TILAYƆRƆ 8
Masiya nali
A KA CA san 500 ye Daniɛl ka kirayakuma kɔ fɛ, mɛlɛkɛ Gabriɛl ye a yɛrɛ jira npogotigi cɛdɔnbali dɔ la min tun tɔgɔ ko Mariyama. Masakɛ Dawuda bɔnsɔn dɔ tun don. Gabriɛl ko a ma: “I ni hɛrɛ, e min ye nɛɛma sɔrɔ. Matigi b’i fɛ.” (Luka 1:28) O kuma ye Mariyama siran kosɛbɛ. Mun dun kosɔn Gabriɛl y’a fo nin cogo la?
Gabriɛl y’a fɔ Mariyama ye ko a bɛna Masiya bange
Gabriɛl y’a ɲɛfɔ a ye ko: ‘I kana siran, Mariyama, katuguni i ye nɛɛma sɔrɔ Ala fɛ. A filɛ, i na kɔnɔ ta ka denkɛ bange, i na o tɔgɔ da Yesu. Matigi Ala na a bɛnba Dawuda ka masasigilan di a ma. A ka masaya tɛna ban.’ (Luka 1:30-33) O kɛra kibaru duman ye! Mariyama de bɛna Masiya bange, mɔgɔw tun bɛ ka min makɔnɔ kabini tuma jan!
Kalo damadɔ tɛmɛnen kɔ, Yesu bangera Bɛtilɛhɛm. O don su fɛ, mɛlɛkɛ dɔ nana a lakali sagagɛnnaw ye ko: ‘Ne bɛ ɲagaliba kibaru duman fɔ aw ye. A filɛ, Kisibaa bangera aw ye bi Dawuda ka dugu la, o ye Matigi Krisita ye.’ (Luka 2:10, 11) O kɔ fɛ, Yesu lamɔna Nazarɛti dugu kɔnɔ, bawo u ka denbaya yɛlɛmana yen.
I hakili b’a la ko Masiya tun ka kan ka na san 29, an tile la wa? O san yɛrɛ de la Yesu ye a ka kirayabaara daminɛ, “a si tun bɛ san bisaba ɲɔgɔn bɔ.” (Luka 3:23) Mɔgɔ caman nan’a faamu ko Ala de y’a ci. U ko: “Kiraba y’i jira an cɛma.” (Luka 7:16, 17) Nka Yesu ka kalan tun bɛ mun kan?
Yesu ye mɔgɔw kalan u ka Ala kanu k’a bato: A y’a fɔ ko: “Matigi an ka Ala ye Matigi kelenpe de ye. I ka i Matigi Ala kanu ni i dusukun bɛɛ ye, ani i ni bɛɛ, ni i hakili bɛɛ ni i barika bɛɛ.” (Marka 12:29, 30) A y’a fɔ fana ko: “I ka i Matigi Ala bato, ka baara kɛ o kelenpe ye.”—Luka 4:8.
Yesu ye mɔgɔw waaju u ka ɲɔgɔn kanu: A ko:“I ka i mɔgɔ ɲɔgɔn kanu i ko i yɛrɛ.” (Marka 12:31) A ko fana: “Aw b’a fɛ mɔgɔw ka fɛn o fɛn kɛ aw ye, aw ka o ɲɔgɔn kɛ u ye, sabu o ye sariya ni kiraw ka kalan de ye.”—Matiyu 7:12.
Yesu y’a cɛsiri ka Ala ka Masaya kofɔ mɔgɔ wɛrɛw ye: A ko: “Wajibi don ne ka Ala ka masaya Kibaru Duman fɔ dugu tɔw fana la, k’a masɔrɔ ne cira o de kosɔn.” (Luka 4:43) Mun na Ala ka Masaya nafa ka bon nin cogo la?
Kitabu b’a fɔ ko Ala ka Masaya ye gofɛrɛnaman ye min bɛ sankolo la. A bɛna dugukolo mara, k’a to sankolo la. Ala ye Masiya de sugandi ka kɛ o Masaya Masakɛ ye, o ye Yesu ye. Kira Daniɛl ye yeli kɛ ko Ala ye “sebaaya ni nɔɔrɔ ni masaya” di Masiya ma sankolo la. (Daniɛl 7:14) O Masaya de bɛna dugukolo bɛɛ kɛ Alijinɛ ye, ka ɲɛnamaya banbali di Ala ka baarakɛlaw ma. Yali o tɛ kibaruyaw bɛɛ la ɲuman ye wa?
