?Taem Baebol i talem se “bifo sam long yufala oli olsem,” hemia i min se olgeta we oli stop blong mekem seks wetem man bakegen, bambae oli no moa gat tingting ya blong mekem fasin ya? Si, hemia from we Baebol i talem tu se: “Yufala i mas gohed blong wokbaot folem tabu spirit, nao bambae yufala i no mekem nating ol nogud samting we yufala nomo i wantem.”—Galesia 5:16.

Baebol i no talem se wan Kristin bambae i neva gat wan nogud tingting. Be hem i talem se wan man no wan woman i save jusum blong no mekem samting we hem nomo i wantem. Ol Kristin oli lanem blong bos long filing blong olgeta, mo blong no putum tingting blong olgeta long fasin ya.—Jemes 1:14, 15. ^[6]

Baebol i soemaot se tingting blong wantem mekem wan samting i defren long fasin ya blong mekem samting. (Rom 7:16-25) Wan man we i gat tingting ya blong mekem seks wetem man, hem i save kontrolem tingting ya, sem mak olsem we hem i save kontrolem tingting blong hem taem hem i kros, no i wantem mekem adaltri, no hem i gat tingting blong griri.—1 Korin 9:27; 2 Pita 2:14, 15.

Ol Witnes blong Jehova oli tinghae long ol rul we oli stap long Baebol, be oli no fosem ol narafala blong oli folem tingting blong olgeta, mo oli no traem jenisim loa blong ol man ya blong mekem i laenap wetem bilif blong olgeta. Tijing we ol Witnes blong Jehova oli folem, i mekem i gud long man, mo oli talemaot long ol man we oli wantem lesin.—Ol Wok 20:20.