ERHA e John keghi dinmwiamẹ zẹvbe Osẹe Jehova vbe ovbi ẹvbo ne a tie ẹre Gujarat vbe India vbe odẹ ukpo 1950. Te John, etiọn rẹn isẹn nikpia, etiọn rẹn nikhuo kevbe iyẹe wa gha gbodan ye ugamwẹ erha iran rhunmwuda, e sọs e Catholic ẹre iran mu yan uhunmwu.

Ẹdẹ ọkpa, erha e John keghi gie ẹre nọ rhie ẹnvẹlop gie ọtẹn ọkpa. Vbe owiẹ nii, e John keghi fian ikpianbọ re vbe ọ khian we ẹgbẹdin rua. Ọ wa dae. Ọrheyerriọ, ọ na ya usọmwẹ ukpọn gbalọ nene obọ nọ ghaa tue esagiẹn, vbe iyeke ọni, ọ na gha rhie uhunmwu ne erha gie ẹre.

E John ghi sẹ evba, ọvbokhan ọtẹn nokpia ne erha gie ẹre uhunmwu gie, ẹre ọ do vba vbe owa. Osẹe Jehova vbe nọ. Ọtẹn nokhuo na khian ghi miẹn John ẹnvẹlop, ọ keghi bẹghe ẹre wẹẹ ọ fian obọ. Ọ na gue John hiẹre, ọ na gbe ukhunmwu yọ, ọ ke do gbalọe. Vbe iyeke ọni, ọ keghi gbe eti ne John. Vbuwe ẹghẹ na, ọtẹn nokhuo na, kegha ya urhu ne khuẹrhẹ kporhu ma rẹn.

Rhunmwuda obọ esi ne ọtẹn nokhuo na ya muẹn, aro ne John te ya ghee Avbe Osẹe Jehova na suẹn gha fiwerriẹ. Ọ keghi nọ ọtẹn nokhuo na ọta eva, nọ dekaan imamwaemwi eva ọghe Avbe Osẹe Jehova nọ lughaẹn ne ọghe ugamwẹ ọvbehe. Ọ keghi nọ deghẹ Jesu ọre Osanobua kevbe deghẹ ọ khẹke ne Ivbiotu e Kristi gha na erhunmwu gie Meri. Ọtẹn nokhuo na, ka ruẹ vbene a ya zẹ urhuẹvbo e John nọ re Gujarati, urhuẹvbo na, ẹre ọ ghi wa ya zẹ ewanniẹn ye inọta ọghe John. Vbe iyeke ọni, ọ na rhie ebe ẹmu nẹẹn, nọ mwẹ uhunmwuta nọ khare wẹẹ “This Good News of the Kingdom.”

Vbe John ghi tie ebe na, ọ keghi wa rẹn wẹẹ ẹmwata nọ rre Baibol ẹre na khin. ọ na vbe ya nọ ohẹn e sọs nọ yo, ọta eva nọ ka nọ ọtẹn nokhuo re. Ohu keghi mu ohẹn nii sẹrriọ wẹẹ, ọ na fi e Baibol gbe John. Ọ na gha vannọ mu e John wẹẹ: “U wa khian Esu! Do ma mwẹ re ehe ne Baibol na wẹẹ Jesu i re Osanobua. I wẹẹ ne u ma mwẹ re ehe ne Baibol na kha wẹẹ ne u ghẹ ga e Meri. Ma mwẹ re!” Te egbe wa wọọ e John rhunmwuda vbene ohẹn nii ya gha fi ọkpanike, ọ na wa yọ ọkpankpan ye John egbe. Evba nii e John na tama ne ohẹn wẹẹ, I ghi werriegbe lae sọs e Catholic.” Ọ ma ghi gele laọ!

Avbe Osẹe Jehova na ghi suẹn gha gue John ruẹ e Baibol, ọ keghi miẹn odẹ ọghe ẹmwata yi, ọ na khian Osẹe Jehova. Ọ ghi sẹ ẹghẹ, etien John nibun keghi do deba odẹ ọghe ẹmwata. Agharhemiẹn wẹẹ ọ sẹ odẹ ukpo 60 ne ẹtẹ nii ghi rrie, ama nii ye rre John obọ do fi ebanban. Ọ ma mianmian hiehie obọ esi ne ọtẹn nokhuo nii ya muẹn, nọ ghi zẹe wẹẹ ọ do rẹn odẹ ọghe ẹmwata.—2 Kọr. 6:4, 6.