Te Jesu wa gi emwa rẹn wẹẹ, ọ khẹke ne iran gha rrọọ vbe ọfunmwegbe. Sokpan, ọ mwẹ asẹ ọkpa nọ ya tama avbe ukọ ọghẹe wẹẹ: “Uwa ghẹ roro ẹre wẹẹ, te I rhie ọfunmwegbe gha die agbọn na; I ma rhie ọfunmwegbe rre, sokpan, umozo ẹre I rhie rre. Te I rre do si ighaegbe ye uwu ẹkpo ọmokpia kevbe erhae, ye uwu ẹkpo ọmokhuo kevbe iyẹe, ye uwu ẹkpo amwẹ ọmọ kevbe iye ọdọ ọre.” (Mat 10:​34, 35) Vbe Jesu a ya ẹmwẹ na kha?

E Jesu ma do si ighaegbe ye uwu ẹgbẹe, sokpan ọ rẹn wẹẹ, emwi ne irẹn maa emwa re gha si ighaegbe ye uwu ẹgbẹe eso. Rhunmwuda ọni, te ọ khẹke ne emwa ni hoo ne iran dinmwiamẹ zẹvbe erhuanegbe Kristi rẹn wẹẹ, ẹgbẹe ọghe iran sẹtin kpokpo iran. Adeghẹ ọmwa ne iran gba rre orọnmwẹ, ra ọmwa ọvbehe vbe uwu ẹgbẹe na gha kpokpo iran, ọ sẹtin gha lọghọ ne iran gha ya imamwaemwi ọghe Kristi ru emwi.

E Baibol tama Ivbiotu e Kristi wẹẹ, ne iran “hia vbe odẹ ke odẹ ne iran gu emwa hia gha rrọọ vbe ọfunmwegbe.” (Rom 12:18) Sokpan imamwaemwi ọghe Jesu sẹtin yevbe na ghee “umozo” vbe ẹgbẹe eso. Odẹ vbo? Ọmwa sẹtin miẹn imamwaemwi ọghe Jesu yi, emwa rẹn vbe uwu ẹgbẹe ghi gha gbodan yọ ra iran sẹtin vbe gha kpokpo ẹre. Ọ gha sunu vbenian, ọni rhie ma wẹẹ, te emwa rẹn vbe uwu ẹgbẹe ghi khian oghian ẹnrẹn rhunmwuda, nọ na miẹn odẹ ẹmwata yi.​—Mat 10:36.

Ọ mwẹ ẹghẹ eso ne erhuanegbe Kristi ni waan rẹn vbe ẹgbẹe nẹi ga e Jehova ya werriẹ aro daa ọlọghọmwa eso, nọ rhie ẹre ma deghẹ iran gele hoẹmwẹ e Jehova kevbe Jesu. Vbe igiemwi, emwa iran vbe uwu ẹgbẹe nẹi ga e Jehova, sẹtin tama iran ne iran do deba iran do ugie nọ ma gua ilele ọghe Osanobua ro. Ọ gha de vbenian, de ọmwa ne iran khian ya ẹko rhiẹnrhiẹn? E Jesu khare wẹẹ: “Ọmwaikọmwa nọ hoẹmwẹ erhae, ra iyẹe sẹ mwẹ, ma sẹ nọ khian gha re ọrhuanegbe mwẹ.” (Mat 10:37) Sokpan ẹi re te Jesu ya ọna kha wẹẹ, ọmwa ghaa hoo nọ gha re ọrhuanegbe ẹre, ẹi khian sẹtin hoẹmwẹ evbibiẹ ọre vbene ọ khẹke. Sokpan emwi nọ yae kha ọre wẹẹ, ne iran rẹn emwi nọ ru ekpataki sẹ vbe ẹdagbọn iran. Adeghẹ emwa ima vbe uwu ẹgbẹe na gha kpokpo ima rhunmwuda wẹẹ ima ga e Jehova, te ima khian ye hoẹmwẹ iran, sokpan ma rẹn wẹẹ, ahoẹmwọmwa ne ima mwẹ ne Osanobua ẹre ọ khẹke nọ wegbe sẹ.

Ẹmwata nọ rrọọ ọre wẹẹ, ma i ghọghọ vbe ẹgbẹe ọghe ima ghaa kpokpo ima. Ọrheyerriọ erhuanegbe Jesu i mianmian emwi ne Jesu tae. Ọ khare wẹẹ: “Ọmwaikọmwa nọ ma vbe mu erhan irrioya ọghẹe, nọ gha lele mwẹ khian, ma sẹ nọ khian gha re ọrhuanegbe mwẹ.” (Mat 10:38) Ọni rhie ma wẹẹ, ọ khẹke ne erhuanegbe Kristi mu egbe ne iran khian ya zin egbe ukpokpo nọ ke obọ ẹgbẹe ọghe iran rre. Vbe uwu ena hia, iran ye ya aro yọ wẹẹ, uyinmwẹ esi ọghe iran sẹtin ya ẹgbẹe ọghe iran fi werriẹ vbe ẹdẹ ọkpa, iran ghi vbe do suẹn gha ruẹ e Baibol.​—1 Pit 3:​1, 2.