Ang mga kuwaknit makakita, pero aron mahibalo sila kon unsay naa sa ilang palibot bisag ngitngit, kadaghanan sa mga kuwaknit mogamit ug echolocation—pagtino sa distansiya sa usa ka butang pinaagi sa pagbanda sa tingog. Pananglitan, dunay mga kuwaknit nga makaila kon lamok o bakukang ang usa ka insekto pinaagi sa gikusgon sa pagkapakapa sa pako sa maong mga insekto.

 Hunahunaa: Kadaghanan sa mga kuwaknit magpatungha ug sunodsunod nga mga tingog pinaagi sa ilang bingatbingat, o larynx, ug ipagawas kini agi sa baba o ilong. Dihang ang tingog moigo sa mga butang, mopatungha kinig mga echo nga madungog sa ilang dagkong dalunggan. Pinaagi sa maong mga echo, ang kuwaknit makahimog 3D nga hulagway sa palibot diha sa iyang hunahuna. Busa mahibaloan sa kuwaknit ang lokasyon, gihabogon, ug distansiya sa usa ka butang, bisan pa sa kabanha sa ubang kuwaknit.

 Ang echolocation sa kuwaknit kinahanglang tukma kaayo, kay kon masayop siyag usa lang ka millisecond (ika-1,000 sa usa ka segundo), posibleng masipyat ang kuwaknit ug hangtod 17 sentimetros gikan sa iyang target. Sumala sa pipila ka researcher, ang echo time precision nga labaw pa sa usa ka millisecond “morag imposible.” Pero base sa mga eksperimento, ang mga kuwaknit dunay echo time precision nga 10 nanoseconds (ika-100,000,000 sa usa ka segundo), maong mahibalo sila sa distansiya nga dunay accuracy nga usa ka milimetro o ubos pa!

 Ang mga researcher nakahimog electronic nga sungkod nga naggamit ug echolocation aron tabangan ang mga buta nga makaimadyin sa ilang palibot ug makalikay sa mga babag diha sa agianan, apil na sa mga butang nga makaigo sa ilang ulo, sama sa sanga sa kahoy. “Nakakuha mig ideya gikan sa talagsaon kaayong abilidad sa kuwaknit nga mogamit ug echolocation,” miingon si Brian Hoyle ug Dean Waters, duha sa mga nagdisenyo sa gitawag ug Batcane.

 Unsay imong hunahuna? Ang talagsaong echolocation sa kuwaknit mitungha ba pinaagig ebolusyon? O gidisenyo kini?