WAN man blong mekem risej, i askem kwestin long bitim 800 yangfala, we oli blong ol defdefren jos. Hem i askem long olgeta sipos oli bilif se Jisas nao i stap ansa long prea blong olgeta. Bitim 60 pesen oli agri, be i gat wan yangfala we i no agri, mo hem i talem se “God” nao i stap ansa long ol prea.

?Wanem tingting blong yu? ?I stret blong yumi prea long Jisas, no long God? * Blong faenem ansa, i gud yumi luk olsem wanem Jisas i tijim ol disaepol blong hem blong oli prea.

Jisas i tijim mo i soemaot long yumi se hu ya man we yumi mas prea long hem.

TIJING BLONG HEM: Taem wan long ol disaepol blong Jisas i askem long hem se: “Masta. Plis yu tijim mifala, blong mifala i prea,” Jisas i ansa se, “Taem yufala i prea, bambae yufala i talem se, ‘Papa.’” (Luk 11:1, 2) Bakegen, long tok blong Jisas antap long hil, Jisas i talem long ol man we oli stap lesin se oli mas prea. Hem i se: ‘Yufala i prea long Papa ya blong yufala.’ Mo tu hem i promes long olgeta se: “Taem yufala i no askem ol samting long Papa blong yufala yet, be hem i save finis ol samting we yufala i sot long hem.” (Matiu 6:6, 8) Long laswan naet blong Jisas long wol ya, hem i talem long ol disaepol blong hem se: “Sipos yufala i askem samting long Papa blong mi long nem blong mi, bambae hem i save givim long yufala.” (Jon 16:23) Yes, Jisas i tijim yumi blong prea i go long Jehova God, we hem i Papa blong hem mo i Papa blong yumi tu.—Jon 20:17.

EKSAMPOL BLONG HEM: Jisas i mekem samting we hem i tijim long ol man, nao hem i prea se: “Papa, yu yu Hae God yu Masta blong olgeta samting long heven mo long wol.” (Luk 10:21) Long wan narafala taem “Jisas i lukluk i go antap, i talem se, ‘Papa. Mi mi talem tangkiu long yu from we yu harem prea blong mi.’” (Jon 11:41) Mo bifo we Jisas i ded hem i prea se: “!Papa! !Mi mi putum laef blong mi long han blong yu!” (Luk 23:46) Jisas i soemaot wan gudfala eksampol long yumi evriwan taem hem i prea i go long Papa blong hem we i “Masta blong olgeta samting long heven mo long wol.” (Matiu 11:25; 26:41, 42; 1 Jon 2:6) ?Olsem wanem? ?Ol disaepol blong Jisas oli kasem save ol tok we hem i talem?

Sam wik nomo afta we Jisas i gobak long heven, ol man we oli agensem ol disaepol blong hem, oli tok strong mo oli wantem kilim olgeta. (Ol Wok 4:18) I tru, long taem ya ol disaepol oli prea, ?be oli prea long hu? Baebol i talem se: “Olgeta evriwan oli joen blong prea long God,” oli prea se hem bambae i gohed blong givhan long olgeta ‘long nem blong Jisas, we i Tabu Man blong wok blong hem.’ (Ol Wok 4:24, 30) Taswe ol disaepol oli folem gud ol advaes we Jisas i tijim long olgeta. Oli prea i go long God, i no long Jisas.

Sam yia biaen aposol Pol i tokbaot, olsem wanem hem wetem sam narafala Kristin oli prea. Long leta blong hem we i go long ol Kristin hem i talem se: “Oltaem, taem mitufala i stap prea from yufala, mitufala i stap talem tangkiu long God ya we i Papa blong Jisas Kraes, Masta blong yumi.” (Kolosi 1:3) Mo tu, long wan narafala leta blong Pol we i go long ol Kristin, hem i talem se: “Oltaem, yufala i mas talem tangkiu long God, Papa blong yumi, from olgeta samting, long  nem blong Jisas Kraes, Masta blong yumi.” (Efesas 5:20) Yumi luk se ol tok blong aposol Pol oli leftemap tingting blong ol narafala blong oli prea long “God ya we i Papa blong yumi” from evri samting. Be oli mas sanem prea ya i go long nem blong Jisas.—Kolosi 3:17.

Olsem ol fas Kristin, yumi save soemaot se yumi lavem Jisas taem yumi folem ol advaes blong hem long prea. (Jon 14:15) Taem yumi prea long Papa blong yumi long heven bambae yumi sua se Jehova i save harem ol prea blong yumi, olsem Sam 116:1, 2 we i talem se: “Mi mi lavem Hae God tumas, from we oltaem hem i stap lesin long mi . . . Bambae mi stap prea long hem oltaem long laef blong mi.” *