SAM NIUS BLONG WOL | AMERIKA
Not Mo Saot Amerika
Ol nius we i kamaot long ol ples long Amerika oli soemaot se ol waes advaes blong Baebol i stret yet tede.
I NOGUD BLONG JEKEM IMEL OLTAEM
Ol man we oli mekem risej long Vancouver long Kanada, oli faenemaot se taem man i jekem imel tri taem nomo long wan dei be i no oltaem, hem i no save wari tumas. Kostadin Kushlev we i lidim ol man blong mekem risej, i talem se: “Ol man oli hareap tumas blong jekem imel oltaem, be hemia i mekem se oli wari tumas. Sipos oli blokem fasin ya, oli no save wari tumas.”
YU TRAEM TINGBAOT: Naoia ‘laef i kam strong tumas’ mo ol man oli wari bitim mak. ?Taswe yu ting se i stret we yumi traem faenem rod blong daonem wari?—2 Timoti 3:1.
OL LAEF SAMTING LONG SOLWOTA OLI KAM PLANTE BAKEGEN Wan ripot blong Wildlife Conservation Society (WCS) i talem se: “Long plante ples long Belis mo Karibin, ol sel, naura, mo fis oli stap kam plante bakegen. Hemia from we gavman i putum tabu long ol man se oli no mas tekemaot olgeta. Ripot ya i gohed se: “Tabu ya i mekem se ol ples ya oli kamgud kwiktaem bitim ol ples we ol man oli gohed blong tekemaot ol laef samting long solwota. Maet long 1 kasem 6 yia nomo, oli save kam plante bakegen, be blong kam gud fulwan . . . bambae i tekem moa long 20 yia.” Janet Gibson, wan bos blong WCS, i tokbaot Belis se: “I klia se tabu ya i givhan bigwan long ol laef samting long solwota, blong oli kam plante bakegen.”
YU TRAEM TINGBAOT: Fasin blong ol laef samting we i save kam plante bakegen kwiktaem, i soemaot se God ya we i wokem olgeta i waes tumas.—Ol Sam 104:24, 25.
RAF FASIN LONG BRASIL Wan grup we i raetem ol stori long niuspepa (Agência Brasil) i talem se raf fasin i stap kam antap long Brasil. Ministri blong Helt i talem se long yia 2012, i gat 56,000 man oli ded from we narafala i kilim olgeta. Namba ya i hae moa bitim ol narafala yia bifo. Wan haeman blong sekiuriti, Luís Sapori, i ting se hemia from we ol man oli no moa tinghae long ol gudfala fasin. Hem i talem se, taem ol man oli no moa respektem loa blong kantri, “oli kilim narafala blong kasem samting we oli wantem.”
