Ala lakika min kofɔlen bɛ Bibulu kɔnɔ, o de ye Jehova ye, ale de ye fɛn bɛɛ Dabaga ye. (Jirali 4:11) Kira Ibrahima ni kira Musa ye ale de bato ikomi kira Yesu ye a bato cogo min na. (Jenɛse 24:27; Ekisode 15:1, 2; Yuhana 20:17) Jamakulu kelen mɔgɔw dɔrɔn ka Ala tɛ nka “dugukolo bɛɛ” de ka Ala don.—Zaburu 47:3.

Ala halala tɔgɔ min kofɔlen bɛ Bibulu kɔnɔ, o de ye Jehova ye. (Ekisode 3:15; Zaburu 83:19, Bible Senuma, 1961) O tɔgɔ bɔra Heburu daɲɛ dɔ la min kɔrɔ ye ko “a bɛ kɛ a ye” wa minnu bɛ ɲininiw kɛ ka ɲɛsin Bibulu ma, olu bolo, a kɔrɔ ye ko “a b’a fɛ min ka kɛ, o bɛ kɛ”. O tɔgɔ in kɔrɔ bɛ bɛn Jehova ma kosɛbɛ bawo ale de ye Dabaga ye ani ale de ye a yɛrɛ ka layiduw Tiimɛbaga ye. (Esayi 55:10, 11) Ala min tɔgɔ ye ko Jehova, Bibulu bɛ an dɛmɛ fana ka o Ala jogow dɔn, kɛrɛnkɛrɛnnenya la a ka kanuya o min ye a jogow bɛɛ la belebele ye. Ekisode 34:5-7; Luka 6:35; 1 Yuhana 4:8.

Jehova ye Ala tɔgɔ Bamanankan lama de ye min bayɛlɛmana ka bɔ Heburukan na—Heburukan na, siginiden 4 de don יהוה (YHWH) minnu bɛ wele ko Tétragramme. Ala tɔgɔ tun bɛ fɔ tigitigi cogo min na Heburukan na fɔlɔfɔlɔ, o dɔnnen tɛ. Nka fɔcogo min ye ko “Jehova”, o dɔnnen don kabini tuma jan Angilɛkan na. William Tyndale ye Bibulu min bayɛlɛma Angilɛkan na san 1530, a yera o Bibulu fɔlɔ de kɔnɔ Angilɛkan na. *

Ala tɔgɔ tun bɛ fɔ tigitigi cogo min na Heburukan na fɔlɔfɔlɔ, mun na o dɔnnen tɛ?

Fɔlɔfɔlɔ, Heburukan tun bɛ sɛbɛn ni dafataw dɔrɔn de ye, dafalenw tun tɛ a la. Ni Heburu dɔ tun bɛ kalanjɛ kɛ, a tun bɛ se ka dafalenw fara dafataw kan nɔgɔya la. Nka Bibulu yɔrɔ min sɛbɛnna Heburukan na min bɛ wele ko ‘Layidu kɔrɔ’, o yɔrɔ sɛbɛnni bannen, Heburu dɔw banna Ala tɔgɔ fɔli ma bawo u bolo ko a fɔli tun bɛ se ka ko jugu lase u ma. Ni u tun bɛ haya dɔ kalan Ala tɔgɔ tun bɛ min kɔnɔ, u tun bɛ o tɔgɔ yɛlɛma ka kɛ “Matigi” walima “Ala” ye. O hakilina jugu labanna ka jɛnsɛn dɔɔnin dɔɔnin yɔrɔw bɛɛ la, o la Ala tɔgɔ tun bɛ fɔ tigitigi cogo min na fɔlɔfɔlɔ, o tununna. *

Dɔw b’a miiri ko Ala tɔgɔ fɔcogo yɛrɛyɛrɛ tun ye “Yawe” de ye nka mɔgɔ wɛrɛw fana b’a miiri ko a tun bɛ fɔ cogo wɛrɛw la. Kɔgɔji min bɛ wele ko mer Morte, sɛbɛn dɔ yera o kɛrɛfɛ faraw kɔnɔ. Levitike yɔrɔ dɔ sɔrɔla o sɛbɛn kɔnɔ min tun sɛbɛnnen don Grɛkikan na, wa o kɔnɔ, Ala tɔgɔ sɛbɛnna ka kɛ “Iao” ye. Fɔlɔfɔlɔ Grɛki sɛbɛnnikɛlaw bolo, Ala tɔgɔ fɔcogo ye Iae, Iabe, ani Iaoue ye nka fosi t’a jira ko a tun bɛ fɔ nin cogow de la Heburukan na fɔlɔfɔlɔ. *

Dɔw bɛ min miiri Ala tɔgɔ ko la Bibulu kɔnɔ

Dɔw bɛ min miiri: Ala tɔgɔ man kan ka sɛbɛn Bibulu kɔnɔ bawo a tun bɛ fɔ cogo min na tigitigi heburukan na, o dɔnnen tɛ.

Tiɲɛ ye min ye: Nin hakilina b’a jira ko minnu tɛ kan kelen fɔ Ala b’a ɲini olu fɛ u ka a tɔgɔ fɔ cogo kelen na. Nka fɔlɔfɔlɔ, Ala batobaga minnu tun tɛ kan kelen fɔ, Bibulu b’a jira ko olu tun tɛ tɔgɔ jɛw fɔ cogo kelen na.

An ka misali ta Josue kan, ale tun ye Israɛl kiritigɛla dɔ ye. San kɛmɛ fɔlɔ krecenw minnu tun ye Heburuw ye, olu tun bɛ a tɔgɔ fɔ ko Yehohshua, k’a sɔrɔ minnu tun ye Grɛkiw ye, olu tun bɛ a wele ko Iesous. Josue tɔgɔ tun ye heburukan de ye, nka a tun bɛ fɔ grɛkikan na cogo min na, o de sɛbɛnna Bibulu kɔnɔ. O b’a jira ko mɔgɔw tun bɛ tɔgɔw fɔ cogo min na o waati la u ka kan na, krecenw tugura o fɔcogo de kɔ.—Kɛwalew 7:45; Heburuw 4:8.

O cogo kelen na, Ala tɔgɔ bayɛlɛmali fana ko la kan wɛrɛw la, o bɛ kɛ ka kɛɲɛ ni mɔgɔw nɛn tacogo de ye ka kɛɲɛ ni u ka kan ye. Min nafa ka bon o tɛ Ala tɔgɔ fɔcogo ye, nka a tɔgɔ tun bɛ yɔrɔ minnu na Bibulu kɔnɔ, ka a lasegin o yɔrɔw la, o de nafa ka bon.