Bia tôñe miñye’elane ya Kalate Zambe a lat a aluk a ntyaman aluk. Zambe a nga té aluk na é bo élat ja ye tabe nnôm éto zañe fam ba minga. Avale Bible a jô, jam étam é ne bo na beluk be tyam alu’u dap é ne mvine mame ya bisôk.​—Matthieu 19:​5, 6, 9.

Ôwé, ba bo de a abui mezen:

• A zene ya Bekalate. Abui bekalate bia kuli ba ve melep mfa’a ya avale beluk be ne yemete alu’u dap, to’o be kateya alu’u dap. Tame ke lañe minlô mejô mi: “Kele’ ôsu a tôé bengaka’a ô nga bo éyoñ ô nga luk,” “Aval ô ne yeme jamé,” a “Va’a ngule na ndi nlem é beta so nda lu’u jôé” (nkobô fulasi).

• A zene ya bisulan. Bia yé’é melebe Kalate Zambe a ve beluk, bisulane biangan, bitôkan a beta bitôkan.

• A zene ya Bemvendé. Bemvendé ya mekônda ba volô beluk, ba lañe be bifuse ya Kalate Zambe, aval ane Beéphésien 5:​22-​25.

Momo. To’o nluk éziñ a sili bemvendé mvolan, be nji yiane kate nye ntyi’an a yiane nyoñ. (Begalate 6:5) Ve, Kalate Zambe a liti na môt a tyi’i na a tyam alu’u dé a too ke na, jame môt mbok a te bo é nji bo mvine mame ya bisôk, a nji bo fili ya lu’u môt mfe.​—1 Timothée 3:​1, 5, 12.

Kalate Zambe a kate belu’u na be ke ôsu a tabe nsamba to’o ba tôbane beta minjuk. (1 Becorinthien 7:​10-​16) Nge beluk ba ye’elane Zambe a nlem ôse, nge ba tôñe miñye’elane ya Kalate Zambe a nge ba litane na ba nye’esan, ba ye kui na be kôm abui minjuk be ne tôbane de.​—1 Becorinthien 13:​4-8; Begalate 5:​22.

Ve, beta be mame béziñ be ne bo na Kristen é tyi’i na ja kandane nnôm wé nge ke minga wé:

• Nnôm a vañe bene toñe nda bôte jé.​—1 Timothée 5:8.

• Nlu’u wua a wôé nyu mbok ébôm.​—Besam 11:5.

• Nlu’u wua a kômbô wôé nyu mbo’o mfa’a ya nsisim. Nge nlu’u wua a tindi nyu mbo’o na a tyam atiñe Zambe éziñ, nyu mbok a ne tyi’i na a kandane nye amu a kômbô “dañe wô’ô Zambe.”​—Mam 5:​29.