“Siya Nagaagak Kanako sa mga Alagianan sa Pagkamatarong”

Sumala sa giasoy ni OLga Campbell

“Ang usa ka maayong ehemplo nahisama sa bagting sa kampana nga mag-awhag sa uban sa pagsunod,” matod pa sa akong manghod nga si Emily. “Imong gibagting ang kampana, ug ako misanong.” Iya akong gisulatan aron pahalipayan sa akong ika-60 ka tuig sa bug-os-panahong pag-alagad sa Diyos. Paasoya ko kon unsa ang akong kinabuhi sa bata pa ko ug kon sa unsang paagi gisugdan nako ang akong tibuok-kinabuhi nga pag-alagad sa Diyos.

NATAWO ako sa Enero 19, 1927, sa usa ka uma duol sa Wakaw, Saskatchewan, sa tungang bahin sa kasadpang Canada. Ukrainiano ang akong mga ginikanan. Kami sa akong kaluha nga si Bill ang ikaunom ug ikapito sa walo ka anak. Kaming mga bata motabang sa among kugihan nga amahan diha sa uma. Diha sa among payag, giatiman mi pag-ayo sa among inahan bisan pag nag-antos siya sa rayuma nga maoy nakaingon sa iyang ahat nga kamatayon. Trayentay-siyete pa lang ang iyang edad sa dihang siya namatay ug ako kuwatro anyos pa lang niadtong panahona.

Unom ka bulan human mamatay si Mama, si Papa nagminyo pag-usab. Gubot kaayo ang among panimalay, nga sa ngadtongadto nadugangan pag lima ka batang babaye! Naningkamot ko pag-ayo nga makabatog maayong relasyon sa akong inaina, apan dili gyod sila magkasinabot sa akong magulang nga si John.

Sa kataposang bahin sa katuigan sa 1930, kami ni Bill mitungha sa hayskul mao nga nakalingkawas mi sa kasamok sa balay. Mobutohay na ang Gubat sa Kalibotan II, ug ang mga tawo makinasodnon kaayo. Ang among bag-ong maestra nagsugo kanamo sa pagsaludar sa bandera, apan ang usa ka babayeng estudyante midumili niana. Busa siya gibiaybiay sa ubang estudyante. Apan, ako nakadayeg sa iyang kaisog ug ako siyang gipangutana kon nganong wala siya mosaludar. Iyang gipasabot kanako nga siya usa ka Estudyante sa Bibliya, nga maoy pagtawag usahay sa mga Saksi ni Jehova, ug ang iyang debosyon ngadto lamang kono sa Diyos.—Exodo 20:2, 3; Buhat 5:29.

Nagkinaugalingon

Sa 1943, nakatrabaho ko sa Prince Albert ingong kargador ug tigdeliber ug mga soft drink. Kay nangandoy kog giya sa Diyos, mipalit kog Bibliya apan nakahilak ko sa kahigawad tungod kay dili nako kini masabtan. Ang pag-ampo nga Amahan Namo mao ra gyod intawon ang akong nahibaloan sa Bibliya.—Mateo 6:9-13.

Usa ka Dominggo niana, ang tag-iya sa balay nga akong gisak-an, nga relihiyoso kaayo, nagpasiatab nga iya konong gitulod ang usa ka babaye nga nagtudlog Bibliya diha sa pultahan. Natingala ko kon nganong ngil-ad kaayo siyag batasan. Paglabay sa pipila ka Dominggo, dili maayo ang akong pamati mao nga wala ko mosimba. Nianang adlawa ang babaye nga nagtudlog Bibliya mibalik.

 “Nagaampo ka ba?” siya nangutana kanako.

“Oo, kanang Amahan Namo,” mitubag ko.

Samtang iyang gisaysay ang kahulogan sa mga pulong ni Jesus, ako naminaw pag-ayo. Siya misaad nga mobalik sa adlawng Miyerkoles.

Pag-uli sa tag-iya sa balay, malipayon nakong giasoy kaniya ang mahitungod sa babaye nga nagtudlog Bibliya, nga usa diay ka Saksi ni Jehova. Pwerte nakong guola kay iya kong gibaharan, “Kon mobalik gani tong babayhana karong Miyerkoles, papahawaon ta mong duha sa balay!”

