TINGALI kini nahitabo na nimo. Ang imong ginikanan dunay balaod sa imong pagpaulig sayo, sa imong musika, sa imong mga higala, o sa imong pamesti, ug dili gyod nimo sila madalag hangyo. Pananglitan:

“Human maminyo sa akong Mama, gisusi dayon sa akong ama-ama ang tanang musika nga akong gusto. Napugos ko sa paglabay sa tanan kong CD!”​—Brandon. *

 “Gisaway kong Mama nga wala kuno koy suod nga higala. Apan sa nananghid kong makig-uban sa usa nako ka higala, wala siya mosugot kay wala siya makaila niya. Wa na man hinuon tay kapaingnan ani!”​—Carol.

“Dili gyod ko pasul-obon sa akong Papa ug ina-ina ug seksi nga T-shirt. Ug dili ko pasul-obon sa akong Papa ug mubong shorts!”​—Serena.

Komosta kon dunay butang nga dili gayod kamo magkauyon sa imong ginikanan? Mahimo ba nimo kining ipakigsulti kanila? “Ang akong ginikanan sagad dili gustong mamati,” miingon ang 17 anyos nga si Joanne. Ang 15 anyos nga si Amy miingon, “Kon sa akong tan-aw dili gyod makasabot nako ang akong ginikanan, dili na lang ko motingog.”

Apan ayaw dayog surender! Basin bayag mamati pod ang imong ginikanan.

Hunahunaa kini: Ang Diyos gani namati sa tawo sa dihang ilang gisulti kaniya ang ilang problema. Pananglitan, si Jehova namati kang Moises dihang siya nakigsulti kaniya alang sa mga Israelitas.​—Exodo 32:​7-14; Deuteronomio 9:​14, 19.

Tingali para nimo ang imong ginikanan dili sama ka rasonable sa Diyos. Ug tinuod, dako kaayog kalainan ang pagpakigsulti ni Moises kang Jehova bahin sa mahitabo sa tibuok nasod ug ang imong pagpakigsulti sa imong ginikanan bahin sa imong dili pagpaulig sayo. Apan may prinsipyo kini nga mahimo natong giya:

Kon duna kay katarongan, ang tawo nga may awtoridad​—niining bahina, ang imong ginikanan​—basig mamati nimo.

Ang kalamposan nagdepende sa imong paagi sa pagpatin-aw sa imong problema! Ang mosunod nga mga paagi makatabang nimo sa maayong pagpakigsulti:

1. Sayra ang problema. Isulat ang problema nga dili mo magkasinabot.

2.   Sayra kon unsay imong gibati. Isulat kon unsay imong gibati bahin sa panglantaw sa imong ginikanan sa problema​—nasakitan, naguol, naulawan, wala saligi, o uban pa. (Pananglitan: Sa situwasyon nga gihisgotan sa sinugdanan, si Jim miingon nga naulaw siya sa iyang mga higala sa estriktong balaod sa iyang ginikanan bahin sa pag-ulig sayo.)

3. Isipa nga ikaw ang ginikanan. Handurawa nga duna kay tin-edyer nga anak nga ang problema sama nianang imong gisulat sa Paagi 1. Kon ikaw ang ginikanan, unsay imong dakong kabalak-an, ug ngano? (Pananglitan: Sa situwasyon nga gihisgotan sa sinugdanan, tingali ang ginikanan ni Jim nahadlok lang nga basig may mahitabong dili maayo kaniya.)

4. Timbangtimbanga ang problema. Tubaga kini nga mga pangutana:

   Unsang kaayohan ang imong nakita sa panglantaw sa imong ginikanan?

   Unsay imong himoon aron dili sila mabalaka?

5. Isulti sa imong ginikanan ang problema ug pangita mo ug solusyon. Pinaagi sa pagpadapat sa mga paagi nga gihisgotan sa ibabaw​—ug sa mga punto nga gihisgotan sa “Mga Sugyot sa Pagpakigsulti”​—imong masayran nga puwede diay nimong maestorya ang imong ginikanan sa hinamtong nga paagi. Ingon niini si Kellie makig-estorya sa iyang ginikanan. “Dili gyod magsilbi kon makiglalis ka, ug seguradong dili ka makadaog,” siya miingon. “Aron masulbad ang problema, makigsulti gyod ko sa akong ginikanan. Sagad makakita ra kamig solusyon.”