Bigfala Babilon we buk blong Revelesen i tokbaot, hem i pija blong olgeta giaman skul long wol, we God i no wantem olgeta. a (Revelesen 14:8; 17:5; 18:21) Nating se ol skul ya oli defdefren, be olgeta evriwan oli lidim ol man oli gowe long wosip blong trufala God, Jehova.—Dutronome 4:35.

Luksave Bigfala Babilon

1.   Bigfala Babilon i wan pijatok. Baebol i tokbaot hem olsem “wan woman” mo “bigfala prostitut ya” we nem blong hem i “wan tokhaed, hemia: Bigfala Babilon.” (Revelesen 17:1, 3, 5) Long buk blong Revelesen i gat “ol saen,” taswe i stret se Bigfala Babilon tu i wan saen nomo, be i no wan prapa woman. (Revelesen 1:1) Mo tu, hem i “sidaon long plante wota,” we i minim “ol man, mo ol hip blong ol man, mo ol nesen, mo ol lanwis.” (Revelesen 17:1, 15) Wan prapa woman i no save mekem samting ya.

2.   Bigfala Babilon i stap long olgeta kantri blong wol. Hem i “bigfala taon ya we kingdom blong hem i rul antap long olgeta king blong wol.” (Revelesen 17:18) Taswe, hem i gat paoa long olgeta ples long wol.

3.   Bigfala Babilon i minim ol skul, i no politik mo ol bisnes. Babilon bifo i wan taon we i gat fulap jos long hem, mo ol man oli save taon ya from “ol majik” mo “wok blong kleva” we i gohed long hem. (Aesea 47:1, 12, 13; Jeremaea 50:1, 2, 38) Blong talem stret, long taon ya oli mekem wosip long ol giaman god, we i agensem wosip blong trufala God, Jehova. (Jenesis 10:8, 9; 11:2-4, 8) Ol flas rula blong Babilon oli leftemap olgeta antap long Jehova mo wosip blong hem. (Aesea 14:4, 13, 14; Daniel 5:2-4, 23) Long sem fasin, ol man oli save Bigfala Babilon from we hem i joen long wok blong ol rabis spirit. Hemia i soemaot se hem i wan oganaesesen blong ol skul.—Revelesen 18:23.

    Bigfala Babilon i no politik, from we “ol king blong wol” oli stap krae taem hem i lus. (Revelesen 17:1, 2; 18:9) Mo tu, hem i no minim ol bisnes, from we Baebol i soemaot se hem i defren long “ol bisnesman blong wol ya.”—Revelesen 18:11, 15.

4.   Bigfala Babilon i gat sem fasin olsem ol giaman skul. Ol giaman skul oli no tijim ol man blong oli kam klosap moa long trufala God Jehova, be oli lidim ol man blong oli wosipim ol narafala god. Baebol i talem se oli “mekem wok blong prostitut wetem ol narafala god.” (Levitikas 20:6; Eksodas 34:15, 16) Tijing ya Triniti, mo sol i no save ded, mo wosip blong ol aedol, i stat long Babilon bifo, mo i stap gohed yet long ol giaman skul. Mo tu, ol skul ya oli laekem ol samting blong wol, mo oli joenem ol samting ya wetem wosip blong olgeta. Baebol i talem se, long saed blong wosip, oli olsem woman we i mekem adaltri wetem narafala man.—Jemes 4:4.

    Baebol i talem se Bigfala Babilon i werem klos we “i pepol mo i laet red” mo “i flasem hem long ol samting we oli wokem long gol mo long ol sas ston mo long ol perel.” Hemia i stret long ol rij samting we ol giaman skul oli gat, mo fasin blong olgeta blong soem ol rij samting ya. (Revelesen 17:4) Bigfala Babilon hem i stamba blong “ol nogud samting blong wol ya we oli nogud olgeta,” hemia ol tijing mo aksen we oli sakem doti long nem blong God. (Revelesen 17:5) Olgeta we oli joen long ol giaman skul, hemia “ol man, mo ol hip blong ol man, mo ol nesen, mo ol lanwis” we oli sapotem Bigfala Babilon.—Revelesen 17:15.

 Bigfala Babilon i gat fol from ded blong “olgeta man we ol man oli kilim olgeta i ded long wol.” (Revelesen 18:24) Long olgeta yia we i pas, ol giaman skul oli statem plante faet, mo oli sapotem wok blong ol teroris, mo tu, oli no tijim ol man long trutok long saed blong God ya blong lav, Jehova. (1 Jon 4:8) Hemia i mekem se ol man oli stap kilkilim olgeta i ded. From samting ya, ol man we oli wantem mekem God i glad, oli mas “kamaot long hem,” i min se oli mas seraot long ol giaman skul.—Revelesen 18:4; 2 Korin 6:14-17.