Akong gisiksik ang kasilinganan aron pangitaon ang maong Saksi, ug akong nahibaloan nga siya diay si Gng. Rampel. Sa dihang ako siyang nakaplagan, akong gisulti kaniya ang akong problema ug gihangyo siya nga isulti kanako ang tanan niyang nahibaloan sa Bibliya. Sa paminaw nako, morag gihisgotan namo ang tibuok Bibliya! Iyang gitandi ang presenteng panahon sa adlaw ni Noe, sa dihang gilaglag sa Diyos ang daotang kalibotan ug giluwas si Noe ug ang iyang pamilya ngadto sa usa ka nahinloang yuta.—Mateo 24:37-39; 2 Pedro 2:5; 3:5-7, 12.

“Akong nakita nga imo nang gidawat kini nga mga pagtulon-an sa Bibliya ingong kamatuoran,” matod pa ni Gng. Rampel human sa among dugay nga panaghisgot. “Duha ka semana gikan karon, dunay asembliya ang mga Saksi ni Jehova, ug kinahanglang magpabawtismo ka.” Nianang gabhiona, wala ko makatulog sa pagsigeg hunahuna sa tanan nakong nakat-onan. Morag seryoso kaayo nga desisyon ang pagpabawtismo. Apan, gusto kong moalagad sa Diyos! Bisag diyutay pa ang akong kahibalo sa Bibliya, ako nagpabawtismo sa edad nga 16, niadtong Oktubre 15, 1943.

Pagbalhin Ngadto sa Pikas Bahin sa Nasod

Pagka Nobyembre, gihangyo ko sa akong magulang nga si Fred sa pagtrabaho ingong tig-atiman sa tulo ka andana nga balay nga iyang gisak-an didto sa siyudad sa Toronto sa sidlakang Canada. Misugot ko kay sa akong hunahuna mahimo kong mas gawasnon didto sa pagsimba kang Jehova. Sa wala pa ko molakaw, akong giduaw ang akong magulang nga si Ann, nga didto ra pod nagpuyo sa Saskatchewan. Diha siyay sorpresa kanako—siya ug ang lain pa nakong magulang nga si Doris, nagtuon na sa Bibliya uban sa mga Saksi ni Jehova, ug iya kong giawhag nga magtuon usab. Dayon, ako pod siyang gisultian sa akong sekreto—ako usa na ka Saksi ni Jehova!

Kami sa akong manghod nga si Emily misakay ug tren paingon sa Toronto. Dugay kaayo ang among biyahe. Gisugat kami ni Bill sa estasyon ug iya kaming gidala didto sa balay nga iyang gipuy-an kauban ni Fred ug John. Akong gipangutana si Fred kon kinsa pay nagpuyo sa balay. “Di gyod ka makatuo,” siya miingon. “Nahinumdom ka kang Alex Reed nga taga didto sa ato? Naa siya sa taas nagpuyo, ug abi nimo interesado ang tunto sa mga Estudyante sa Bibliya!” Pwerte nakong lipaya.

Mihinayhinay kog saka sa taas ug nagsabot mi ni Alex nga mouban ko sa tigom niana mismong gabhiona. Gusto kong motambong dayon sa tigom aron dili makahigayon ang akong mga igsoong lalaki sa pagpaluya kanako. Wala madugay human niana, misangyaw ko sa unang higayon bisag wala gyod ko matun-ig tarong sa Bibliya. Nalipay ko sa pagpakigsulti sa daghang Ukrainiano, kay makamao man kong mosulti sa ilang pinulongan sukad pa sa akong pagkabata.

 Si Bill ganahang mobasa sa Bantayanang Torre, nga pirme nakong ibutang sa iyang kuwarto. Pagbalhin niya sa British Columbia sa kasadpang Canada, ako siyang gigasahan ug suskrisyon sa Bantayanang Torre. Bisag hilomon siya nga pagkatawo, iya kong gipadalhan ug napulo ka panid nga sulat nga nagpahayag sa iyang pagpasalamat. Sa ngadtongadto, iyang gipahinungod ang iyang kinabuhi kang Jehova ug nahimo siyang madasigon nga Kristohanong ministro. Busa, sa dako nakong kalipay, lima sa akong mga igsoon—si Bill, Ann, Fred, Doris, ug Emily—nahimong bawtismadong mga magsisimba ni Jehova!

