Ang mga aksidente sa sakyanan nakapatay ug kapin sa usa ka milyon ug nakaangol ug mga 50 ka milyon matag tuig. Pero milyon-milyong isda magduot sa paglangoy ug dili gyod magkabangga. Giunsa nila kini paghimo, ug unsay atong makat-onan gikan kanila aron mamenosan ang pagbanggaay sa mga sakyanan?

Hunahunaa: Ang nagduot nga mga isda maniid sa ilang palibot pinaagi sa ilang mga mata ug sa usa ka organo nga gitawag ug lateral line. Kini nga organo maoy ilang gamiton sa pagtino sa nahimutangan sa ubang isda sa ilang duol, ug sila moreaksiyon niining paagiha:

1. Magtaparay sa paglangoy. Sila moabay paglangoy sa isda nga tapad nila ug mohatag ug igong distansiya.
2. Magpaduol. Sila magpaduol sa isda nga layo kanila.
3. Maglikay sa pagkabangga. Molihay sila aron dili mabangga sa ubang isda.

Base niining tulo ka paagi sa isda sa pagduot sa paglangoy, ang mga tiggamag sakyanan sa Japan nagdisenyog daghang gagmayng robot nga mag-abay ug dagan nga dili magkabanggaay. Imbes mata ang gamiton, ang mga robot naggamit ug teknolohiya sa komunikasyon; imbes lateral line, kini naggamit ug laser range finder. Ang kompaniya nagtuo nga kini nga teknolohiya makatabang kanila sa pag-imbentog mga sakyanan nga “dili mabangga” ug “dili makadaot sa kalikopan ug makawala sa problema sa trapiko.”

“Ang paagi sa isda sa pagduot sa paglangoy among gisundog pinaagi sa modernong teknolohiya,” miingon si Toshiyuki Andou, pangulong inhenyero sa pag-imbentog sakyanang robot. “Kaming mga tighimog sakyanan daghan pa kaayog pagatun-an bahin sa pagduot sa mga isda sa paglangoy.”

Unsay imong hunahuna? Ang pagduot ba sa mga isda sa paglangoy mitungha rag iya? O kini ba gidisenyo?