“Ébotan amu mbamba mfasane mame wôé”
BIFIA bite bi ne bi David a nga belane bie na, a se’e minga éziñ. Minga ate a mbe jôé na Abigaïl. Jé é nga tindi David na a se’e nye, sikôlô mbé éve’ela minga ate ja ve bia?
David a nga yene minga ate, éyoñ a mbe a tubu’u Njô bôte Saül. Abigaïl a mbe minga Nabal, nkukume môt; a mbe a bili beta mbam betit e minkôle ya Sud ya nlame Juda. David ba be bôte bé be nga volô Nabal abui, be mbe ane “nka’alé” asu beba’ale mintômba a betite bé. Môs éziñ, David a nga lôme bôte bé na, be ke sili Nabal ‘jôme wo wé ô bili,’ mone jôme ya di. (1 Sa. 25:8, 15, 16, Mfefé Nkôñelan) Jôme David a nga sili Nabal, é mbe zezé éyoñe bia ve’e je a abim ésaé ba be bôte bé be nga bo asu mfi wé.
Ve Nabal, nnye ate éyôlé ja tinane na, “Akut,” a nga bo fo’o ve aval éyôlé jé ja tinan. A nga yalane David abé, a nga biasé fe jôm a nga sili nye. Ajô ete nde, David a nga nyoñe ntyi’ane ya ke foñosô nye, amu mbia éyalane wé. Nabal a nda bôte jé be nga ye mane wu, étom akute mboone wé.
Éyoñ Abigaïl a biya mbamba mfasan ya mam me nga ye kui, amu mbia éyalane Nabal, ane a nga bôndé fek a ayo’o ese. A ésemé ése, a nga kobô David ajô ya élat é mbe zañe ba Yéhôva. A nga ve fe David ba be bôte bé abui bidi na a ye’elane nye, nnye ate a mbe na, a ye su’ulane bo njô bôte baa ya ayoñ Israël. David ki a nga yemelane na, Yéhôva nnye a nga belan Abigaïl a kamane nye na, a bo mbia jam mise me Zambe. David a nga jô Abigaïl na: “Ébotan amu mbamba mfasane mame wôé, ébotan a wo wo te kamane ma e môse wuna na me bo te kulu metyi.”
Da yené ne ngeññ na, bi nji yiane vu Nabal, nnye ate a nji be a yeme ve akéva amu mbamba jam ba bo nye. Jam afe e ne na, éyoñe bia yene na, mbia jam éziñ a nga zu bo beta ajô, bia bo mvo’é éyoñe bia ve ngule jangan ése na, bi kôm ajô ete. Ôwé, bi ne jô avale ntili Besam a nga jô na: “Ye’ele’e me nya fe’e a ñyeman.”
Bôte bevo’o be ne yene na bia bo mam a fek, nge ke a mbamba mfasane mam. To’o ba kate bia de, nge momo, be ne wô’ôtan ane David, nnye ate a nga jô na: “Ébotan amu mbamba mfasane mame wôé.”
