Korte sa Espanya Nagpakanaog ug Desisyon Pabor sa Inahan

● Unsay imong bation kon akusahon ka nga dili ka maayong ginikanan? Komosta kon dunay moingon nga ang imong mga anak dili mahigalaon, dili makaila kon unsay husto ug sayop, ug mga bugo—tungod kay naimpluwensiyahan nimo?

Si Rosa López, nga inahan sa duha ka anak nga babaye sa Espanya, gipasakaag ingon niana nga sumbong sa iyang kanhing bana aron makuha niya ang ilang mga anak. Si Rosa maoy usa ka Saksi ni Jehova, ug ang iyang kanhing bana miinsister nga tungod sa relihiyon ni Rosa naapektohan pag-ayo ang katakos sa mga bata sa pagpakiglabot sa uban, ilang pag-eskuyla, ug pamatasan. Sa dihang napildi siya sa lokal nga korte, miapelar siya sa korte sa lalawigan.

Sa kaso maylabot sa katungod sa pagpanag-iyag anak, ang korte nga mohusay sa kaso maningkamot nga dili magmapihigon; dili kini himoong debate sa relihiyon, nga ang tinuohan na hinuon sa usa maoy gihusay. Hinunoa, ang hatagan lang niini ug pagtagad mao ang mga isyung sama sa: Unsa ang labing makaayo sa bata? Ang ginikanan ba nga maoy nagpadako sa bata dili maayog impluwensiya? Kinsa kanila ang mas may katakos sa pag-atiman sa mga panginahanglan sa bata?

Aron matubag kining mga pangutanaha sa kaso ni Rosa, ang korte nag-tudlog psychologist sa pag-interbiyo sa mga ginikanan. Ang resulta? Nakita sa psychologist nga bisag unom ka tuig nang anaa sa poder sa inahan ang mga bata, maayo sila ug lakat—sa eskuylahan, sa ilang relasyon sa uban, ug sa pamilya. Base sa natun-an sa psychologist ug ingon man sa gipanulti sa mga ginikanan, walay nakitang ebidensiya ang huwes nga “ang ilang emosyonal o ilang relasyon sa uban nadaot tungod kay napadako sila taliwala sa mga Saksi ni Jehova.” Ang huwes midesisyon usab nga ang mga akusasyon sa bana kaniadto ni Rosa “dili gayod makataronganon ug walay pasikaranan.”

Tungod sa pagpihig o sayop nga mga impormasyon, nagtuo ang uban nga ang mga anak sa mga Saksi ni Jehova hinikawan ug “normal” nga kinabuhi. Apan ang mga anak nga gipadako sumala sa mga prinsipyo sa Bibliya inatiman pag-ayo. Sila ginatabangan nga mahimong balanse, mahunahunaon, ug maayog pagkabansayng mga indibiduwal.—Efeso 6:4; 2 Timoteo 3:15-17.

[Hulagway sa panid 14]

Si Rosa López nakadaog pag-usab sa kaso sa pagpanag-iya sa iyang duha ka anak