Tañe mintete mimbu, teke môt éziñ a nga kui na a ve éyalane ya nsili ôte, jôm ete nje akon da kôéban é nga wôé bemillion be bôt. Akekui môse beyeme mam be nga kui na be yem aval akon da kôéban. Be nga yene na bemicro-organisme aval ane bebactérie a bevirus mbe ba soo môt akon. Ñyeman ôte ô nga volô bôte na be sa’ale a saé abui akon, a nalé a nga volô na bemillion be bôt be nyiñ ôbe ayap be to mvo’é.

Jé ki bi ne jô mfa’a ya beta minsili mife? Aval avé biyalan ya minsili mia tôñe le bi ne tyendé ényiñe jôé:

• Za a ne Zambe?

• Za a ne Yésus Krist?

• Éjôé Zambe é ne jé?

• Jé ja yange bia melu ma zu?

Ényiñe bemillion be bôt é nga tyendé amu be nga yene biyalane ya minsili mite. Biyalane ya minsili mite bi ne fe volô wo.

Ô ne sili womiene na, ‘Ye é ne tyi’ibi ya yeme benya mejôô a lat a jam éziñ?’ Amu bia yene na, e ne nya ayaé ya yeme benya mejôô a lat a abui mam. Amu jé bia jô nalé?

 Abui bôt da kañese ki mam bijôé, bebo makit a bekalane mefoé ba kate be. Amu e nji bo tyi’ibi na be yem nge bôte ba kate be benya mejôô, nge na ba kate be fo’o ve asimesane dap, be solé’é be mam méziñ; nge ke na, ba la-laane be minsos. Mbôle môt a too ki fe ndi a nyô mbok a na abui mefoé bôte ba kalan me nji bo été, bôt ba kate kui tyiñ mfa’a ya yem jam ébien é ne benya mejôô, a atinan ébien ya jam ete.

Akusa bo jo’ojo’o ate, bi ne kui na bi yem biyalane ya beta minsili y’ényiñ. Aval avé? Fo’o ve avale bi wô’ô bo éyoñ bia jeñe biyalane ya minsili bia sili biabebien môs ôse.

Bia jeñe benya mejôô môs ôse ya yôp. Bi tame yen avale Jessica a bo de. A jô na: “Éyoñ ése ngo jam ja di ôwôndô, a bo mbe ngul allergie (ôkon môt a bi éyoñ a te di nge nyu nge ke wô’ô ényum éziñ nyule jé ja kañese ki) to’o ôwôndô a ne tyôtyoé bidi bite.” Da sili na Jessica a kôme yemelan nge bidi a kus bia ye ke soo mone wé nju’u éziñ. A ke ôsu a jô na: “Ma taté jeñe na me kôme lañe notice asu na me yem biôm bise ba te belane bie. Éyoñ éte ma beta nyoñe nju’u na me jeñe mefoé mefe, nge ke loene nda ja yame bidi bite asu na me yem nge ékop éziñ é nji boban éyoñ be nga yame bidi bite. Ma sili fe bôte befe nge be ne kôme bo’olô na, nda ja yam bidi bite ja bo ésaé nya mboane.”

Éko éziñ da ye ke bo ayaé asu dôé na ô jeñe biyalane ya minsili miôé ane Jessica, ve éve’ane jé é ne volô wo na ô tôñe mezene melale ma tôñe le asu na ô bo de:

• Jeñe’e benya mejôô.

• Jeñe’e mefoé mefe ma yemete benya mejôô bete.

• Jeñe’e me vôme bôte ba kobô benya mejôô.

Mezene mete me ne volô wo na ô bi biyalane ya beta minsili y’ényiñ. Aval avé?

Éyoñe Jessica a nga jeñe benya mejôô ya Bible, a nga bo de fo’o ve aval a mbe a bo’o éyoñe a mbe a jeñe’e bidi bi ngo jé. A jô na: “E kôme lañ a la’ase mam ma yé’é a nga volô ma na me yem benya mejôô ya Bible.” Ane Jessica, bemillion be bôt be nga yé’é mame Bible a ye’ele a lat a minsili mi:

• Amu jé bi ne si va?

• Jé ja boban éyoñe bia wu?

• Amu jé bia tôbane minjuk?

• Jé Zambe a bo asu na a mane minjuk?

• Aval avé nda bôte jangan é ne nyiñe meva’a été?

Ô ne yene biyalane ya minsili mite a mife nge wo lañe Bible, jeñe’e fe na ô ke anjeñe mefoé dangan www.ps8318.com.