Gahom sa Diyos Nadayag Diha sa mga Bituon

“Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”—ISAIAS 40:26.

ANG adlaw maoy bituon nga kasarangan lamang ug gidak-on. Bisan pa niana, ang gibug-aton niini maoy 330,000 ka pilo sa gibug-aton sa planetang yuta. Kadaghanan sa mga bituon nga duol sa yuta mas gamay kay sa adlaw. Apan, ang ubang mga bituon sama nianang ginganlag V382 Cygni, adunay gibug-aton nga labing menos 27 ka pilo sa gibug-aton sa adlaw.

Unsa kadaghanang enerhiya ang ipagula sa adlaw? Handurawa kon unsa kainit ang kalayo kon imo gihapong mabatyagan ang kainit niini sa gilay-on nga napulo ka kilometros. Sa aberids, ang gilay-on sa adlaw gikan sa yuta maoy 150 ka milyong kilometros. Apan sa panahon nga sanag kaayo ang adlaw, ang kainit niini makapaslot gani sa panit! Makapatingalang masayran nga mga ikausa ka bilyon ka bahin lamang sa enerhiya sa adlaw ang makaabot sa yuta. Bisan pa niana, kining gamayng tipik sa enerhiya sa adlaw igo nang makapatunhay sa kinabuhi dinhi sa yuta.

Gani, nakalkulo sa mga siyentipiko nga ang tanang enerhiya nga ipagula sa adlaw igong makasuplay ug enerhiya sa mga 31 ka trilyong planeta sama sa yuta. O sa pagsukod niini sa laing paagi: Kon mahimong tigomon ang tanang enerhiya nga ipagula sa adlaw sulod sa usa ka segundo, kini makatagana sa Amerika ug “igong enerhiya sulod sa 9,000,000 ka tuig, base sa konsumo niini karon,” nag-ingon ang Web site nga Space Weather Prediction Center (SWPC).

Ang enerhiya sa adlaw naggikan sa uyok niini—usa ka nukleyar nga reaktor nga magbungkag sa mga atomo ug magpatunghag enerhiya. Ang adlaw dako kaayo ug ang uyok niini baga kaayo nga dangtag milyonmilyong katuigan una pa makagawas sa adlaw ang enerhiya nga gipatungha diha sa uyok niini. “Kon ang Adlaw mohunong karon sa pagpatunghag enerhiya,” matod pa sa Web site nga SWPC, “dangtan unag 50,000,000 ka tuig una mabatyagan dinhi sa Yuta ang epekto niini!”

Karon tagda kining kamatuorana: Kon imong iyahat ang imong mga mata sa gabii nga walay dag-om, imong makita ang libolibo ka bituon, nga ang matag usa nagpagula ug daghan kaayong enerhiya sama sa atong adlaw. Ug sumala pa sa kalkulasyon sa mga siyentipiko, adunay bilyonbilyong bituon sa uniberso!

Diin gikan kining tanang bituon? Kadaghanang tigdukiduki nagtuo karon nga ang uniberso kalit lang mitungha mga 14 ka bilyong tuig kanhi, apan wala sila mahibalo kon sa unsang paagi kana nahitabo. Hinunoa, ang Bibliya tatawng nag-ingon: “Sa sinugdan gilalang sa Diyos ang mga langit ug ang yuta.” (Genesis 1:1) Sa walay duhaduha, ang Usa nga naglalang niining dagkong mga tuboran sa enerhiya—ang mga bituon—angay lamang hubiton nga “mabaskog sa gahom.”—Isaias 40:26.

Kon sa Unsang Paagi Gigamit sa Diyos ang Iyang Gahom

Si Jehova nga Diyos naggamit sa iyang gahom sa pagpalig-on niadtong nagabuhat sa iyang kabubut-on. Pananglitan, gigamit ni apostol Pablo ang iyang kusog sa pagtudlo sa uban bahin sa Diyos. Si Pablo tawo lamang sama kanato, apan siya nagmalamposon sa iyang buluhaton bisan pa sa grabeng  paglutos. Sa unsang paagi? Siya miadmitir nga siya gihatagan sa Diyos ug “gahom nga labaw sa kasarangan.”—2 Corinto 4:7-9.

Si Jehova naggamit usab sa iyang gahom sa paglaglag niadtong tinuyo nga naglapas sa iyang moral nga mga sukdanan. Si Jesu-Kristo naghisgot sa kalaglagan sa Sodoma ug Gomora ug sa Lunop sa adlaw ni Noe ingong pananglitan nga ang mga daotan lamang ang laglagon sa Diyos. Si Jesus nagtagna nga sa dili madugay gamiton na usab ni Jehova ang iyang gahom sa paglaglag niadtong dili mosunod sa Iyang mga sukdanan.—Mateo 24:3, 37-39; Lucas 17:26-30.

Unsay Epekto Niini Kanimo?

Human mapalandong ang gahom sa Diyos nga nadayag diha sa mga bituon, mobati ka tingali sama sa gibati ni Haring David, kinsa miingon: “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo nga ikaw nagahunahuna man kaniya, ug ang anak sa yutan-ong tawo nga ikaw nagaatiman man kaniya?”—Salmo 8:3, 4.

Oo, kita makaamgo kon unsa kita kagamay kon itandi sa dako kaayo nga uniberso. Bisan pa niana, kita dili angayng mobati nga kita walay mahimo. Gipasulat ni Jehova kang manalagnang Isaias kining makapahupayng mga pulong: “[Ang Diyos] naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom. Ang mga batang lalaki kapoyon ug maluya, ug ang mga batan-ong lalaki sa walay pakyas mangapandol, apan kadtong naglaom kang Jehova maulian sa kusog. Sila manglupad pataas pinaagig mga pako nga sama sa mga agila. Sila managan ug dili maluya; sila manglakaw ug dili kapoyon.”—Isaias 40:29-31.

Kon ikaw maningkamot sa pagbuhat sa kabubut-on sa Diyos, ikaw makaseguro nga siya mohatag kanimo sa iyang balaang espiritu aron sa pagtabang kanimo. Apan kinahanglang pangayoon nimo kini. (Lucas 11:13) Sa tabang sa Diyos, ikaw makalahutay sa bisan unsang pagsulay ug mapalig-on sa pagbuhat kon unsay matarong.—Filipos 4:13.

[Blurb sa panid 7]

Sa tabang sa Diyos, ikaw mapalig-on sa pagbuhat kon unsay matarong

[Mga hulagway sa panid 7]

Nunot sa relo gikan sa ibabaw sa wala: Whirlpool nga galaksiya, Pleiades nga hugpong sa mga bituon, Orion Nebula, Andromeda nga galaksiya

[Mga hulagway sa panid 7]

Ang gibug-aton sa adlaw maoy 330,000 ka pilo sa gibug-aton sa planetang yuta

[Picture Credit Lines sa panid 7]

Pleiades: NASA, ESA and AURA/Caltech; all others above: National Optical Astronomy Observatories