SI Jehova kanunayng naggamit sa maong ilustrasyon sa magbalantay sa paghulagway sa iyang kaugalingon. Diha sa iyang Pulong, siya nagpasalig kanato: “Ako mismo ang mangita sa akong mga karnero, ug atimanon nako sila.”​—Ezequiel 34:11, 12.

Kinsa ang mga karnero ni Jehova? Sila mao ang mga tawo nga nahigugma ug nagsimba kaniya. Ang Bibliya nag-ingon: “Mosimba ta ug moyukbo; moluhod ta sa atubangan ni Jehova nga atong Magbubuhat. Kay siya ang atong Diyos, ug kita ang katawhan sa iyang sibsibanan, ang mga karnero nga iyang giatiman.” (Salmo 95:6, 7) Samag mga karnero nga nagsunod sa ilang magbalantay, ang mga alagad ni Jehova gustong mosunod sa ilang Magbalantay. Dili ba sila masayop? Siyempre masayop sila. Gani, ang mga alagad sa Diyos usahay nahisamag “nangatibulaag nga mga karnero,” “nawalang mga karnero,” ug “mga karnero nga nasaag.” (Ezequiel 34:12; Mateo 15:24; 1 Pedro 2:25) Pero, dihang ang usa mahimulag sa panon, si Jehova molaom gihapon nga siya mobalik.

 Giisip pa ba gihapon nimo si Jehova nga imong Magbalantay? Giunsa pag-atiman ni Jehova ang iyang mga karnero karon? Tagda kining tulo ka paagi:

Siya nagtaganag espirituwal nga pagkaon. “Pasibsibon nako sila sa usa ka maayong sibsibanan,” nag-ingon si Jehova. “Didto manghigda sila sa maayong sibsibanan, ug manibsib sila sa maayo kaayong sibsibanan.” (Ezequiel 34:14) Si Jehova wala magkulang sa pagtaganag makapadasig ug nagkadaiyang espirituwal nga pagkaon sa hustong panahon. Makahinumdom ba kag artikulo, pakigpulong, o video nga nagtubag sa imong pag-ampo? Dili ba kadto pamatuod nga gimahal ka ni Jehova?

Siya nanalipod ug nagtabang nato. Si Jehova nagsaad: “Dad-on nakog balik ang nahisalaag, bendahean nako ang naangol, ug palig-onon nako ang naluya.” (Ezequiel 34:16) Palig-onon ni Jehova kadtong naluya o nabug-atan sa mga kabalaka. Samag magbalantay nga nagbendahe sa samad sa karnero, iyang tabangan nga maulian kadtong nasakitan​—tingali tungod sa gihimo sa ilang isigkamagtutuo. Ug iyang dad-on pagbalik kadtong nasaag ug lagmit nakigbisog sa negatibong pagbati.

Iyang giisip nga iya tang responsabilidad. “Luwason nako sila gikan sa tanang dapit diin sila nangatibulaag,” nag-ingon si Jehova. “Pangitaon nako ang nawala.” (Ezequiel 34:12, 16) Si Jehova dili mawad-ag paglaom nga makabalik ang iyang karnero. Mamatikdan dayon niya kon dunay usa nga mawala. Iya ning pangitaon ug malipay siya kon iya ning makita. (Mateo 18:12-14) Gani, gitawag niya ang iyang matuod nga mga magsisimba nga “akong mga karnero, ang mga karnero nga akong giatiman.” (Ezequiel 34:31) Usa ka niana nga mga karnero.

Nganong gipangita ka ni Jehova ug gidapit nga mobalik kaniya? Tungod kay gusto niyang magmalipayon ka. Siya nagsaad nga siya ‘magpaulan ug mga panalangin’ sa iyang mga karnero. (Ezequiel 34:26) Tinuod kana nga saad. Ikaw mismo nakapamatuod nga gituman niya kana.

Hinumdomi ang imong mga kasinatian sa pag-alagad kang Jehova. Pananglitan, unsay imong gibati dihang nahibaloan nimo ang ngalan sa Diyos ug ang iyang katuyoan para sa tawo? Nahinumdom ba ka sa kalipay nga imong gibati sa pagpakig-uban sa mga igsoon sa mga asembliya ug kombensiyon? Dihang naa kay nasangyawan nga interesado, di ba mipauli ka nga malipayon?

Puwede nimong mabati pag-usab ang maong kalipay. Ang mga alagad sa Diyos kanhi miampo: “Kuhaa mi pag-usab, Oh Jehova, ug kinabubut-on ming mobalik nimo. Ibalik ang among maayong kahimtang sa una.” (Lamentaciones 5:21) Mihangyo sila nga mahibalik ang ilang kinabuhi sama sa kanhing mga panahon. Gitubag kana ni Jehova, ug nagmalipayon pag-usab ang iyang katawhan dihang mibalik sila sa pag-alagad kaniya. (Nehemias 8:17) Mao sab nay himoon ni Jehova kanimo.

Pero basin mobati ka nga dili sayon ang pagbalik kang Jehova. Tagda ang pipila ka rason nga lagmit makapugong nimo sa pagbalik ug kon unsay makatabang nimo.