Sa Mayo 22, 1945, gikuha na sa gobyerno sa Canada ang pagdili sa buluhaton sa mga Saksi ni Jehova. a Sa pagkatinuod, mao pay akong pagkahibalo nga gibando diay ang among buluhaton. Kami sa akong higala nga si Judy Lukus nakadesidir sa pagsulod sa bug-os-panahong ministeryo ingong mga payunir didto sa Quebec, sa halayong bahin sa sidlakang Canada. Pranses ang pinulongan didto. Sa dihang nabalitaan ni Doris ug Emily ang among plano, sila nakadesidir usab nga magpayunir sa Vancouver, British Columbia, nga nahimutang sa pikas bahin sa kontinente.

Relihiyosong Pagpihig sa Quebec

Lisod ang kahimtang didto sa Quebec. Ang buluhatong pagsangyaw sa mga Saksi didto grabeng gisupak. b Kami nalipay sa pagpakigbahin sa pagpanagtag sa tract nga Quebec’s Burning Hate for God and Christ and Freedom Is the Shame of All Canada (Ang Nagdilaab nga Pagdumot sa mga Tawo sa Quebec Batok sa Diyos ug Kang Kristo Maoy Kaulawan sa Tibuok Canada). Kanang masakit nga mensahe nagyagyag sa pagpihig batok sa mga Saksi ni Jehova.

Sulod sa 16 ka adlaw, sugod sa alas dos sa kadlawon, hinayhinay namong isuksok ang mga tract sa ilalom sa pultahan. Usa ka higayon niana samtang didto mi sa usa ka apartment, among nasayran nga nagpadulong ang mga polis. Mitago mi sa usa ka gamayng dalan mao nga wala mi madakpi. Pagkasunod adlaw, nanagtag na usab mig Bantayanang Torre ug Pagmata! sa kadalanan. Paglabay sa pipila ka bulan, dili na namo maihap kon kapila mi madakpi sa mga polis. Aron andam ko engkasog mabilanggo, kanunay nakong dad-on ang akong sepilyo ug pangbadlis sa kilay.

Sa Nobyembre 1946, si Nathan Knorr, nga maoy nanguna sa tibuok-kalibotang buluhaton sa mga Saksi kaniadto, miduaw gikan sa Brooklyn, New York. Iyang gidapit kaming 64 ka payunir sa Quebec sa pagtambong sa ikasiyam nga klase sa Watchtower Bible School of Gilead sa South Lansing, New York. Niining maong tunghaan, kami gitudloan pag-ayo bahin sa Bibliya sulod sa lima ka bulan. Human sa among graduwasyon sa Agosto 1947, kami gipadala ngadto sa mga lungsod sa Quebec aron magtukod ug bag-ong mga kongregasyon.

Usa ka Mabungahong Ministeryo

Upat kanamo nga mga batan-ong babaye ang gipadala sa siyudad sa Sherbrooke. Magsige mig praktis sa pinulongang Pranses samtang kami mopaingon sa lugar nga among sangyawan ug sa dihang kami mamauli. Sa tingpaniudto, usahay wala miy kuwarta nga ikapalit ug pagkaon, busa mamauli mi ug magtuon. Ang akong kauban, si Kay Lindhorst, maayo kaayo sa gramarya. Iya una kong gitudloan sa gramarya sa Iningles aron akong masabtan ang Pranses.

Ang labing makaiikag nga bahin sa akong pagpayunir nahitabo sa lungsod sa Victoriaville, nga kaniadto may populasyon nga mga 15,000. Wala kaayoy nagsultig Iningles didto mao nga higayon na kadto nga mapraktis namo pag-ayo ang among Pranses. Maayo kaayo ang among unang semana didto. Bisan asa mi mangadto, ang mga tawo modawat sa among mga basahon. Apan pagbalik namo, sirado na ang mga pultahan hasta ang mga bentana. Unsa may nahitabo?

