KALANSEN 26
Mun na ko jugu ani tɔɔrɔw bɛ ka kɛ?
Ni ko juguba dɔ kɛra mɔgɔw ka teli ka nin ɲininkali kɛ: “Mun na nin kɛra?” An nisɔndiyalenba don bawo Bibulu bɛ o ɲininkali jaabi di.
1. Sitanɛ ye ko jugu lana diɲɛ kɔnɔ cogo di?
Sitanɛ Sendonbaga murutira Ala ma. Sitanɛ tun b’a fɛ ka tɔw mara, o la a ye mɔgɔ fɔlɔw, Hadama ni Hawa bila olu fana ka muruti Ala ma. Sitanɛ ye o kɛ a kɛtɔ ka nkalon tigɛ Hawa ye. (Jenɛse 3:1-5) A y’a bila a k’a miiri ko Jehova tun bɛ ka a jɛn fɛn ɲuman dɔ la. Sitanɛ tun bɛ k’a jira o fɛ ko ni mɔgɔw tun tɛ Ala kan minɛ, u tun bɛ hɛrɛ min na, u tun na hɛrɛ sɔrɔ min ka bon ni o ye. Sitanɛ ye nkalon fɔlɔ tigɛ a kɛtɔ k’a fɔ Hawa ye ko a tɛna sa. O de la Bibulu bɛ Sitanɛ wele “nkalontigɛla” ani “nkalon fa”.—Yuhana 8:44.
2. Hadama ni Hawa y’a sugandi ka mun kɛ?
Jehova tun bololabilalenba don Hadama ni Hawa ye. A y’a fɔ u ye ko u bɛ se ka Edɛn nakɔtu la jiridenw bɛɛ dun fo jiriden kelenpe. (Jenɛse 2:15-17) Nka o bɛɛ n’a ta, u y’a latigɛ ka o jiriden dun. Hawa “ye o den dɔ ta k’a dun”. O kɔ, Hadama “fana y’a dun.” (Jenɛse 3:6) U fila bɛɛ ye Ala kan bila. Ikomi Hadama ni Hawa tun dafalen don, ko ɲuman kɛli tun man gɛlɛn hali dɔɔnin u bolo. Nka u kɛlen k’a bɔ u yɛrɛ la ka Ala kan bila, u ye jurumu kɛ ani u banna Ala ka u mara. O latigɛli ye tɔɔrɔba lase u ma.—Jenɛse 3:16-19.
3. Hadama ni Hawa ka latigɛli ye nɔ jumɛn bila an na?
Hadama ni Hawa kɛlen ka jurumu kɛ, u kɛra mɔgɔ dafabaliw ye, o cogo la, u ye dafabaliya lase u denw bɛɛ ma. Bibulu b’a fɔ Hadama ko la ko: “Jurumu donna diɲɛ la mɔgɔ kelen barika la, saya fana donna jurumu barika la. Saya sera Hadamadenw bɛɛ ma ten”.—Romɛkaw 5:12.
An bɛ ka tɔɔrɔ kun caman kosɔn. Tuma dɔw la an bɛ tɔɔrɔ k’a sababu kɛ latigɛli kolonw ye an ye minnu kɛ. Tuma dɔw la an bɛ tɔɔrɔ k’a sababu kɛ latigɛli kolonw ye mɔgɔ wɛrɛw ye minnu kɛ. Tuma dɔw la fana an bɛ tɔɔrɔ ka d’a kan an bɛ yɔrɔ jugu la ani waati la fana min bɛnnen tɛ.—Waajulikɛla 9:11 kalan.
DƆ FARA I KA DƆNNIYA KAN
Ko jugu ani tɔɔrɔ minnu bɛ diɲɛ kɔnɔ bi, olu tɛ Ala nɔ ye, an ka o kun sɛgɛsɛgɛ. An b’a lajɛ fana an ka tɔɔrɔw bɛ min kɛ Ala la.
4. An ka tɔɔrɔw ye mɔgɔ min nɔ ye
Mɔgɔ caman dalen b’a la ko Ala de bɛ ka diɲɛ bɛɛ mara. Nka yala o ye tiɲɛ ye wa? A’ye WIDEYO lajɛ.
Yakuba 1:13 ani 1 Yuhana 5:19 kalan, o kɔ aw ka baro kɛ nin ɲininkali kan:
-
Yala tɔɔrɔw ani ko jugu ye Ala nɔ ye wa?
