Namba Fo Giaman Tingting: God i Wan Triniti

?Giaman tingting ya i kamaot long weples? “Maet ol man oli save talem se Triniti i wan tijing we i jes stanap klosap long yia 400 K.T. nomo. Long wan rod, tok ya i tru . . . Bifo long taem ya, tijing ya “tri Man long wan God” i no stanap strong yet, mo ol man we oli talem se oli Kristin oli no bilif mo folem tijing ya fulwan.”—New Catholic Encyclopedia (1967), Buk namba 14, pej 299.

“Long 20 Mei 325 [K.T.], Kaonsel blong Nisia i sidaon. Constantine hem wan i jeaman. Hem i lidim ol storian, mo hem i talem long olgeta long miting ya . . . wanem bilif long saed blong Kraes mo God we oli mas putumap olsem tijing blong jos, hemia se, ‘Kraes mo Papa God tufala i sem man.’ . . . From we ol bisop oli fraet long hedgavman ya, oli saenem pepa blong akseptem bilif ya, tu bisop nomo tufala i no saenem. Plante we oli saenem, oli no rili agri long bilif ya.”—Encyclopædia Britannica (1970), Buk namba 6, pej 386.

?Baebol i talem wanem? “Steven, Tabu Spirit i fulap long hem, mo hem i lukluk i go antap long heven. Nao hem i luk God, we hem i King, i stap sidaon long bigfala jea blong hem, mo Jisas i stap stanap long raet saed blong hem. Nao hem i talem se, ‘Yufala i luk. Mi mi luk we heven i open, mo we Pikinini blong Man hem i stap stanap long raet saed blong God.’”—Ol Wok 7:55, 56.

?Vison ya i soemaot wanem? Paoa blong God i fulap long Steven, nao hem i luk Jisas we i “stap stanap long raet saed blong God.” I klia se afta we Jisas i laef bakegen mo i gobak long heven, hem i no kam God, be hem i wan spirit man we i defren long God. Long vison ya, Steven i no luk wan narafala man bakegen we i stap klosap long God, olsem we i gat tri man. Wan pris we i blong grup ya Dominikan mo we nem blong hem Marie-Émile Boismard, i traem blong faenem sam vas blong Baebol we oli sapotem tijing blong Triniti. Ale hem i raetem long buk blong hem [À l’aube du christianisme — La naissance des dogmes (At the Dawn of Christianity — The Birth of Dogmas)], se: “I no gat wan ples long Niutesteman we yumi save ridim se . . . i gat tri man long wan God.”

Constantine i stanemap bilif ya blong stopem raorao we i stap gohed insaed long Jos long ol yia 300 K.T. Be tijing ya i mekem wan narafala kwestin i kamaot, se: ?Meri, woman ya we i bonem Jisas, hem i “Mama blong God”?

Skelem ol vas ya blong Baebol: Matiu 26:39; Jon 14:28; 1 Korin 15:27, 28; Kolosi 1:15, 16, NTB.

SAMTING WE I TRU:

Tijing ya blong Triniti i jes kamaot klosap long ol yia 400 K.T.

[Credit Line long pej 7]

Museo Bardini, Florence