Sumala sa miaging report, niadtong 2022, 25 na ka tuig nga ang mga Saksi ni Jehova naay opisyal nga website. Pero 10 ka tuig sa miagi, niadtong Agosto 27, 2012, gi-release ang bag-o ug disenyo nga jw.org. Kining tulo ka bahin nga serye magsusi kon sa unsang paagi ang bag-o ug disenyo nga jw.org nakahatag ug kaayohan sa minilyong tawo.

Mga Video: Sa mga kombensiyon niadtong 2012, ang unang duha ka episode sa bag-ong serye nga Mahimong Higala ni Jehova gi-release sa DVD. Pero gamay na lang ang naggamit ug DVD ug mas mimahal ang paghimo niini. Dihang gi-release ang bag-o ug disenyo nga website niadtong 2012, nakahatag nig mas maayong paagi sa pag-apod-apod ug mga video. Busa niadtong Enero 2013, ang sunod nga episode sa Mahimong Higala ni Jehova, nga nag-ulohang Pag-ampo Kanunay, gi-release sa digital nga format sa jw.org. Sukad niadto, kapig 40 na ka episode ang na-release.

Ang video nga Nganong Tun-an ang Bibliya? gi-release pod sa digital nga format niadtong 2013. Kana nga video nahimong importanteng galamiton sa ministeryo ug apil sa Teaching Toolbox. Sukad niadto nga release, ang pag-apod-apod ug video pinaagi sa jw.org nahimong importanteng bahin sa buluhatong pagsangyaw. Pananglitan, sa kampanya niadtong Agosto 2014 sa pag-apod-apod sa tract nga nag-advertise sa jw.org, mga 15 ka milyong video ang gi-download o gitan-aw.

Usa ka brader nga mitabang sa pagdisenyo sa jw.org miingon: “Nalig-on gyod ang among pagtuo kay among nakita kon sa unsang paagi ta giandam ni Jehova sa umaabot nga mga hitabo. Niadtong panahona, wala mi mahibalo nga ang among mga paningkamot sa pagtaganag bag-ong paagi sa pag-apod-apod ug mga video mahimo diayng importante kaayo sa umaabot.” Pananglitan, ang JW Broadcasting gi-announce niadtong Oktubre 2014, ug kapig 37 ka milyong video ang gi-download anang bulana. Pagsugod sa COVID-19 nga pandemic niadtong 2020, mas daghan pang video ang gi-download o gitan-aw gikan sa jw.org. Niadtong 2022, moaberids ug kapig 260 ka milyong video ang gi-download gikan sa jw.org kada bulan.

Digital nga mga Publikasyon: Sa di pa dugayng katuigan, daghang magbabasa ang mas gusto nang mobasa online o sa mobile app imbes sa inimprenta. Sa pag-release sa bag-o ug disenyo nga website niadtong 2012, ang mga user makabasa na sa mga magasin online, sagad sa dili pa nila madawat ang inimprentang edisyon. Ang paningkamot sa paghimog digital nga mga publikasyon para sa website nakapasayon pod sa pag-introduce sa JW Library app sa ulahing bahin sa 2013. Ang app ug ang website maoy maayo kaayong mga galamiton sa pagbasa ug pagtuon sa digital nga mga publikasyon.

Sa sinugdan, ang mga publikasyon nga gi-release sa mga kombensiyon mahimo lang available sa website o sa app sa Enero sa sunod nga tuig. Pero sa rehiyonal nga mga kombensiyon niadtong 2015, ang mga nanambong nalipay pag-ayo sa pagkahibalo nga ila dayong ma-download ang digital nga edisyon sa mga gi-release sa kombensiyon—apil ani ang mga publikasyon nga Jesus—Ang Dalan, ang Kamatuoran, ang Kinabuhi ug Balik Kang Jehova, ingon man ang video nga What Is True Love? Pagkasunod tuig, sa Mayo 2016 nga JW Broadcasting, gi-release ni Brader Anthony Morris sa Nagamandong Lawas ang brosyur nga Tubag sa 10 ka Pangutana sa mga Batan-on ug iyang gi-announce nga puwede na dayon ning i-download. Kini ang unang higayon nga ang usa ka publikasyon dungang gi-release sa tibuok kalibotan.

Ang organisasyon ni Jehova dugay nang naggamit sa teknolohiya sa pagsangyaw sa maayong balita ug sa pagtabang sa mga igsoon. Nalipay ta pag-ayo nga makita kon sa unsang paagi gigamit ang jw.org nga website sa paghatag ug “pagkaon sa hustong panahon.”—Mateo 24:45.

• Mga video nga gi-download kada bulan

• Ang moabli sa website kada adlaw matag bulan

• Pag-release sa Pag-ampo Kanunay, Enero 2013

• Pag-release sa JW Library app, Oktubre 2013

• Tibuok kalibotang kampanya sa tract nga nag-advertise sa jw.org, Agosto 2014

• Pag-release sa JW Broadcasting, Oktubre 2014

• Ang mga gi-release sa kombensiyon available na sa digital nga format, Mayo 2015

• Pag-release sa Tubag sa 10 ka Pangutana sa mga Batan-on sa tibuok kalibotan, Mayo 2016