Mga Katarongan Kon Nganong Kasaligan ang Bibliya
2. Prangka ug Matinud-anon
Kasaligan ang tawong gidungog nga matinud-anon, apan kon siya mamakak kanimo bisag kas-a, mawad-an kag pagsalig kaniya.
ANG mga magsusulat sa Bibliya maoy matinud-anong mga lalaki nga tim-os ug kasingkasing. Ang ilang pagkaprangka nagpakita nga tinuod ang ilang gisulat.
Kasaypanan ug kahuyangan.
Ang mga magsusulat sa Bibliya prangkang miadmitir sa ilang mga kasaypanan ug mga kahuyangan. Gihisgotan ni Moises ang usa ka sayop nga iyang nahimo nga miresultag dili maayo. (Numeros 20:7-13) Giadmitir ni Asap nga dihay higayon nga nasina siya sa pag-asenso sa mga daotan. (Salmo 73:1-14) Gisugid ni Jonas ang iyang pagkadili-masinundanon ug ang iyang dili maayong tinamdan sa dihang gikaluy-an sa Diyos ang naghinulsol nga mga makasasala. (Jonas 1:1-3; 3:10; 4:1-3) Way lipod-lipod nga gisugid ni Mateo nga iyang gibiyaan si Jesus sa gabii nga gidakop si Jesus.—Mateo 26:56.
Giyagyag sa mga magsusulat sa Hebreohanong Kasulatan ang pagkabagulbolan ug pagkarebelyoso sa ilang katawhan. (2 Cronicas 36:15, 16) Ang mga magsusulat walay gipinig, bisan ang ilang kaugalingong mga magmamando. (Ezequiel 34:1-10) Prangka usab nga gitaho diha sa mga sulat sa mga apostoles ang dagkong mga problema nga naagoman sa mga Kristohanon, sa mga nagapanguna, ug sa ubang mga kongregasyon sa unang siglo K.P.—1 Corinto 1:10-13; 2 Timoteo 2:16-18; 4:10.
Makauulaw nga kamatuoran.
Wala tabon-taboni sa mga magsusulat sa Bibliya ang giisip sa uban nga makauulawng kamatuoran. Prangkang gidawat sa unang siglong mga Kristohanon nga dili sila tinamod sa mga tawo kondili giisip sila nga walay hibangkaagan ug tinamay. (1 Corinto 1:26-29) Ang mga magsusulat miingon nga ang mga apostoles ni Jesus “dili edukado ug ordinaryo.”—Buhat 4:13.
Wala palabini sa mga magsusulat sa Ebanghelyo ang mga impormasyon aron lang makabaton si Jesus ug maayong impresyon. Hinunoa, matinud-anon nilang gisulat nga siya natawo sa pasungan diha sa kasarangang pamilya, nga siya wala magtungha sa inilang mga eskuylahan sa iyang panahon, ug nga ang kadaghanan sa iyang mga mamiminaw wala motuo sa iyang mensahe.—Mateo 27:25; Lucas 2:4-7; Juan 7:15.
Klaro, ang Bibliya naghatag ug daghang pamatuod nga kini gisulat sa matinud-anong mga magsusulat. Makasalig ka ba sa Bibliya tungod sa pagkamatinud-anon sa mga magsusulat niini?