Gidid-an sa pari ang mga tawo sa pagpaminaw kanamo. Busa samtang moadto kami sa mga balay, ang mga bata magsigeg sunodsunod kanamo nga manglabayg bato ug niyebe. Bisan pa niana, daghan ang gustong maminaw sa mensahe sa Bibliya. Sa sinugdan,  paadtoon lang mi nila kon gabii na. Apan sa dihang mouswag na ang ilang kahibalo sa Bibliya, ang ilang pagtuon himoon na sa dayag bisag mosupak pa ang ilang mga silingan.

Sa katuigan sa 1950, kami sa akong mga igsoong babaye miduaw sa Wakaw. Diha sa tigom sa kongregasyon, among giasoy ang among mga eksperyensiya sa buluhatong pagsangyaw. Human niana, giingnan mi sa nagadumalang ministro, “Malipay gyod ang inyong inahan kon siya banhawon ug iyang mahibaloan nga ang iyang mga anak nahimong mga Saksi ni Jehova!” Siya miingon nga si Mama nagtuon sa Bibliya uban sa mga Saksi sa wala pa siya mamatay. Nanglugmaw ang among mga luha sa dihang among nahibaloan kana ug segurado kami nga iyang itudlo kanamo ang kamatuoran sa Bibliya kon wala lang unta siya mamatay ug sayo.

Pagminyo ug Pag-alagad Ingong Magtiayon

Sa 1956, akong nahimamat si Merton Campbell, usa ka Saksi nga nabilanggo ug 27 ka bulan panahon sa Gubat sa Kalibotan II tungod kay midumili siya sa pagsundalo. Siya nag-alagad sa hedkuwarter sa mga Saksi ni Jehova sa Brooklyn sa halos napulo na ka tuig. Si Merton nakaugmad ug daghang maayong mga hiyas tungod sa pagtuon sa Bibliya, ug sa paminaw nako, mahimo siyang maayong bana. Nagsinulatay mi ug sa ngadtongadto nagkahigugmaay.

Kami gikasal sa Septiyembre 24, 1960. Dako gayong panalangin nga mag-alagad sa Diyos sulod sa 47 ka tuig kauban sa usa ka tawo nga nagsunod sa mga prinsipyo sa Bibliya! Si Merton nagtrabaho sulod sa 58 ka tuig diha sa Service Department, nga nagtaganag tabang ug giya sa mga kongregasyon sa mga Saksi ni Jehova sa tibuok Amerika. Sulod sa kapig 30 ka tuig, ang akong trabaho didto sa hedkuwarter mao ang pag-adorno sa mga lawak alang sa bisita ug sa ngadtongadto sa dagkong mga Assembly Hall sa siyudad sa New York. Dayon, pagka 1995, kami ni Merton gibalhin sa Watchtower Educational Center sa Patterson, nga mga 110 kilometros paamihanan gikan sa siyudad sa New York.

Sa dihang mibiya ko sa balay sa edad nga 12, wala ako magdahom nga ako makabatog dakong pamilya nga gilangkoban sa akong mga igsoon sa pagtuo apil sa akong mga igsoon sa unod. Ako nangandoy sa bag-ong kalibotan sa Diyos, sa dihang kami mag-alirong kang Mama ug among iasoy kaniya ang nahitabo samtang siya natulog sa kamatayon—ilabina kon giunsa pag-atiman ni Jehova nga Diyos ang espirituwal nga panginahanglan sa iyang mga anak. Nalipay gayod kami nga iya kaming giagak “sa mga alagianan sa pagkamatarong”!—Salmo 23:3.

[Footnote]

[Mga hulagway sa panid 27]

Ang akong mga ginikanan ug ang payag nga gipuy-an namo kauban sa pito nako ka igsoon

[Hulagway sa panid 29]

Kami sa akong mga kauban sa pagsangyaw sa Ottawa, 1952

[Hulagway sa panid 29]

Uban sa akong mga igsoon (gikan sa wala patuo) si Ann, Mary, Fred, Doris, John, ako, Bill, ug si Emily

[Hulagway sa panid 29]

Uban kang Merton karon