Pagpaniid sa Kalibotan

“Sa wala pay computer, dili gayod masusi [sa mga botanist] ang tanang basahon sa dili pa nganlan ang usa ka bag-ong matang sa tanom, busa nagkadaghan ang mga tanom nga dunay daghang ngalan.” Sa usa ka milyon o kapin pang nalistang ngalan, labing menos 477,601 maoy dobleng mga ngalan. —SCIENCE, U.S.A.

“Sayis porsiyento lang sa mga Insek ang malipayon.” Sa usa ka surbi, mga 39 porsiyento sa mga gipangutana nagtuo nga “ang numero unong makahatag ug kalipay” mao ang “bahandi.”—CHINA DAILY, CHINA.

“Nakita sa pagsusi . . . nga sa Russia ‘kaylap ang pagretoke’ sa report bahin sa gidaghanon sa krimen sa nasod.” Ang mga departamento sa kapolisan “naglimod sa tinuod nga gidaghanon sa krimen” ug nagreport nga daghan kono kaayong krimen ang ilang nasulbad.—RIA NOVOSTI, RUSSIA.

“Usa sa tulo ka estudyante sa unibersidad sa [Berlin] Germany modawat ug imoral nga trabaho [sama sa prostitusyon ug pagsayaw sa klab] aron sa pagsuportar sa ilang pag-eskuyla.”—REUTERS NEWS SERVICE, GERMANY.

Magpaguwapa Daan Una Manganak

Ang Internet nakaimpluwensiya sa paagi sa mga inahan sa pagpahibalo sa ilang pagpanganak. Ang mga inahan kaniadto mamalita pinaagig telegrama, apan “ang mga inahan karon mamalita pinaagig Internet,” nagreport ang ABC, nga estasyon sa TV sa Amerika. Mag-post pod silag mga letrato nila ug sa ilang anak. Busa, kining bag-ong henerasyon sa artehong mga babaye magpa-facial ug magpamanikyur ug pedikyur sa dili pa manganak. Sumala sa report, ang uban magkuyog pa ganig hairdresser diha sa ospital. Ngano? Aron guwapa sila inigpanganak, miingon si Toni Golen, direktor sa departamento sa pagpanganak sa Beth Israel Deaconess Medical Center sa Boston.

Kon Aktibo Ka, Himsog Ka

Ang pagsigeg lingkod sa trabahoan, eskuylahan, o atubangan sa TV maoy usa sa mga hinungdan sa grabeng sakit, matod pa sa mga tigdukiduki. “Sa dihang maglingkod ka, ang enzyme nga lipoprotein lipase dili na kaayo mosuhop ug motunaw sa tambok diha sa dugo,” nag-ingon ang Vancouver Sun. Sumala pa niini, dili lang ehersisyo nga makapapitik ug kusog sa kasingkasing ang atong gikinahanglan aron magpabiling himsog. “Kita kinahanglang regular nga maglihoklihok, gaan man o kasarangang aktibidades, aron kanunayng aktibo ang atong metabolismo.”