5. Sitanɛ ka mara kɔlɔlɔw
Jenɛse 3:1-6 kalan, o kɔ aw ka baro kɛ nin ɲininkaliw kan:
-
Sitanɛ ye nkalon jumɛn de tigɛ?—Tilayɔrɔdenninw 4 ani 5 lajɛ.
-
Sitanɛ y’a jira cogo di ko Jehova tun bɛ ka mɔgɔw jɛn fɛn ɲuman dɔ la?
-
Ka kɛɲɛ ni Sitanɛ ka fɔta ye, yala Hadamadenw mago bɛ Jehova ka mara la walasa ka kɛ hɛrɛ la wa?
Waajulikɛla 8:9 kalan, o kɔ aw ka baro kɛ nin ɲininkali kan:
-
Kabini Jehova tɛ ka nin diɲɛ mara, mun de kɛra?
-
Hadama ni Hawa tun ye mɔgɔ dafalenw ye ani u tun bɛ alijinɛ kɔnɔ. Nka u ye Sitanɛ lamɛn ani ka muruti Jehova ma
-
Murutili kɛlen kɔ, diɲɛ fara jurumu, tɔɔrɔw ani saya la
-
Jehova bɛna jurumu, tɔɔrɔw ani saya ban. O la, Hadamadenw bɛ segin ka kɛ mɔgɔ dafalenw ye ani ka ɲɛnamaya kɛ alijinɛ kɔnɔ
6. An ka tɔɔrɔw bɛ nɔ bila Jehova la
Yala Jehova b’a mago don an na ni an bɛ tɔɔrɔ la wa? A lajɛ masakɛ Dawuda ani ciden Piɛrɛ ye min sɛbɛn. Zaburu 31:8 ani 1 Piɛrɛ 5:7 kalan, o kɔ aw ka baro kɛ nin ɲininkali kan:
-
K’a dɔn ko Jehova bɛ an ka tɔɔrɔw kɔlɔsi ani ko a b’a janto an na, o bɛ mun kɛ i la?
7. Ala bɛna Hadamadenw ka tɔɔrɔw bɛɛ ban
Esayi 65:17 ani Jirali 21:3, 4 kalan, o kɔ aw ka baro kɛ nin ɲininkali kan
-
Ko jugu minnu ye Hadamadenw sɔrɔ, Jehova bɛna olu bɛɛ kɔlɔlɔw bɔ yen. Mun na o dɔnni bɛ dusu don i kɔnɔ?
I tun bɛ nin dɔn wa?
Sitanɛ kɛlen ka nkalon fɔlɔ tigɛ, a ye Jehova tɔgɔ tiɲɛ. O kɔrɔ ye ko, a ye mɔgɔw bila u ka ko jugu miiri Jehova ko la a kɛtɔ k’a fɔ ko Jehova tɛ mara kɛ ni tilennenya ani kanuya ye. Sɔɔni dɔrɔn Jehova bɛna Hadamadenw ka tɔɔrɔw bɔ yen, ni a y’o kɛ, a bɛ segin ka a tɔgɔ saniya kokura. Fɔcogo wɛrɛ la, a bɛna a jira k’a jɛya ko ale ka mara de ye maraw bɛɛ la ɲuman ye tiɲɛ yɛrɛ la. Jehova tɔgɔ saniyali ye fɛnw bɛɛ la nafamaba dɔ ye dunuya kɔnɔ.—Matiyu 6:9, 10.
MƆGƆ DƆW B’A FƆ KO: “An ka tɔɔrɔw ye Ala ka latigɛ ye.”
-
I bɛna mun de fɔ ka o tigi jaabi?
BAKURUBAFƆLI
Sitanɛ Sendonbaga ani mɔgɔ fɔlɔ fila de nɔba ye ko jugu ye diɲɛ kɔnɔ. An ka tɔɔrɔw bɛ nɔ bila Jehova la kosɛbɛ ani a bɛna u bɔ yen sɔɔni.
Seginnkanni
-
Sitanɛ ye nkalon jumɛn tigɛ Hawa ye?
-
Hadama ni Hawa ka murutili ye nɔ jumɛn bila an bɛɛ la?
-
An b’a dɔn cogo di ko an ka tɔɔrɔw bɛ nɔ bila Jehova la?
NINNU LAJƐ
Jurumu kɔrɔ ye min ye Bibulu bɛ o fɔ, o lajɛ.
Sitanɛ ye ko min lawuli Edɛn nakɔtu la, fɛn caman lajɛ o kan.
A lajɛ cɛ dɔ ye min dɔn tɔɔrɔw ko la a ɲɛ bɛ minnu na.
